PILOTIMUA̒TA 29 - KITABI HABARI MOPIOHE

Wau̒du pasali pomantaliyalo olei Haruna wau mongo walai̒o odelo iimamu

¹ “Odieelo mola pohuli lo mopo mantali olei Haruna wau mongo walai̒o alihu timongolio mowali momaya ola-U̒ odelo iimamu. Pohama mao̒ sapi ulai̒ tuwau udonggo buboto wau himba ulai̒ duluo udiila otailio.

² Monto labu lotiligu u mopiohe daa̒, pohutua mao̒ popoi̒o u diila oragi. Ngotayadu lopopoi̒o boito musi pohutuwola roti wolo winulo jaitun, ngotayadio poli diila owinulo, wau labitio pohutua mao̒ kuukusi upilaide wolo winulo.

³ Podutua mao̒ todelomo tapahula wau podewowa mai uito ode ola-U̒ pee̒-pee̒enta wolo bake losapi ulai̒ wau himba ulai̒ duluo.

⁴ Ahuli mao̒ tei Haruna wau mongo walai̒o monao̒ mai ode huhebu lo Kema-U̒ wau mopobelesi mao̒ batanga.

⁵ Popohulia mao̒ pakeyangi li iimamu to olei Haruna: kameja, boo̒ li iimamu, jumba u molau̒be boo̒ li iimamu, tau̒bu duhelo wau bintolo wohuta.

⁶ Podutua mao̒ sulubani to lunggongio wau popohulia mao̒ to sulubani boito polomu hulawa wolo paisaka ‘Pohetuwola ode Eeya’.

⁷ Lapatao̒ hamawa mao̒ winulo upacala, poloohe mola toitaato lunggongio wau winuli mao̒ tio.

⁸ Lapatao̒ uito, ahuli mao̒ mongo walai̒o monao̒ mai wau popohulia mao̒ kameja

⁹ wau bintolo wohuta to olimongolio, lapatao̒ podutua mao̒ sulubani to lunggongi mongolio. Odi-odieelo mola pohuliilio mopo mantali olei Haruna wau mongo walai̒o. Timongolio wau wali mola limongolio musi momaya ola-U̒ odelo iimamu u ohiheo-hiheolo mao̒.

¹⁰ Lapatao̒ sapi ulai̒ boito musi deloomu mai ode talu lo Kema-U̒. Tei Haruna wau mongo walai̒o musi mopodutu mao̒ uluu̒ limongolio toitaato lunggongo binatangi boito.

¹¹ Olota mao̒ sapi ulai̒ boito totalu-U̒, tohuhebu lo Kema.

¹² Hamawa mao̒ ngotayadu duhu losapi boito wau pomadeta mao̒ wolo tingongoa lo uluu̒mu to tutuu-ngeyaala lomesba. Labitio loduhu boito musi tuangomu towimbihu walungo mesba.

¹³ Lapatao̒ uito hamawa mao̒ ngoa̒amila tabo ulolau̒be tuango ombongio, towimbihu u mopiohe daa̒ monto wantohu wau oilee duuduluo wolo tabolio podutua mao̒ ngoa̒amila boito toitaato mesba wau tumbili mao̒ ode dewo duo̒lo-U̒.

¹⁴ Tapu, walito, wau toniya lo sapi ulai̒ boito musi tumbila mao̒ to bulemengo kema. Ui-uitolo dewo u pongambunguala dusa lomongo iimamu.

¹⁵ Lapatao̒ hamawa mao̒ tala tuwau lohimba ulai̒ boito. Tei Haruna wau mongo walai̒o musi mopodutu mao̒ uluu̒ limongolio toitaato lunggongo binatangi.

¹⁶ Lapatao̒ olota mao̒ binatangi boito, hamawa duhulio wau pomuhuta mao̒ to opato biihio lo mesba.

¹⁷ Himba ulai̒ boito musi olo-olongolo. Tuango ombongo wau bungolopalio musi wulowalo wau podutuwola toitaato lunggongio wau toitaato lou̒ hio̒lo-olonga uwewolio.

¹⁸ Podewowa mao̒ ngoa̒amila himba ulai̒ boito toitaato mesba duo̒lo bake yilalango. Boolo bake boito moo̒ sanangi hilaa-U̒.

¹⁹ Hamawa mao̒ himba ulai̒ tuwau poli, deu̒yito-yito himba ulai̒ duo̒lo upacala pomantaliyalo. Ahuli mao̒ tei Haruna wau mongo walai̒o mopodutu uluu̒ limongolio toitaato lunggongo binatangi boito.

²⁰ Lapatao̒ olota mao̒ himba ulai̒ boito, hamawa mao̒ ngoi̒di duhulio wau pomaide mao̒ tobulongo olowala lei Haruna wau mongo walai̒o, totiilo tingongoa lo uluu̒ olowala wau tiilo tingongoa lo oa̒ato olowala limongolio. Labito duhu boito musi pomuhutumu mao̒ to opato biihio lo mesba.

²¹ Hamawa mao̒ ngoi̒di duhu uwoluo toitaato mesba wau ngoi̒di winulo upacala, lapatao̒ pomolotia̒a mao̒ odelei Haruna wau mongo walai̒o wau pakeyangi limongolio. Wolo dudelo boito tei Haruna wau mongo walai̒o wau pakeyangi limongolio pohetuwola ola-U̒.

²² Hamawa mao̒ tabo lohimba ulai̒ boito, patahio u otabo, woludu tabo monto tuango ombongio, to wimbihu u mopiohe daa̒ monto wantohio, oilee duuduluo wolo tabolio, wau bungolopalio olowala.

