PILOTIMUA̒TA 33 - KITABI HABARI MOPIOHE

Eeya lopoa̒hu bangusa lo Isirai̒lu mololaa mao̒ Hui̒dee Sinai

¹ Lapatao̒ Eeya lotahuda odelei Musa, “Tolailo mao̒ tambati boito wau ponao̒lo pee̒-pee̒enta wolo bangusa tadilelomu mai lonto Masiri boito odelipu u pilodanti-U̒ odelei Abraham, Isihaka wau Yako wau wali mai limongolio.

² Wau̒ mamolao mai malai̒kati ngota u modelo olimongoli. Wau̒ mamopolahi bangusa lo Kanaa̒n, Amori, Het, Peris, Hewi wau Yebus.

³ Timongoli motidulungo ode huta ukaya wau molomiyodu. Bo Wau̒ lohihilao diila moduduo̒ wolimongoli, alihu timongoli diila mao̒ pobinasa-U̒ tohungo dalaalo, sababu timongoli yito bangusa tabaa̒ngiyolo.”

^4-6 Lapatao̒ Eeya lopoa̒hu olei Musa loloi̒ya mao̒ ode bangusa lo Isirai̒lu, “Timongoli bangusa tabaa̒ngiyolo Humayaalio Wau̒ moduduo̒ woli mongoli penu bo ngopee̒ mola, tantu timongoli pobinasaa-U̒ sama-samaata. Lopatalo totonulalo polomu limongoli, oo̒dito wau̒ mamolantu mai wolo u mapo hutuwo-U̒ olimongoli.” Tou̒ maloo̒ dungohe didini lo Eeya boito, timongolio masiluukali daa̒ debo odelo taa ulimilimi. Lapatao̒ timongolio malo hinggi mao̒ pake limongolio. Oditolio, lapatao̒ lololaa mao̒ Hui̒dee Sinai, bangusa lo Isirai̒lu diilalo lomake pake.

Kema lo Eeya

⁷ Timii̒du, wonu bangusa lo Isirai̒lu motitikema, tei Musa mohama mao̒ kema wau mopo tihulao̒ molaminga ngopee̒ monto polokema limongolio. Kema boito iluntelio Kema lo Eeya, wau tatoonu tamohuto mohile potuhata to Eeya, ponao̒ mota odito.

⁸ Wonu tei Musa monao̒ mota ode Kema boito, tau-tauwalo Isirai̒lu timihulo totalu lohuhebu Kema limongolio wau mopoo̒ tuotao̒ olei Musa tunggula tio tumumuwotao̒.

⁹ Tou̒ tei Musa tumuwotao̒, molaahei wolihi heengo wau mohuheli tohuhebu kema. Lonto heenga boito Eeya lotahuda mai odelei Musa.

¹⁰ Tou̒ taulo Isirai̒lu loo̒onto mota wolihi heenga tohuhebu Kema lo Eeya, timongolio ngoa̒amila tilimihulo wau losujudu tohuhebu kema ngota-ngota.

¹¹ Eeya lotahuda mai odelei Musa wolo tataalua baya, debo odelo bibiisalawa wolo tamaniilio. Lapatao̒ uito tei Musi luli lohualinga mota ode kema. Bo tei Yosua walae̒e Nun, ngotaalio bohulotau tamomantua olei Musa, debo bilu-biluloa̒ todelomo kema boito.

Eeya lodanti mai mamoduo̒lo bangusaa-Lio

¹² Todulahee tuwau tei Musa loloi̒ya ode Eeya, “Eeya, Eeya lomalenta olaatia modelo mota bangusa botia ode lipu u pilodanti mai lo Eeya. Bo Eeya diila lotahuda mai tatoonu tamaa laolo lo Eeya u motulungi olaatia. Eeya, Eeya lotahuda mai deu̒ Eeya motota olaatia, wau lotuhatawa wolaatia.

¹³ Wonu odito, ambunguolo Eeya mopoo̒taa mai wolo lanjana lo Eeya, Eeya, alihu watia mowali momaya to Eeya wau debo moo̒sanangi hilaa lo Eeya. Eelailo mao̒ olo deu̒ bangusa botie matilulaoto lo Eeya lowali haku lo Eeya.”

¹⁴ Tahuda mai lo Eeya, “Timongoli maduo̒lo-U̒ alihu mowali motolohaku huta u pilodanti-U̒ mai.”

¹⁵ Tametao̒ lei Musa, “Wonu Eeya diila moduduo̒ wolamiaatia, diila mao̒ ahuli amiaatia mololaa mao̒ tambati botie.

¹⁶ Woloolo mola otaawa lotau deu̒ Eeya motuhatawa wolaatia wau wolo bangusa boito wonu Eeya diila motulungi mai olamiaatia? Owoluo lo Eeya tohuungo lamiaatia mamopo hiihede olamiaatia wolo babaa-ngusawalo wewo todunia.”

¹⁷ Tahuda mao̒ lo Eeya odelei Musa, “Hihiilemu madungohe-U̒, sababu Wau̒ moo̒nuhe olemu wau Wau̒ motuhatawa olemu.”

¹⁸ Lapatao̒ tei Musa lomalohone mao̒, “Eeya pobilohe mai tinelo owoluo lo Eeya.”

¹⁹ Tametao̒ lo Eeya. “Wau̒ malumaodeo̒ wolo totoonulalo odudaa̒a-U̒ totalumu, sambela mohulitao̒ tanggulu-U̒ umantali. Wau̒lo Eeya, wau Wau̒ mopo bilohei omuura lohilao wau odehu lohilao totau-tauwala tatilulaotu-U̒.

²⁰ Baya-U̒ diila tapo bilohu-U̒ olemu, sababu diila pongalo aakali tau moo̒onto ola-U̒, wau debo tumu-tumulo.

²¹ Tongotuali-U̒ botie woluo huludu botu; yio̒ mowali timihulo teto.

²² Tou̒ tinela owoluwo-U̒ lumaodeo̒, yio̒ potuwoto-U̒ mao̒ ode delomo hiyango tuwau todelomo huludu botu boito wau tau̒be-U̒ mao̒ lo oluu̒u-U̒ tunggula Wau̒ mailumaodeo̒.

²³ Lapatao̒ mabantanga-U̒ mai oluu̒u-U̒ alihu yio̒ mowali moo̒onto ola-U̒ monto wulea, bo baya-U̒ diila tao̒ontongamu.”