PILOTIMUA̒TA 31 - KITABI HABARI MOPIOHE

Allahu Taa̒ala helo lulaoto tau-tauwalo u mohutu Kema wau powimumutio

¹ Eeya lotahuda odelei Musa,

² “Wau̒ malo lulaota olei Bejaleel walae̒e Uri, wombu lei Hur lonto suku Yehuda,

³ wau lohudu mao̒ kawasaa-U̒ olio. Tio yilohiya-U̒ mao̒ ohuhama, pongotota wau mambo todelomo totoonulalo ilomata seni u hidala-dalaala:

⁴ huna mohutu lanjana u momalalu ahaliilio wau mokalaja mao̒ monto hulawa, talaa̒, wau polunggu;

⁵ u modumbata botu polioto u maa aatuluolo; u monguukiri ayu wau duo̒lo totoonulalo ilomata seni u hidala-dalaala wewolio.

⁶ Tei Oholiab walae̒e Ahisamakh, lonto suku Dan, matilulaotu-U̒ olo u momantu olio. Yilohi-U̒ mao̒ olo ahali ulaba-labaalo ode papaa-niyaalo tamotota, alihu timongolio mowali mohutu penu boli wolo wambai̒o upilo malenta-U̒ mao̒:

⁷ Kema-U̒, Bulua Daantia wau tau̒bio, ngoa̒amila pakaakasi lo Kema,

⁸ deu̒yito-yito meja wau powimumutio, oa̒ato tohe monto hulawa tutu wolo powimumutio, mesba tambati pomobuwalo dupa,

⁹ mesba tambati lo bake yilalango wau totoonulalo powimumutio, baki lotaluhu wolo wumbatio,

¹⁰ pakeyangi lo ibaadati odelei Haruna wau mongo walai̒o, umusi pomake mao̒ tou̒ timongolio otuugasi odelo iimamu,

¹¹ winulo upacala, wau dupa moonu duo̒lo Huwali Leidaa̒ Mantali. Ngoa̒amila boito musi pohutuo mao̒ limongolio pasipasi modudua̒ potuhata uilohi-U̒ mai olemu.”

Saabati, dulahee pohuheliyalo

¹² Eeya lomalentao̒ olei Musa

¹³ u mopo malalumu ode bangusa lo Isirai̒lu, “Polameeya mao̒ dulahu Saabati, dulahee u matilantu-U̒ mai odelo dulahee pohuheliyalo. U ohiheo-hiheolo mao̒ dulahee boito mowali poe̒ela towolota limongoli wola-U̒, alihu otaawa mao̒ limongoli deu̒ Wau̒lo Eeya, wau deu̒ Wau̒ malo powali mai olimongoli, bangusaa-U̒ lohihilao.

^14-15 Dulahu pohuheliyala boito musi hulumatia mao̒ limongoli odelo dulahu u mantali. Timongoli wohiya-U̒ mai wolomohui mola u pokalajaalo, bo todulahu opitulio yi todulahee daa̒ u pohetuwola ola-U̒. Tatoonu tadiila mohulumati mao̒ dulahee boito, bo mokalaja todulahee boito musi hukuu-maniyolo mate.

¹⁶ Bangusa lo Isirai̒lu musi mopolame mao̒ dulahee boito wawaalia mola odelo tuoto lo daantia.

¹⁷ Todulahee boito yito tuwaulio poe̒ela u tatapu towolota bangusa lo Isirai̒lu wola-U̒, sababu Wau̒, Eeya, malohutu hulungo wau dunia todelomo wolomohui mola, wau todulahee u opitulio Wau̒ malo belenti lokalaja wau lohuheli.”

¹⁸ Tou̒ yilapato helo tahuda odelei Musa toitaato Hui̒dee Sinai, Allahu Taa̒ala longohi mao̒ olio botu dulo pita umaa tiluladeo̒ lo Allahu Taa̒ala wolo papaa-lentaa-Lio.