PILOTIMUA̒TA 32 - KITABI HABARI MOPIOHE

Sapi hulawa

¹ Tou̒ bangusa lo Isirai̒lu loo̒onto deu̒ Tei Musa lohiheo daa̒ diila lotuhutai lonto hui̒du, bo debo donggo teto mola olo, timongolio helo tia̒mbu mai odelei Haruna wau malo loi̒ya olio, “Diila otaawanto wolo ulowali to olei Musa, taa u malodelo mai olanto yilumualai lonto Masiri; oditolio pohutua mai olami ila umodelo olami.”

² Lapatao̒ tei Haruna loloi̒ya mao̒ ode limongolio, “Yinggila mao̒ ante-ante hulawa upake-pake tomongo dilemu wau mongo walau̒mu, wau deloa mai ode olau̒.”

³ Yi timongolio malo hinggi mao̒ ngota-ngota ante-ante hulawa wau helo delo mai uito odelei Haruna.

⁴ Tei Haruna lohama mao̒ ante-ante boito. Lapatao̒ pilopo didiilio wau tiluwatio mao̒ ode delomo paisaka tuwau wau pilohutulio bui̒ losapi tuwau. Bangusa boito loloi̒ya mao̒, “Wuu Isirai̒lu uti-utieelo ilaanto talo depitai olanto yilumualao̒ lonto Masiri!”

⁵ Lapatao̒ tei Haruna lopo tihulao̒ mesba tuwau totalu losapi hulawa boito wau lopo malalumu mao̒, “Loombu woluo potihunggu u mohulumati Eeya.”

⁶ Loombulio mola didimodupo daa̒, tau-tauwalo Isirai̒lu helodelo mai dengolo bibiahe duo̒lo bake yilalango wau dengolo poli duo̒lo bake lo polodame. Timongolio lotihuloa̒a lolamela wau longilu, lapatao̒ timihulo u helo tisana-sanangi.

⁷ Yi Eeya lotahuda odelei Musa, “Hua̒a potuhutolo mola, sababu bangusaamu tadilelomu mai yilumualao̒ lonto Masiri malohutu u moleeto.

⁸ Timongolio malolahi lonto papaa-lentaa-U̒. Timongolio malohutu bui̒ losapi lonto hulawa diliidi, lapatao̒ hetiluboolio wau lopodewo mao̒ bake to olio. Uali mongolio, ui-uitolo ila limongolio talodelo mai olimongolio yilumualao̒ lonto Masiri.

⁹ Otaawa-U̒ deu̒ bangusa boito baa̒ngiola daa̒.

¹⁰ Diila mao̒ pohimontala momubula ola-U̒. Wau̒ muluka olimongolio wau mapobinasaa-U̒ timongolio. Bo yio̒ wau waliimu mola mapo waliyo-U̒ bangusa udaa̒ tuwau.”

¹¹ Tei Musa malo molohone ode Eeya Allahu Taa̒alaalio, ualio mao̒, “Eeya, ambunguolo yilongola Eeya musi mohutu mao̒ odito ode limongolio? Diila maa Eeya tamalo poa̒ahu olimongolio lonto Masiri wolo okokawasa wau olootolo daa̒?

¹² Wonu Eeya mopobinasa mao̒ olimongolio, yi taulo Masiri mamoloi̒ya deu̒ Eeya lodelo bangusa boito yilumualao̒ lonto Masiri, u momate olimongolio mate-mateelo mao̒ to hihui̒-hui̒dee wau mopobinasa olimongolio sama-samaata. Ambunguola diila mao̒ odito, yaa Eeyaau̒, ambunguolo lomela mao̒ niyati lo Eeya wau ambunguola diila mao̒ potopo talawa bangusa boito.

¹³ Ambunguolo eelai mola mongo wato-Mu, tei Abraham, Isihaka wolei Yako. Ambunguola eelai mola deu̒ Eeya lodanti wolo tadia u mongohi mai olimongolio wali daatalio debo odelo poliyama tohulungo, wau olo deu̒ ngoilanggubu huta u pilodanti mai lo Eeya boito mamowali haku lo wali mola limongolio u ohiheo-hiheolo mao̒.”

¹⁴ Yi Eeya lolomelao̒ niyati-Lio wau diila lomata loponao̒ anjamu-Lio u mopo dungga mai baala ode bangusa boito.

¹⁵ Tei Musa luli lotuhuta mola lonto hui̒dee boito wau lodelo botu dulo pita u hituladee papaa-rentaalo Allahu Taa̒ala to oluo biihio.

¹⁶ Allahu Taa̒ala lohihilao malohutu botu boito wau helo maisaka mao̒ palentaa-Lio teto.

¹⁷ Tou̒ donggo hituhuta mola, tei Yosua loo̒dungohe tau-tauwalo Isirai̒lu hiwuwaatia̒, tulusi tio malo loi̒ya mao̒ odelei Musa, “Woluo tolonggalo wau popaatea to kema.”

