PILOTIMUA̒TA 5 - KITABI HABARI MOPIOHE

Tei Musa wolei Haruna mola lotaalua woli olongia lo Masiri

¹ Lapatao̒ tei Musa wolei Haruna lonao̒ mola lotaalua woli olongia lo Masiri wau loloi̒ya mao̒, “Odie mola palenta mai lo Eeya, Allahu Taa̒ala lo Isirai̒lu, ‘Poluasia mao̒ bangusa-U̒ monao̒ alihu timongolio mowali moi̒baadati to ola-U̒ to auhu delita.’ ”

² “Tatoonu Eeya boito?” yilintu mao̒ li olongia. “Yilongola wau̒ musi momandungi Olio wau mopoluasi mao̒ bangusa lo Isirai̒lu monao̒? Diila otaawau̒ Eeya boito, wau taulo Isirai̒lu diila wohiu̒ monao̒.”

³ Tei Musa wolei Haruna loloi̒ya mao̒, “Allahu Taa̒ala taulo Ibrani malo pobilohei batanga to olamiaatia. Polusiyalo mai amiaatia monao̒ ode auhu delita u lamingio bou̒ tolo hui ponao̒walo mola mopodewo bake ode Eeya, Allahu Taa̒ala lamiaatia. Wonu amiaatia diila mopohutu mao̒ uito, amiaatia mapatee-Lio mate-mateelo mao̒ wolo ngongoto meaalo popaatea.”

⁴ Uali olongia odelei Musa wolei Haruna, “Yilongola timongoli helohutu totau-tauwala boito momalonga kalaja limongolio? Ahulilo mao̒ mongo wato boito mokalaja!

⁵ Tau-tauwala boito jumulaalio mailaba daatalio. Wau botia timongoli motohilaa alihu timongolio mohuheli mokalaja!”

⁶ To dulahulo boito tamoo-ngimatoa bangusa lo Masiri wau mongo manduru bangusa lo Isirai̒lu loo̒tapu mao̒ palenta lonto li olongia,

⁷ “Diilalo mao̒ wohia laato to bangusa boito u pohutu botu tela. Hulilo mao̒ mota lolohu limongolio lohihilao.

⁸ Bo ahuliilo mao̒ timongolio mohutu botu tela u diila ilangi jumulaalio wolo ubohu-bohulio mai. Timongolio motohilaa bo wambao̒ motitii-lantingo; uitolo sababulio timongolio hemohungoto tulusi alihu luasiyalo monao̒ mola mopodewo bake ode Allahu Taa̒ala limongolio.

⁹ Pakusai mao̒ tau-tauwala boito mokalaja lebe tio̒opatea, alihu timongolio puusingi lo kalaja wau diilalo o wakutu modungohe totoonulalo silita u wimbulo.”

¹⁰ Mongo tamoo-ngimatoa bangusa lo Masiri wau mongo manduru lo Isirai̒lu boito yimualao̒ tulusi loloi̒ya mao̒ ode tau-tauwalo Isirai̒lu, “Ti olongia lomalentai alihu timongoli diilalo pei̒wohilio laato.

¹¹ Musi timongoli lohihilao tamololoheo̒ to utoonulalo mao̒, bo eelai, botu tela u pohutuo limongoli, diila mowali ilangi wolo ubohu-bohulio mai.”

¹² Yi malonao̒lo taulo Isirai̒lu lolontale ngoilanggubu huta lo Masiri helo himoa̒a laato.

¹³ Mongo tamoo-ngimatoa hemohuntula tulusi alihu timii̒du dulahu timongolio moo̒tapu mai botu tela u tutuuwauwa daatalio debo odelo tou̒ timongolio heilohiyalio laato.

¹⁴ Mongo tamoo-ngimatoa boito helomate mongo manduru lo Isirai̒lu tailohiyalio tuugasi mongimato kalaja. Timongolio helohintu mao̒, “Yilongola bangusamu botia diila moo̒wohi mai tilapulo botu tela u tutuuwauwa daatalio debo odelo ubohu-bohulio mai?”

¹⁵ Lapatao̒ mongo manduru lo Isirai̒lu malonao̒ mota lotaalua woli olongia wau helo hinggile mao̒, “Yilongola ti olongia helohutu olamiaatia odie?

¹⁶ Amiaatia diila yilohiyalo laato, bo hepila kusaalio mohutu botu tela wambao̒! Botia amiaatia hepilatelio lebe-lebe pomao̒ mongo pogawee li olongia wambao̒ tao̒totala!”

¹⁷ Ti Olongia lolametao̒, “Timongoli memangi lantingalo wau diila mohuto mokalaja. Uitolo sababulio timongoli mei̒ poluasi olau̒ u monao̒ mopodewo bake ode Eeyaamu.

¹⁸ Ponao̒lo muli pokalaja. Laato diila tawohiu̒ olemu, bo timongoli debo musi mohutu mao̒ botu tela u tutuuwauwa daatalio debo odelo ubohu-bohulio mai.”

¹⁹ Mongo manduru boito malongalati deu̒ timongolio todelomo ileepita tou̒ pilolelealio mao̒ deu̒ taulo Isirai̒lu musi moo̒wohi mao̒ tilapula botu tela u debo tutuuwauwa daatalio debo odelo bohu-bohulio mai

²⁰ Tou̒ timongolio yilumualao̒ lonto bele biluloa̒ saaha li olongia, timongolio lodunggaya wolei Musa wau lei Haruna tadonggo hemohima olimongolio.

²¹ Ualo mongo manduru boito, “Otaawa lo Eeya huhutumu! Tio mamo hukumani mai olimongoli! Timongoliilo taloo̒ sababu olamiaatia yilonuo̒ li olongia wolo mongo pogaweelio, tilinggula timongolio ohilaa momate olamiaatia mate-mateelo mao̒.”

Tei Musa helo hinggile ode Eeya

²² Lapatao̒ tei Musa luli lotaalua wolo Eeya wau loloi̒ya, “Yaa Eeya, yilongola bangusa lo Isirai̒lu hepilohutu mai lo Eeya odito leetio boito? Yilongola Eeya longutusi mai watotia odia mai?

²³ Tumulalo mai watotia helotaalua woli olongia wau lobisala to tanggulo Eeya, yi tio malo lumulo helo ngalinaya bangusa botie. Wau Eeya diila helohutu wolo-wolo u motulungi mao̒ olimongolio.”

²⁴ Lapatao̒ Eeya lotahuda mai odelei Musa, “Botia yio̒ mamoo̒onto woloolo mola Wau̒ mopohutu mao̒ toli olongia. Tio mapakusa-U̒ molopata bangusa-U̒. Tutuulio tutu, tio mapakusa-U̒ mopolahi mao̒ olimongolio monto lipu botie.”