PILOTIMUA̒TA 25 - KITABI HABARI MOPIOHE

Dewo duo̒lo Kema lo Eeya

¹ Eeya lotahuda odelei Musa,

² “Ahuliilo mao̒ taulo Isirai̒lu, modelo mai dewo ode Olau̒. Tatoonu tau̒moliyoo̒ hilaalio, musi modelo mao̒ dewo

³ debo odelo: hulawa, talaa̒ wau polunggu;

⁴ kaingi lineni u moa̒aluti, kaingi lambuto himba wahue̒nte, lailoumu, wau meela, kaingi monto lambuto batade

⁵ walito himba ulai̒ u tilumba lou̒ meela, walito moa̒aluti, ayu aakasia,

⁶ winulo ode tohe, ramba-ramba ode winulo upacala wau ode damahu umoonu,

⁷ hidala-dalaala botu polioto u ilaatulu to epod wau tau̒bu duhelo li Iimamu Daa̒.

⁸ Ahuli mao̒ bangusa boito mopo tihulo kema tuwau ode Olau̒, alihu Wau̒ mowali motibiluloa̒ tohuungi mongolio.

⁹ Kema wau pohi wimumutio musi pohutuo mao̒ limongolio modudua̒ lanjana u mapilotunu-U̒ mai olemu.”

Bulua Daantia

¹⁰ “Pohutua mao̒ bulua tuwau monto ayu aakasia u hayai̒o ngohetuto mopuulo senti, tanggalo wau langgatio wolomo pulaa wolomo senti meeteli.

¹¹ Woludi mao̒ wimbihu delomio wau bulemengio wolo hulawa tutu wau pohutua mao̒ biihio monto hulawa.

¹² Duo̒lo ayu pohulihelo pohutua mao̒ wopato pateda hulawa wau poa̒ita mao̒ to oa̒atio wopato, wau dulo pateda totimii̒du biihio.

¹³ Pohutua mao̒ olo huhulihelio monto ayu aakasia wau woludi mao̒ uito wolo hulawa,

¹⁴ lapatao̒ potuwota mao̒ ayu lo huhulihe boito ode delomo patedalio to timii̒du biihio lobulua boito.

¹⁵ Ayu pohulehelo boito musi debo woluo todelomo papaa-tedawaalo boito, wau diila mowali yinggilolo.

¹⁶ Lapatao̒ todelomo bulua boito musi dutuwomu mao̒ botu duluo wolo papaa-lentaalo u mawohi-U̒ mai olemu.

¹⁷ Pohutua mao̒ tau̒bu bulua boito monto hulawa tutu, u hayai̒o ngohetuto mopuulo senti wau tanggalio wolomo pulaa wolomo senti.

¹⁸ Pohutua mao̒ duluo malai̒kati opolipio̒ monto hulawa u dilupa,

¹⁹ tuwau totimii̒du huudio lotau̒bu bulua boito. Duduuluolo malai̒kati opolipio̒ boito musi powaliyolo ngotayade wolo tau̒bio,

²⁰ wau pohutuolo tinggai tataalua wolo polipio̒ ubua̒-bua̒adu toitaato bulua boito.

²¹ Dutua mao̒ dulobotu todelomo bulua boito wau popohulia mao̒ tau̒bio toitaatio.

²² To tambati boito Wau̒ mamo dunggaya wolemu, wau monto yitaato lotau̒bio, towolota lo malai̒kati opolipio̒ duluo boito, yio̒ mawohiya-U̒ mai butoo̒o-U̒ duo̒lo bangusa lo Isirai̒lu.”

Meja ode roti pohinta

²³ “Pohutua mao̒ meja tuwau monto ayu aakasia u hayai̒o walu lopulaa walu losenti, tanggalio wopato pulaa pato losenti.

²⁴ Woludi mao̒ wolo hulawa tutu, wau popohulia mao̒ lesi hulawa tuwau tobiihio pali-palito.

²⁵ Pohutua mao̒ biihu meja ngotanggalo pitu apingo losenti wau wohia mao̒ enggadelio hulawa tobiihio pali-palita boito.

²⁶ Pohutua mao̒ pateda wopato monto hulawa wau popohulia mao̒ uito totutulio wopato to oa̒atio, totili lobiihio.

²⁷ Pateda boito hunalio polahangi ayu pomulihelio, alihu meja boito mowali potaalolo.

²⁸ Ayu pohulihelo boito musi pohutuolo monto ayu aakasia wau woludela wolo hulawa.

²⁹ Pohutua mao̒ pipii-nggeyaalo, mamaa-nggowaalo, gigii-ntiyaalo wau momoo-kuwaalo u podewowalo taluhu lo angguru. Ngoa̒amila powimumuto meja boito musi pohutuolo monto hulawa tutu.

³⁰ Meja boito musi dutuolo totalu lo Bulua Daantia, wau toitaato meja boito musi laito dapa-dapato roti pohinta.”

Oa̒ato tohe

³¹ “Pohutua mao̒ oa̒ato tohe monto hulawa tutu. Wumbato wau didihimalio musi pohutuolo monto hulawa dilupa; bubuu-ngawaalo pake, leituwoto toyungo wau kolopaalio musi mowali tuwau wolo wumbato wau didihimalio.

³² To didihima boito musi pohutua mao̒ tango wolomo, tango totolu totimii̒du biihio.

³³ Totimii̒du tangolio musi pohutua mao̒ pake debo odelo totolu bunga badam wolo toyungo wau kolopaalio.

³⁴ To didihimalio musi pohutua mao̒ pake debo odelo wopato bunga badam wolo toyungo wau kolopaalio.

³⁵ To walungo lotimii̒du pange lotango boito musi pohutuolo ngotoyungo.

³⁶ Ngoilanggubu oa̒ato tohe boito wolo totoo-yungowalo wau tataa-ngolio musi pohutuolo monto hulawa ngoputu udilupa belesi.

³⁷ Pohutua mao̒ pitu tohe to oa̒ato tohe boito wau popohulia mao̒ odito rupalio tilinggula tinelio motinelo ode talu.

³⁸ Pohutua mao̒ pakaakasi u mopo belesi tumbu lotohe wau bakilio olo monto hulawa tutu.

³⁹ Pomakea mao̒ tolo pulaa limo lokilo hulawa tutu u mohutu oa̒ato tohe boito wolo totoonulalo powimumutio.

⁴⁰ Poo̒dahai mao̒ alihu oa̒ato tohe boito pohutuolo moo̒ baaya u pilotunu-U̒ mai olemu toitaato hui̒dee botie.”