¹⁸ Ualei Musa, “Odungohe mola diila debo odelo wuwaatio̒ lou̒ loo̒haama meaalo wuwaatio̒ lou̒ ilolaahelio; uito suala lotaa hipolahua.”

¹⁹ Tou̒ tei Musa malembideo̒ to kema boito, iloontongalio sapi hulawa boito wau tau-tauwala donggo hipo ngelunga, yi maloingolo mola tio. Teto olo, tobungo lohui̒dee boito, tei Musa malo pobantilo mola botu u dilelolio mai boito tunggula loa̒antulu hipita-pitanga.

²⁰ Lapatao̒ hilamalio bui̒ losapi u pilohutu tau-taulo Isirai̒lu boito, pilopo didiilio, yilobui̒o tunggula loa̒aluti debo odelo peaahuo̒, lapatao̒ ilulaulio wolo taluhu. Lapatao̒ ilahulalio taulo Isirai̒lu longilu mao̒.

²¹ Tio loloi̒ya mao̒ odelei Haruna, “Wolo u mapilohutu limongolio olemu tilinggula pilolulimu mao̒ timongolio ilodusa daa̒?”

²² Totametao̒ lei Haruna, “Diila oingoi wau̒; otawamu lohihilao woloolo mola neekatilio tau-tauwala botie mohutu u moleeto.

²³ Timongolio loloi̒ya olau̒, ‘Diila otaawanto wolo ulowali wolei Musa, taa u malodelo mai olanto yilumualao̒ lonto Masiri; oditolio pohutua mai olami ila tamowali modelo olami.’

²⁴ Wau̒ malo poa̒hu olimongolio mongohi mai pake hulawa, lapatao̒ yilohi mai limongolio olau̒. Ngoa̒amila pake boito pilopo tuwotuu̒ mao̒ ode delomo tulu, lapatao̒ lowaliilo mola sapi botie!”

²⁵ Tei Musa malo ngalati deu̒ tei Haruna malo poluli mao̒ bangusa lo Isirai̒lu debo odelo wadala loo̒huli lonto lantunga, tilinggula timongolio mapiloi̒ii̒ya lomumuu-suwaalo limongolio.

²⁶ Yi maa tilimihulolo mola tio totalu lohuhebu hulubangi lokema wau longuatio̒, “Tatoonu tamoti wambao̒ ode Eeya musi odia mai!” Yi malonao̒ mai suku Lewi lomalitao̒ olei Musa,

²⁷ wau tio loloi̒ya mao̒ ode olimongolio, “Eeya Allahu Taa̒ala lo Isirai̒lu momalentao̒ olimongoli ngota-ngota u momahutao̒ wamilumu wau monao̒ moli kema botie monto hulubangi botie tunggula ode hulubangi uwewo sambela momate mongo wutato mate-mateelo mao̒, mongo sahaabati wau mongo tiheedumu.”

²⁸ Suku Lewi helohutu mao̒ palenta boito wau todulahee boito tanu tolo lihulota ilopatealio yila-yilateelo mao̒.

²⁹ Ualei Musa ode suku Lewi, “Todulahee botie timongoli malo pohetu lobatanga lowali iimamu talomaya to Eeya lou̒ lomate yila-yilateelo mao̒ tau̒kekeei̒ wau mongo wutatumu, yi Eeya mongohi mai balakati-Lio to olemu.”

³⁰ Loombulio mola tei Musa loloi̒ya mao̒ ode bangusa boito, “Timongoli mai̒lodusa daa̒. Bo botia watia mamuli motao̒de mola hui̒dee boito mola motaalua wolo Eeya; pohileaala dua̒ watia ambunguo mai lo Eeya duo̒lo dusa limongoli.”

³¹ Lapatao̒ tei Musa luli lonao̒ mola lotaalua wolo Eeya wau loloi̒ya, “Bangusa boito mai̒lodusa daa̒. Timongolio malohutu ila lonto hulawa.

³² Ambunguolo Eeya bolo potala mongabungu mao̒ dusa limongolio; wonu diila, mamo luluto tanggulo watotia monto buku lotaa u hitumula.”

³³ Eeya lotahuda mao̒, “Bo wambao̒ tau-tauwalo tamaa ilodusa to ola-U̒ malulutou̒ tanggulio monto buku boito.

³⁴ Ponao̒lo botia, wau deloa mao̒ timongolio boito ode tambati umaa tilanggulu-U̒ olemu. Malai̒kati-U̒ mamodelo olemu, bo saaa̒tilio mamei dungga tau-tauwala boito hukuumaniyo-U̒ sababu duduu-sawaalo limongolio.”

³⁵ Lapatao̒ Eeya lopodungga mai baala ode tau-tauwala boito sababu timongolio helo makusa olei Haruna lohutu bui̒ losapi hulawa boito.