PILOTIMUA̒TA 34 - KITABI HABARI MOPIOHE

Duluo botulei ubohu

¹ Lapatao̒ Eeya lotahuda odelei Musa, “Pahatia mao̒ dulopita botu odelo u muloololio mai. Tobotu boito Wau̒ mamo luladei tataa-heyaalo u tutuuwauwa wolo uwoluo tobotu u mapiloo̒mu boito.

² Potidapa-dapotolo loombu dumodupo u motao̒de Hui̒dee Sinai wau mola motaalua wola-U̒ to balitutuo̒ hui̒du boito.

³ Diaaluo penu boli ngotaa mao̒ tamowali moduduo̒ wolemu meaalo woluo penu boli towimbihu toonu lohui̒du boito. Sasaa-piyaalo wau hihii-mbawaalo diila mao̒ polulia mongaa huo̒yoto tobungo lohui̒du boito.”

⁴ Lapatao̒ tei Musa lomaisaka mao̒ botu dulopita poli, wau loloombulio mola didimodupo daa̒ dilelolio mola lotao̒de Hui̒dee Sinai odelo upilo malenta mai lo Eeya olio.

⁵ Oo̒dito malolaahei Eeya todelomo heenga tuwau; Tio tilimihulo wolei Musa totambati boito, wau lohulitao̒ tanggu-Lio umantali, yito Eeya.

⁶ Lapatao̒ Eeya yilumaodeo̒ totalu lei Musa wau lotahuda mao̒, “Wau̒ Eeya, deu̒yito-yito Allahu Taa̒ala tapolu-polu lo omuura lohilao wau odehu lohilao. Ponu-U̒ lepa-lepato dadaata daa̒, Wau̒ tatapu wau molotolo hilao wau diila hua̒a moingo.

⁷ Wau̒ tatapu momonu to hilihu-lihua wali wau mongambungu totala wau dusa; bo taa ototala sama-samaata diila lopato-U̒ monto hukuu-manilio, wau hukuu-maniyo-U̒ olo tau̒kekeei̒ wau mongo wombu tunggula wali u otolulio wau opatio kalana dusa lomongo dulaa̒ limongolio.”

⁸ Saaa̒tilo boito tei Musa losujudu lolubo.

⁹ Ualio mao̒, “Eeya, wonu Eeya tio̒otutua motuuu̒de wolaatia, watia momolohone, ambunguolo Eeya moduduo̒ wolamiaatia. Bangusa boito memangi baa̒ngiyolo, bo ambungua mao̒ ololeeto wau dusa limongolio wau tolimoa mao̒ amiaatia odelo umati lo Eeya lohihilao.”

Daantia pilopobohu

¹⁰ Tahuda lo Eeya odelei Musa, “Botia Wau̒ mohutu mai daantia wolo bangusa Isirai̒lu. Totalu lomato limongolio Wau̒ mamohutu totoonulalo moo̒linggolabu udiipo pee̒enta mao̒ pilohutu-U̒ penu boli tou̒toonu todunia botie. Ngoa̒amila bangusa mamoo̒onto totoonulalo moo̒linggolabe u pohutuwo-U̒ boito, sababu Wau̒, Eeya mamohutu hitua-tuawua upolu-polutuo̒ uilohi-U̒ ode limongoli.

¹¹ Dungohilo bubuu-too̒o-U̒ olimongoli todulahee botie. Wau̒ mopolahi mao̒ bangusa lo Amori, Kanaa̒n, Het, Peris, Hewi wau Yebus tou̒ timongoli momaju mota.

¹² Diila mao̒ podaantia wolo tau-tauwala tolipu unao̒o mola limongoli, sababu sua̒li boito bo mowali hentobu umoo̒ sababu mautu olemu.

¹³ Oditolio, diila mao̒ pohutu odito, bo lolohubua mao̒ memees-bawaalo limongolio, antulua mao̒ tutuu-guwaalo aulia limongolio wau luode mao̒ wowoo-lihiyaalo Asyera, balaahala limongolio.

¹⁴ Diila mao̒ polubo ila wewo, sababu Wau̒ Eeya, deu̒yito-yito Allahu Taa̒ala tadiila motohilaa potutuu-wauwolo penu boli loolo.

¹⁵ Diila mao̒ pohutu daantia wolo bangusa tolipu boito, sababu tou̒ timongolio molubo wau mopodewo mao̒ bake ode ila-ila limongolio, timongolio mamo heinga olimongoli, wau timongoli mamo dudua̒a olo.

¹⁶ Wonu mongo walau̒mu monika wolo mongobua deli, timongolio mapaaluto lo mongobua boito u mololaa mao̒ ola-U̒ wau molubo ila-ila limongolio.

¹⁷ Diila mao̒ pohutu wau molubo ila-ila lo logamu.

¹⁸ Polamea mao̒ potihunggu lo Roti Diila Oragi. Debo odelo mapilo malenta-U̒ mai olemu, timongoli musi molamelao̒ roti udiila oragi ngotilonggadu pituhui mola todelomo hulalo Abib, sababu tohulalo boito timongoli lololaa mao̒ Masiri.

