PILOTIMUA̒TA 27 - KITABI HABARI MOPIOHE

Mesba

¹ “Pohutua mao̒ mesba tuwau monto ayu aakasia. Moodelilio hitutu-tutuuwa, timii̒du hayai̒o wau tanggalio tinggai dulo koma dulo meeteri wau langgatio tuwau koma tolo meeteri.

² To timii̒du tutulio toitaato musi pohutuwalo tutuu-ngeyaalo u mowali tuwau wolo mesba. Ngoa̒amilalo musi woludela wolo polunggu.

³ Pohutua mao̒ totoo-mbeyaalo, sikopu, mamaa-nggowaalo, tutuu-nggoo̒walo wau tambati lotulu. Ngoa̒amila powimumuto boito musi pohutuwolo monto polunggu.

⁴ Pohutua mao̒ walamo kawa monto polunggu wau popohulia mao̒ pateda wopato to ayu pohulihelo towalungo tutulio wopato.

⁵ Langgato kawa uwala-walamo boito musi ngotayade duluo wolo langgato mesba. Walamo kawa boito musi popo libudulo to mesba wimbihu walungo.

⁶ Pohutua mao̒ duluo ayu pohulihelo monto ayu aakasia wolu-wolude polunggu,

⁷ wau potuwota mao̒ ode delomo papaa-tedawaalo to oluo biihu mesba tou̒ mohulihe mesba boito.

⁸ Pohutua mao̒ mesba boito monto dupi ohuango to wimbihu delomio, modudua̒ lanjana u pilotunu-U̒ mai olemu toitaato hui̒dee botie.”

Palepelo Kema lo Eeya

⁹ “Pohutua mao̒ palepelo pali-palita to Kema-U̒ ubilaala wolo layahu monto kaingi lineni moa̒aluti. Towimbihu huliaalio, layahu boito hayai̒o wopato pulaa pato meeteri,

¹⁰ tataahangi lowolihi polunggu dulopulu, tinggai wolo wumbato polunggu, wau kaito wau abitio monto talaa̒.

¹¹ Pohutua mao̒ debo odelo uito olo towimbihu tilayo.

¹² Towimbihu otolopa, layahu boito hayai̒o dulo pulaa dulo meeteri, wolo mopulu wolihi wau mopulu wumbato.

¹³ Towimbihu tiimulu, u huhebulio, hayao̒ layahu boito olo dulo pulaa dulo meeteri.

^14-15 To oloihi wau olowala lohuhebu boito musi popohuliolo layahu, hayai̒o tinggai wolomo koma wolomo meeteri wolo wolihi totolu todelomo wumbato totolu.

¹⁶ Duo̒lo huhebulio musi popohuliola podehu ngohayao̒ tio lomeeteri monto lineni moa̒aluti u hilewo wolo lambuto himba wahue̒nte, lailoumu wau meela, wau polomuwalo wolo kalawo. Huna molaahangi kaingi lohuhebu boito musi pohutuwola wolihi wopato wolo wumbatio wopato.

¹⁷ Ngoa̒amila wolihi topalito paango boito musi powumbutolo tuwau wau uwewolio wolo abito talaa̒; kaitolio musi monto talaa̒ wau wumbatio monto polunggu.

¹⁸ Layahu topalito palepelo boito hayai̒o wopato pulaa pato meeteri, tanggalio dulo pulaa dulo meeteri wau langgatio dulo koma dulo meeteri. Layahio musi pohutuwola monto kaingi lineni u moa̒aluti wau wumbatio monto polunggu.

¹⁹ Ngoilanggubu powimumuto upomake todelomo Kema, ngoa̒amila patoo̒ duo̒lo Kema wau duo̒lo layahio musi pohutuwola monto polunggu.”

Pohuli lou̒ mongulusi tohe

²⁰ “Ahuli mao̒ taulo Isirai̒lu modelo mai winulo jaitun tutu wau ulaba-labaalo mopiohu duo̒lo tohe todelomo Kema-U̒ alihu mowali tumbilalo wau lumai̒to tulusi.

²¹ Tei Haruna wau mongo walai̒o musi mongulusi mao̒ tohe boito monto lolaango demola dumodupo totambati ilowoluwo-U̒, to bulemengo kaingi u ntaya-ntayanga totalu lo Bulua Daantia. Palenta boito musi pohutuwola u ohiheo-hiheolo mao̒ lotau Isirai̒lu wau waliilio mola.”