PILOTIMUA̒TA 7 - KITABI HABARI MOPIOHE

¹ Eeya lotahuda odelei Musa, “Wau̒ mamo powali olemu debo odelo Allahu Taa̒ala totalu li olongia, wau wutatumu tei Haruna mamo bisala to olio odelo nabimu.

² Potunggula mao̒ odelei Haruna ngoa̒amila upilo malenta-U̒ mai olemu. Ahulilo tei Haruna molele mao̒ odeli olongia deu̒ tio musi mopoluasi taulo Isirai̒lu mololaa mao̒ lipu lo Masiri.

³ Bo Wau̒ mamo powali hilaa li olongia baa̒ngiyolo. Tio diila tamo mandungi olemu, eleponu Wau̒ mopowoluo mai baala dadaata to Masiri.

⁴ Sababu uito Wau̒ mamo hukuumani mai Masiri wolo hukuumani u mobuheeto, lapatao̒ deloo-U̒ ngoa̒amila bangusa lo Isirai̒lu, umati-U̒, lumualao̒ monto lipu boito.

⁵ Yi taulo Masiri mamotota mao̒ deu̒ Wau̒ botie Eeya, tou̒ Wau̒ mohukuumani mai olimongolio wau modelo Isirai̒lu lumualao̒ monto lipu limongolio.”

⁶ Tei Musa wolei Haruna helohutu mao̒ wolo u pilomalenta lo Eeya.

⁷ Tei Musa o umulu walu lopulu lotaunu wau tei Haruna walu lopulaa tolo taunu tou̒ timongolio helo taalua woli olongia lo Masiri.

Tunggudu lei Haruna

⁸ Eeya lotahuda odelei Musa wolei Haruna,

⁹ “Wonu ti olongia mei̒ pohutu mao̒ olimongoli u moo̒linggolabe odelo bukuti, ahuli mao̒ tei Haruna mohama mai tunggudio wau pomahula mola ode huta totalu li olongia. Tunggudu boito mamobolio̒ mowali tulidu.”

¹⁰ Yi malonao̒lo tei Musa wolei Haruna mola lotaalua woli olongia wau timongolio helohutu mao̒ wolo upilo malenta lo Allahu Taa̒ala. Tei Haruna lopo mahula mola tunggudio ode huta totalu li olongia wau mongo poweelio, lapatao̒ tunggudu boito lobolio̒ lowali tulidu.

¹¹ Kalana uito ti olongia olo malei̒ tiangai tau-taulio o ilimia wau tahi ahalia lo sihililio, tulusi timongolio helohutu mao̒ odito olo wolo ilimi lo sihili limongolio.

¹² Timongolio helo pomahula mola tunggudu limongolio ode huta wau tutuu-ngguduwalo boito lobolio̒ lowali tulidu. Bo tunggudu lei Haruna helo loloolao̒ tunggudu limongolio.

¹³ Eleponu odito ti olongia debo baa̒ngiyolo wau diila mohuto momandungi loi̒ya lei Musa wolei Haruna, debo odelo u matilahuda lo Eeya.

Masiri ilodungga lobaala Taluhu lowali duhu

¹⁴ Lapatao̒ Eeya lotahuda odelei Musa, “Olongia boito baa̒ngiyolo daa̒; tio debo diila mohuto mongohi bangusa lo Isirai̒lu monao̒.

¹⁵ Sababu uito ponao̒lo mola modunggaya wolio didimodupo, tou̒ tio mamolaahe ode Dutulaa Nil. Deloa mao̒ tunggudu u mowali mobolio̒ mowali tulidu boito wau yimai mao̒ dudunggaalio mai tobiihu dutulaa.

¹⁶ Polelea mao̒ odeli olongia boito: Eeya, Allahu Taa̒ala taulo Ibrani, talolao mai olaatia u mopo tunggulai odeli Tuani lo watotia alihu mopoluasi mao̒ umati-Lio monao̒ u moi̒baadati to Olio tohuta udatahu wau luasi udelita. Bo tunggula botia ti Tuani lo watotia diila mohuto modungohu.

¹⁷ Sababu uito, Eeya lotahuda mai odie, ‘Monto wolo u de pohutuwo-U̒ mai, yio̒ mamotota mao̒ deu̒ Wau̒lo Eeya. Wolo tunggudu botie wau̒ mamo humbadeo̒ tudu lotaluhu dutulaa, wau taluhio mamobolio̒ mowali duhu.

¹⁸ Totoo-lawaalo maamate, wau dutulaa botie mamohutodu, tilinggula bangusa lo Masiri diila mowali mongilu taluhio.’ ”

¹⁹ Eeya lotahuda odelei Musa, “Ahulilo mao̒ tei Haruna mohama tunggudio wau momintaa̒a mola odeitaato lo ngoa̒amila dutulaa, wau u polibaya lo taluhu, kukuu-lamuwalo to Masiri. Taluhio mamowali duhu, wau to ngoilanggubu lipu mawoluo mai duhu, tumbao̒ todelomo dodoo-lomuwaalo ayu wau totoo-mbeyaalo botu.”

²⁰ Tei Musa wolei Haruna helohutu mao̒ wolo u pilomalenta lo Eeya. Totalu li olongia wau mongo pogaweelio, tei Haruna lomintaa̒a mola tunggudio wau lohumbadeo̒ taluhu lo Dutulaa Nil, yi taluhio lobolia̒i lowali duhu.

²¹ Totoo-lawaalo todelomo dutulaa boito yilate wau boolio mohutode daa̒, tilinggula taulo Masiri diila mowali mongilu taluhu boito. To ngoilanggubu huta lo Masiri oduhu.

²² Bo tahi ahalia sihili lo Masiri helohutu odito olo wolo ilimi losihili limongolio, tilinggula ti olongia debo baa̒ngiyolo. Debo odelo u matilahuda mao̒ lo Eeya, ti olongia diila mohuto modungohe olei Musa wolei Haruna.

²³ Tumbao̒ tio bo lohualinga mota ode bele biluloa̒ saaha li olongia lou̒ diila lomandungi penu boli ngoi̒di mao̒ ulotoduo boito.

²⁴ Ngoa̒amila taulo Masiri longau̒dee huango to ngohilayaa̒ biihu dutulaa u mololohe taluhu yilumolo, sababu taluhu dutulaa boito diila mowali yilumolo.

²⁵ Pitu hui mola lopaluto lapatio mao̒ Eeya helo laa̒nati Dutulaa Nil.