PILOTIMUA̒TA 36 - KITABI HABARI MOPIOHE

¹ Tei Bejaleel, Aholiab, wau ngoa̒amila taa u loo̒tapu oa̒ahali lonto Eeya, motota lo pohuli mohutu totoonulalo u palaluwolo u momangu Kema lo Eeya. Timongolio musi mohutu totoonulalo mao̒ debo odelo u mapilo malenta lo Eeya.”

Bangusa lo Isirai̒lu longohi dembulo dadaata

² Tei Musa lotiangao̒ olei Bejaleel Aholiab wau ngoa̒amila taa u loo̒tapu oa̒ahali lonto Eeya wau ta iloheela lohilao hilaa momantu, lapatao̒ lopoa̒hu olimongolio lolumulao̒.

³ Tei Musa longohi mao̒ olimongolio totoonulalo u podembulo taulo Isirai̒lu duo̒lo kalaja momangu Kema lo Eeya. Bo bangusa lo Isirai̒lu donggo tulusi wambai̒o hemodelo mai dewo odelei Musa timi-timii̒du dumodupo.

⁴ Lapatao̒ tahi osiipatia moo̒olohu tadonggo hemo ponao̒ kalaja boito

⁵ lopoduloheo̒ odelei Musa, “Babaa-haniyaalo u pilodembulo tau-tauwala boito malebe-lebe lou̒ palaluwolo duo̒lo kalaja u pilopo tuugasi mai lo Eeya.”

⁶ Oo̒dito tei Musa malopo malalumu lomola to ngoilanggubu lo pilokemawa deu̒ malo tuu̒udelo dembulo duo̒lo Kema lo Eeya; oditolio tau-tauwalo diilalo modelo wolo-wolo poli.

⁷ Babaa-haniyaalo u mapilo dembulo limongolio lebe lou̒ tutuuu̒de huna mopoo̒ lapato ngoa̒amila kalaja boito.

Tahi osiipatia moo̒olohu helohutu Kema lo Eeya

⁸ Lapatao̒ taa̒ahali daa̒ towolota tahi osiipatia moo̒olohu boito lohutu Kema lo Eeya. Kema boito pilohutu limongolio lonto kaingi lineni moa̒aluti mopuulo pita u hilewo wolo lambuto himba wahue̒nte, lailowumu wau meela, lapatao̒ kilarawo wolo gambali malaikati opolipio̒.

⁹ Timii̒du ngopata tutuuwauwa tuu̒dio; hayai̒o mopulaa limo lomeeteri wau tanggalio dulo meeteri.

¹⁰ Kaingi limo lopata powumbutolo mowali ngolayahu, wau limo lopata uwewolio pohutuwolo odito olo.

¹¹ Tobiihu lolayahu duuduluo pohutuwolo abito monto kaingi wahue̒nte,

¹² limo lopulu abito ngotii̒du layahu, tunggula debo odelo ngopange.

¹³ Lapatao̒ pilohutulio limo lopulu kaito hulawa u mopotuwau layahu dulopata boito.

¹⁴ Lapatao̒ timongolio lohutu watopo Kema boito lonto kaingi mopulaa tuwau lopata lonto lambuto batade.

¹⁵ Timii̒du ngopata tuu̒dio, hayai̒o mopulaa tolo meeteri wau tanggalio dulo meeteri.

¹⁶ Limo lopata powumbutolo mowali ngolayahu, wau wolomo pata wewolio pohutua mao̒ odito olo.

¹⁷ Limo lopulu abito pilopohuli tobiihu layahu ubohulio wau limo lopulu abito tobiihu layahu u oluolio.

¹⁸ Lapatao̒ pohutuwolo limo lopulu kaito monto polunggu u mopotuwau layahu mohelu duluo boito mowali watopo Kema.

¹⁹ Lapatao̒ uito pohutuwolo tau̒bu mohelu duluo uolo wimbihu Kema, tuwau monto walito himba ulai̒ u pilopo weela, wau uwewo monto walito u moa̒aluti.

²⁰ Lapatao̒ timongolio mohutu tutuu-lalowaalo Kema utihu-tihulo motulidu lonto ayu aakasia.

²¹ Motii̒du tulalo langgatio wopato meeteri tanggalio wolomo pulu wau wolomo senti.

²² To motii̒du tulalo pohutuwolo patoo̒ mohelu duluo u ngopange, tilunggula totoonulalo tutuu-lolawaalo boito mowali wumbatalo u tuwau wolo uwewo.

²³ To wimbihu huliaalio lo Kema pohutuwolo dulopulu tulalo,

²⁴ wolo wopato pulu wumbatio monto talaa̒, duluo towalungo lomotii̒du tulalo duo̒lo patoi̒o mohelu duluo.

²⁵ Towimbihu tilayo lo Kema pohutuwolo dulo pulu tulalo,

²⁶ wolo wopato pulu wumbatio monto talaa̒, duluo towalungo lotimii̒du tulalo.

²⁷ To dibalaka lo Kema towimbihu otolopa, pohutuwolo tulalo mohelu wolomo,

²⁸ wau duluo tulalo duo̒lo tutulio.

²⁹ Tutuu-lalowaalo tutulio boito powumbutolo to oa̒atio tulusi demola wimbihu yitaatio. Oluo lo tulalo u mopomoodeli tutulio pohutuwolo wolo pohuli boito.

³⁰ Oditolio ngoa̒amilalo woluo mohelu walu tulalo wolo mopulaa wolomo wumbuto talaa̒, duluo towalungo motii̒du tulalo.

³¹ Lapatao̒ timongolio lohutu mao̒ mopulaa limo ayu bulawahu lonto ayu aakasia, limo ode tutuu-lalowaalo tobiihio tuwau lo Kema,

³² limo ode biihio uwewo, wau limo poli uolo dibalaka lo Kema towimbihu otolopa.

³³ Ayu bulawahu u tohuungio, pohuliyolo ngoilanggato ngotayadu tulalo, monto huudo ode huudo lo Kema boito.

³⁴ Tulalo Kema wau ayu bulawahu boito woludelo wolo hulawa, lapatao̒ pohuliyolo pateda hulawa u molahangi aa̒a-yuwaalo boito.

³⁵ Timongolio olo mohutu kaingi lohuhebu monto lineni moa̒aluti u hilewo wolo lambuto himba wahuente, lailowumu wau meela, lapatao̒ kalawowalo wolo gambali malai̒kati opolipio̒.

³⁶ U pontayangalo kaingi boito pohutuwolo wopato wolihi monto ayu aakasia u owoludee hulawa wolo kaito hulawa wau pohuliyolo toitaato wopato wumbato talaa̒.

³⁷ Lapatao̒ pohutuwolo mao̒ podehu ode huhebu Kema monto lineni moa̒aluti u hilewo wolo lambuto himba wahue̒nte, lailowumu wau meela wau pilolomu wolo kalawo.

³⁸ Uolo kaingi lohuhebu boito pohutuwolo wolihi mohelu limo u powumbutolo wolo kakaai-towaalo. Huhuu-duwaalo wau popoo-humbutowalo lo wolihi mohelu limo boito woludelo wolo hulawa, hiambola olimo wumbatio pohutuwolo monto polunggu.