PILOTIMUA̒TA 35 - KITABI HABARI MOPIOHE

Wuu̒du pasali lodulahu Saabati

¹ Tei Musa longambu mai ngoilanggubu bangusa lo Isirai̒lu lapatao̒ loloi̒ya mao̒ ode limongolio, “Uti-utieelo palenta lo Eeya ode olimongoli:

² Woluo wolomohui mola u mokalaja, bo dulahu u opitulio yi todulahee u pohuheliyalo, dulahu buka u pilohetu mai uolo Eeya. Tatoonu tamo kalaja todulahu Saabati musi hukuu-maniyolo mate.

³ Todulahu boito timongolio diila mowali mopolai̒to tulu tobele limongolio.”

Dewo Duo̒lo Kema lo Eeya

⁴ Tei Musa loloi̒ya mao̒ ode ngoilanggubu bangusa lo Isirai̒lu, “Odie mola palenta lo Eeya:

⁵ Delowa mao̒ dewo ode Eeya. Tatoonu tai̒lu moliyoo̒ hilaalio, musi mopodewo mao̒ hulawa, talaa̒, wau polunggu;

⁶ kaingi lineni moa̒aluti, kaingi lambuto binatangi u moa̒aluti wahue̒nte, lailowumu wau meela; kaingi lonto lambuto batade;

⁷ walito himba ulai̒ upilopo weela; walito moa̒aluti, ayu aakasia,

⁸ winulo uolo tohe; ramba-ramba uolo winulo upacala wau uolo totabu umoonu;

⁹ poliyoto dalima wau poliyoto wewo u atuluwolo toboo̒ li iimamu wau tau̒bu lo duhelo li Iimamu Daa̒.”

Pakaa-kasiyalo duo̒lo Kema lo Eeya

¹⁰ “Ngoa̒amila taa osiipati moo̒olohu taa̒hali towolota limongoli musi monao̒ mai mohutu totoonulalo upilo malenta lo Eeya, deu̒yito-yito:

¹¹ Kema, watopo wau tau̒bio, kaito wau tutuu-lalolio, aa̒a-yuwaalo bulawahu wolihi lohuhebu wau wumbatio;

¹² Bulua Daantia wolo ayu pohulihelio, tau̒bio wau kaingi pomeleu̒tio;

¹³ meja wolo ayu pohulihelio; ngoa̒amila powimumutio wau roti pohinta

¹⁴ oa̒ato tohe duo̒lo potilango wolo powimumutio, tohe wolo winulio

¹⁵ mesba tambati pomobuwalo dupa wolo ayu pohulihelio, winulo upacala, dupa umoonu; podehu uolo huhebu lo Kema,

¹⁶ mesba uolo bake yilalango wolo talali lo polunggu, ayu pohulihelo wolo ngoa̒amila powimumutio; baki tambati pomuboa̒lo wolo wumbatio,

¹⁷ lalaa-yahuwaalo uolo palepelio, wowoo-lihiyaalo wolo wumbatio, podehu lohuhebu hulubangi lo palepelo,

¹⁸ papaa-too̒waalo wau tataa-liyaalo uolo Kema wau uolo palepelio;

¹⁹ pakeyangi lo ibaadati uolo mongo iimamu tou̒ timongolio otuugasi to Huwali Leidaa̒ Mantali wau tolomodu pakeyangi uoli iimamu Haruna wau mongo walai̒o.”

Bangusa lo Isirai̒lu helodelo dewo limongolio

²⁰ Lapatao̒ ngoa̒amila taulo Isirai̒lu tahia̒mbua boito longoa̒lo huhuloa̒,

²¹ wau tatoonu wambai̒o talo oliyoo̒ hilaalio, modelo mota dewo ode Eeya u mowimumutao̒ Kema lo Eeya. Timongolio olo lodelo mota ngoa̒amila u palaluwolo uolo ibaadati wau baahani uolo pakeyangi li iimamu.

²² Tatoonu wambai̒o tamohuto, mopio talolai̒ meaalo taabua, modelo pake alumbeneti, ante-ante, hua̒limo, lante, wau totoonulalo hidala-dalaala pake hulawa u podewolo ode Eeya.

²³ Timii̒du taa okaingi lineni moa̒aluti, kaingi lambuto himba wahuente, lailowumu meaalo meela, kaingi lolambuto batade, walito himba ulai̒ u pilopo weela, meaalo walito moa̒aluti, mopodewo mao̒ balangi boito.

²⁴ Timi̒du taa umowali mopo sadaka talaa̒ wau polunggu, deloolio mota ode Eeya. Odito olo pohutuo lotau-tauwalo tadiila o ayu aakasia duo̒lo kalaja boito.

²⁵ Mongobua tamotota momitolo modelo mao̒ bola lineni moa̒aluti wau bola lambuto himba u moa̒aluti wahue̒nte, lailowumu wau meela umaa pilohutu limongolio.

²⁶ Timongolio olo momitolo bola monto lambuto batade.

²⁷ Mongo tau̒wa modelo mota poliyoto dalima wau popoo-liyotowalo wewo u ilaatulu toboo̒ li iimamu wau tau̒bu duhelo.

²⁸ Timongolio olo modelo mota ramba-ramba wau winulo uolo tohe, winulo upacala wau dupa umoonu.

²⁹ Ngoa̒amila taulo Isirai̒lu wolo iloheela lohilao lodelo mota dewo limongolio ode Eeya duo̒lo kalaja upilo malenta lo Eeya loli olei Musa.

Tahi osiipatia moo̒olohu tatiluu-gasia momangu Kema lo Eeya

³⁰ Lapatao̒ tei Musa loloi̒ya mao̒ ode taulo Isirai̒lu, “Eeya malo lulaoto olei Bejaleel walae̒e Uri, wombu lei Hur, lonto suku Yehuda,

³¹ wau longohi mao̒ olio wolo kawasaa-Lio. Allahu Taa̒ala longohi mao̒ huhama olio, motoloo̒ wau omambo todelomo totoonulalo hidala-dalaala ilomata seni,

³² u mohutu lanjana u momalalu taa̒ahali, wau mokalaja mao̒ wolo hulawa, talaa̒ wau polunggu;

³³ u modumbatao̒ botu poliyoto umaa atuluwolo; u momaisaka ayu wau duo̒lo totoonulalo hidala-dalala ilomata seni wewolio.

³⁴ To olei Bejaleel wau Aholiab, walae̒e Ahisamakh lonto suku Dan, Eeya longohi pongotota u mongaajali mao̒ oa̒ahali limongolio ode taawewo.

³⁵ Timongolio yilohia pongotota todelomo totoonulalo kalaja hidala-dalaala upilohutu lo taa̒ahali momaahati, tamoo-lanjanawa wau ahali mohewo lineni moa̒aluti, lambuto himba wahue̒nte, lailowumu wau meela, wau kaingi wewo. Timongolio yito tamoo-lanjanawa ahali wau mowali mohutu totoonulalo kalaja hidala-dalaala.