²³ Monto kalanji lo roti u mapilodewo ola-U̒, hamawa mao̒ roti ngobotu monto timii̒du ngodalaala u: ngodalaala pilohutu wolo winulo jaitun, wau ngodalaala diila owinulo, wau kuukisi ngobotu.

²⁴ Podutua mao̒ ngoa̒amila ua̒alo boito to uluu̒ lei Haruna wau mongo walai̒o wau ahuli mao̒ timongolio mopoo̒taa mai ola-U̒ odelo dewo poo̒taa.

²⁵ Lapatao̒ hamawa mao̒ roti boito monto olimongolio wau panggangia mao̒ toitaato mesba, toitaato bake yilalango boito. Boolo bake boito moo̒ sanangi hilaa-U̒.

²⁶ Hamawa mao̒ duhelo himba ulai̒ boito wau podewowa mai duo̒lo dewo poo̒taa ode ola-U̒. Wau ui-uitolo tayadumu.

²⁷ To delomo upacala pomantalia li iimamu, duhelo wau bungolopa lohimba ulai̒ u pomake todelomo upacala boito musi podewoolo odelo dewo yilalango ode ola-U̒ wau bua̒alo duo̒lo mongo iimamu.

²⁸ Uti-utieelo putuusani-U̒ u diila mowali lomeloolo: Tou̒ umati-U̒ monao̒ mai mopodewo lobake polodame, duhelo wau bungolopa lobibiahu boito yito tayadu lomongo iimamu. Ui-uitolo dewo lo umati-U̒ ode ola-U̒.

²⁹ Pakeyangi lo ibaadati lei Haruna musi powalisia mao̒ ode mongo walai̒o, alihu mowali pomake limongolio tou̒ mantaliyalo.

³⁰ Walae̒e Haruna tamowali iimamu mobuulota woli yamolio wau tumuwotai ode Kema-U̒ u moponao̒ lo ibaadati to Huwali Leidaa̒ Mantali, musi momake pakeyangi boito pitu hui mola hiheolio.

³¹ Hamawa mao̒ tapu lohimba ulai̒ u pomake to upacala pomantaliyalo olei Haruna wau mongo walai̒o wau tubuwa mao̒ tapu boito totambati tuwau u mantali.

³² Tapu boito musi tamela mao̒ limongolio tohuhebu lo Kema-U̒ wolo labito roti uwoluo tokalanji.

³³ Timongolio musi molamela ua̒alo upilopo bake mao̒ to upacala pongambunguala dusa tou̒ pomantaliyalo. Bo ti iimamu wambao̒ tamowali molamela ua̒alo u mapilohetu mao̒ ola-U̒ boito.

³⁴ Wonu loombulio mola dumodupo tapu meaalo roti boito donggo olabita, yi labitio boito musi pobuwola tunggula maahu, wau diila mowali tameloolo, sababu mapilohetu mao̒.

³⁵ Upacara pomantaliyalo olei Haruna wau mongo walai̒o musi pohutuwola ngotilonggadu pitu hui mola polupolu, debo odelo u mapilo malentaa-U̒ mai olemu.

³⁶ Timii̒du dulahu musi podewoolo sapi ulai̒ tuwau u pongambungualo dusa. Wolo bake boito mesba pomantaliyolo. Lapatao̒ mesba boito musi winulamu mao̒ wolo winulo jaitun alihu pohetuwola ola-U̒.

³⁷ Pohutua mao̒ uito timii̒du dulahu ngotilonggadu pitu hui mola. Yi ngoilanggubu mesba mowali mantali; penu boli wolo wambai̒o u otuhata lomesba boito musi wuduwola ode Eeya, wau penu boli tatoonu tamoo̒ dedetao̒, matopotala sababu olootolo lo omantaliilio.”

Bake timii̒du dulahu

³⁸ “Timii̒du dulahu u ohiheo-hiheolo mao̒ toitaato mesba boito musi pobakeelo himba mohelu duluo u ou̒umulu ngotaunu.

³⁹ U tuwau duo̒lo dewo dumodupo, wau uwewolio ode dewo lolaango.

⁴⁰ Pee̒-pee̒enta wolo walao̒ himba ode dewo dumodupo, musi pobakeelo ngokilo labu lotiligu u mopiohe daa̒ ulambohela wolo ngoliiteri winulo jaitun tutu. Wewolio leeto olo ngoliiteri taluhu angguru.

⁴¹ Walao̒ himba duo̒lo dewo lolaango musi pobakeeolo wolo dudelo u tutuuwauwa, wolo labu, winulo jaitun wau taluhu angguru. Boolo bake yilalango boito moo̒ sanangi hilaa-U̒.

⁴² Wumbutio mola duo̒lo totoonulalo jamani, bake yilalango boito musi podewolo totalu-U̒ tohuhebu lo Kema-U̒. Teteetolo Wau̒ mamo dunggaya wolo umati-U̒ wau motahuda mai to olemu.

⁴³ Teto Wau̒ mamo dunggaya wolo bangusa lo Isirai̒lu, wau tinelo owoluwo-U̒ mamo powali mao̒ tambati boito mantali.

⁴⁴ Wau̒ mamo powali mao̒ Kema wau mesba boito mantali. Tei Haruna wau mongo walai̒o mapohetu-U̒ mao̒ wolo tawewo alihu timongolio momaya ola-U̒ odelo iimamu.

⁴⁵ Wau̒ mamo tibiluloa̒ tohuungo bangusa lo Isirai̒lu, wau mowali Allahu Taa̒ala limongolio.

⁴⁶ Timongolio mamotota mao̒ deu̒ Wau̒lo Eeya Allahu Taa̒ala limongolio talodelo olimongolio, yilumualao̒ lonto Masiri, alihu Wau̒ mowali motibiluloa̒ tohuungi mongolio. Wau̒lo Eeya Allahu Taa̒ala limongolio.”