PILOTIMUA̒TA 38 - KITABI HABARI MOPIOHE

Mohutu mesba duo̒lo bake yilalango

¹ Tei Bejaleel lohama mao̒ ayu aakasia, lapatao̒ pilohutulio mesba duo̒lo bake yilaalango. Mesba boito moodelilio hitutu-tutuwa, hayai̒o wau tanggalio tinggai dulo koma dulo meeteri, wau langgatio tuwau koma tolo meeteri.

² Totimii̒du tutu toitaatio pilohutua tunge umowali tuwau wolo mesba boito. Ngoa̒amilalo yilolude wolo polunggu.

³ Pilohutulio olo uu̒u-longawalo, sikopu, mamaa-nggowaalo, tutuu-nggoo̒walo wau tambati lotulu. Ngoa̒amila powimumuto boito pilohutu polunggu.

⁴ Pilohutulio kawa hilalamo lonto polunggu u pilolibudio wimbihu walungo lomesba, langgatio bo ngoputu lonto langgato mesba.

⁵ Lapatao̒ pilohutulio mao̒ pateda mohelu wopato wolo ayu pomulihelo to opato tutu lowalungio.

⁶ Ayu pomulihelo boito pilohutulio lonto ayu aakasia u yilolude wolo polunggu.

⁷ Lapatao̒ ayu pomulihelo mohelu duluo boito pilo tuwotio ode delomo papaa-tedawaalo to oluo biihu mesba boito. Mesba boito pilohutulio lonto dupi wau wimbihu delomio ohuwango.

Mohutu baki polunggu

⁸ Tei Bejaleel lohutu mao̒ baki polunggu wolo wumbatio polunggu. Polunggu boito lonto yiyii-nggiluwalo haku lo mongobua tahipo hintawa tohuhebu Kema lo Eeya.

Palepelo Kema lo Eeya

⁹ Tei Bejaleel lomala mao̒ palepelo Kema lo Eeya wolo layahu lonto kaingi lenani moa̒aluti. Towimbihu huliaalio, hayai̒o wopato pulaa pato meeteri,

¹⁰ tilahangia lo wolihi polunggu dulopulu, tinggai todelomo wumbato polunggu, wolo kaito wau abitio lonto talaa̒.

¹¹ To ambahu tilayo pilohutu debo odelo odito olo.

¹² To ambahu otolopa pilohulialio layahu ngohayao̒ dulopulaa dulo meeteri, wolo wolihi mopulu wau mopulu wumbato; kaito wau pohumbutio pilohutu lonto talaa̒.

¹³ To ambahu tiimuru, uwoluo huhebulio tanggalo layahio olo dulopulaa dulo meeteri,

^14-15 To oloihi wau olowala lohuhebu boito pilo hulialio layahu hayai̒o tinggai wolomo koma wolomo meeteri, wolo wolihi totolu wau wumbato totolu.

¹⁶ Ngoa̒amila layahu topalito palepelo boito pilohutu lonto kaingi lineni moa̒aluti.

¹⁷ Wumbato wowoo-lihilio pilohutu monto polunggu, hiambola kaito, wumbutio wau bolitutuo̒ wolihilio pilohutu monto talaa̒. Ngoa̒amila wolihi totili lo palepelo boito pilopo wumbuto tuwau ode uwewo wolo abito talaa̒.

¹⁸ Podehu lohuhebu hulubangi lo palepelo boito pilohutu monto lineni moa̒aluti u hiliyalo wolo lambuto himba wahuente, lailowumu wau meela wau piloromu wolo karawo. Hayai̒o tio lomeeteri wau langgatio dulo meeteri, tuutuuwauwa wolo layahu lo palepelo.

¹⁹ Kaingi lohuhebu boito tilahangia lo wolihi wopato wolo wumbato polunggu wopato. Ngoa̒amila kaito, tau̒bu balitutui̒o wau abitio pilohutu monto talaa̒,

²⁰ bo papaa-too̒walo duo̒lo Kema wau duo̒lo balaalio pilohutu lonto polunggu.

Logamu upilomake todelomo Kema lo Eeya

²¹ Uti-utieelo daputali lo logamu upilomake todelomo Kema lo Eeya, tambati lobotu dulopita wolo Opulu Palenta lo Allahu Taa̒ala boito tilahu. Daputali boito pilohutu topalenta lei Musa wau siluusungi lotau-tauwalo Lewi tahipo kalajawa to tau̒wa lei Itamar, walai̒ Iimamu Haruna.

²² Tei Bejaleel walae̒e Uri, wombu lei Hur lonto suku Yehuda, lohutu mao̒ totoonulalo upilo malenta lo Eeya.

²³ Tamoomantua olio tei Aholiab walae̒e Ahisamakh lonto suku Dan, deu̒yito-yito ngotaalio lo tamoo-ngukilia, tamoo-lanjanawa wau tamoo-hiyolo kaingi lineni moa̒aluti, wau lambuto himba wahue̒nte u moa̒aluti, lailuwumu wau meela.

²⁴ Hulawa u pilopodewo ode Eeya duo̒lo Kema Mantali ngoa̒amilalo ngojumula ngolihu lokilo, tonggadulo moduduo̒ titimenga upohu-pohutu to Kema lo Eeya.

²⁵ Talaa̒ uilotapu monto daputali jumulaa ulipu bangusa lo Isirai̒lu ngojumula tololihu wopato hetuto tolopulu lokilo tonggadulo moduduo̒ titimenga upohu-pohutu to Kema lo Eeya.

²⁶ Jumula boito tuutuuwauwa lou̒ wolo u pilomayali lo ngoa̒amila taa ulei daputali todelomo daputali jumulaa ulipu boito. Timii̒du tau momaayali mao̒ halaga u tilantulio, tonggadulo moduduo̒ titimenga upohu-pohutu. Todelomo daputali jumulaa ulipu boito leidaputali wolomo hetuto tololihu wau limo lohetuto limo lopulu mongo lolai̒ tao̒ umulu dulopulu lotaunu deitaato.

²⁷ Lonto talaa̒ boito tololihu wopato hetuto kilo pomake u mohutu ngohetuto wumbato wolihi Kema lo Eeya wau kaingi huhebulio. Timii̒du wumbatio buheetio tolo pulaa wopato kilo.

²⁸ Lonto labito talaa̒ boito ngojumula tolopulu lokilo, tei Bejaleel helohutu popoo-humbutowalo wau kakaai-towaalo ode wowoo-lihilio, wau tau̒bu balitutuo̒ lo wowoo-lihiyaalo boito.

²⁹ Porunggu u podewolo ode Eeya ngoa̒amilalo ngojumula dulolihu wopato hetuto dulo pulaa limo lokilo.

³⁰ Porunggu boito pomake u mohutu wumbato huhebu Kema lo Eeya, mesba wolo halamo kawa monto polunggu, ngoa̒amilalo powimumuto mesba,

³¹ wumbato layahu topalito palepelo wau huhebu hulubangilio, ngoa̒amila patoo̒ Kema wau topalitio palepelo.