¹⁹ Timii̒du walao̒ talolai̒ tamo huhula daa̒ wau binatangi ulai̒ ubohulo pilotutu mai yito hakuu-U̒,

²⁰ bo timongoli musi motolotao̒ walao̒ kolodai ubohulo pilotutu mai wolo mopodewo mao̒ walao̒ himba tuwau odelo tuloi̒o. Wonu timongoli diila mohuto motolotao̒, buloo̒ lokolodai boito musi bolia mao̒ limongoli. Timii̒du walau̒mu talolai̒ tamohuhula daa̒ musi tolota mao̒ limongoli. Diaaluo penu boli ngotaa mao̒ tamowali monao̒ mai ode ola-U̒ wonu diila modelo mai podewo.

²¹ Wolomo hui mola u mokalaja; diila mao̒ pokalaja todulahee opitulio, eleponu uito tosembo lo momadeo̒ meaalo sembo lou̒ mongotolo.

²² Polamea mao̒ Potihunggu Pongotolalo tou̒ timongoli molumula mongotolo tilapulo bohulio lopale. Polamea mao̒ olo Potihunggu Wombohe Duungo topulito taunu, tou̒ timongoli molipu huhuu-ngowaalo.

²³ Poo̒otolu ngotaunu ngoa̒amila mongo lolai̒ musi monao̒ mai molubo ola-U̒, Eeya Allahu Taa̒ala lo Isirai̒lu.

²⁴ Lapatao̒ Wau̒ helo polahi babaa-ngusawalo lonto talumu wau pilopo tanggalu-U̒ madalamu, diaaluo penu boli ngotaa mao̒ tamaa buheli mohehu lipumu tou̒ timongoli monao̒ u mopolame Potihunggu lo Roti Diila Oragi. Potihunggu Pongotolalo wau Potihunggu Wombohe Duungo.

²⁵ Tou̒ timongoli mopodewo mao̒ bibiahu iloloto, diila mao̒ podewowa wolo-wolo u pilohutu mao̒ lomake ragi. Bibiahu u iloloto duo̒lo bake lo lameyangi Paska musi poo̒pulitolo tohui boito olo; diila mowali olabita tunggula loombulio mola.

²⁶ Timii̒du taunu timongoli musi modelo mota ode Bele lo Eeya Allahu Taa̒ala limongoli tilapulo u bohulio monto hutamu. Tapu lowalao̒ himba meaalo walao̒ batade diila mowali tubuwolo wolo susu liilolio.”

²⁷ Tahuda mao̒ lo Eeya odelei Musa, “Tuladee mao̒ tataa-heyaalo boito, sababu patopatoa̒ toloi̒ya boito Wau̒ mohutu mai daantia wolemu wau wolo bangusa lo Isirai̒lu.”

²⁸ Wopato puluhui wau dulahu tei Musa lotitolaa teto pee̒-pee̒enta wolo Eeya, wau ngotilonggadu uito tio diila lolamela wau diila longilu. Tataa-heyaalo daantia boito, deu̒yito-yito Mopulu Palenta Allahu Taa̒ala, tiluladio mao̒ topitango botu.

Tei Musa lotuhuta mola lonto Hui̒dee Sinai

²⁹ Tou̒ tei Musa lotuhutai lonto Hui̒dee Sinai lodelo mai Mopulu lo Palenta boito, bayalio motinelo sababu tio malo bisala wolo Eeya, bo tei Musa lohihilao diila motota deu̒ bayalio otinelo.

³⁰ Tei Haruna wau ngoa̒amila ulipu loo̒onto deu̒ baya lei Musa otinelo wau timongolio moohe mohimbede mota olio.

³¹ Bo tei Musa malo tiangai olimongolio, yi tei Haruna wau ngoa̒amila tau̒wa limongolio lohimbideo̒ olio, wau tei Musa lobisala olimongolio.

³² Lapatao̒ uito ngoa̒amilalo ulipu lo Isirai̒lu lotia̒mbu mai lomalitao̒ olio, wau to olimongolio ngoa̒amila tei Musa lopo tunggulao̒ ngoa̒amila butoo̒ uilohi mai lo Eeya olio toitaato Hui̒dee Sinai.

³³ Lapatio mao̒ lobisala woli mongolio, tei Musa lolanggu bayalio wolo kaingi.

³⁴ Timii̒du tei Musa tumuwotao̒ ode delomo Kema lo Eeya u mobisala wolo Eeya, kaingi boito pileletio mola tunggula tio lumualai. Lapatio mao̒ tio lopo tunggulao̒ ode bangusa lo Isirai̒lu ngoa̒amila tahuli lo Eeya,

³⁵ wau timongolio loo̒onto baya lei Musa otinelo. Oo̒dito tilau̒belio poli bayalio tunggula wakutu u wumbutio mola wonu tio muli mobisala wolo Eeya.