PILOTIMUA̒TA 24 - KITABI HABARI MOPIOHE

Daantia mileterai

¹ Lapatao̒ Eeya lotahuda odelei Musa, “Botuloolo mai motaalua wola-U̒, yio̒ wolei Haruna, tei Nadab wolei Abihu, wau pitu lopulu lota tau̒wa lo bangusa, wau posujudulo mola molubo ola-U̒ monto u molamingo.

² Bo yio̒ lohihilao tamowali mohimbidei ola-U̒. Tawewo diila mowali mohimbidei, wau ulipu tumbao̒ diila mowali motao̒dei hui̒dee botie.”

³ Lapatao̒ tei Musa malonao̒ wau lopo malalumu mola ode bangusa boito ngoa̒amila palenta wau wuu̒du lo Eeya. Timongolio ngoa̒amila pee̒-pee̒entalo mao̒ helo lametao̒, “Ami mohuto mohutu mao̒ ngoa̒amila upilo tahuda mai lo Eeya.”

⁴ Lapatao̒ uito tei Musa helo luladeo̒ ngoa̒amila palenta lo Eeya. Loombulio mola didimodupo, pilotihulio mesba tuwau wolo tugu mopulaa duluo tobungo lohui̒dee boito; timii̒du tugu mowakili tala tuwau suku lo Isirai̒lu.

⁵ Lapatao̒ tei Musa malolao dengolo lota tahi muudawa, wau timongolio lopodewo mao̒ bake yilalango ode Eeya wau longolotao̒ demohelu ngoolo sapi ode bake lo polodame.

⁶ Ngotayadu monto duhu losapi boito hilama lei Musa wau tiluwatio mola ode delomo babaa-siyaalo toitaato mesba.

⁷ Lapatao̒ hilamalio buku lodaantia utula-tuladee palenta lo Eeya, wau pilobacalio mao̒ wolo suala mooo̒huu̒ ode bangusa boito. Uali mongolio, “Ami mohuto modungohe to Eeya wau mohutu mao̒ totoonulalo palentaa-Lio.”

⁸ Lapatao̒ tei Musa lohama mao̒ duhu uwoluo todelomo babaa-siyaala boito wau lopo muhutao̒ odeitaato ulipu. Ualio mao̒, “Duhu botie mopoo̒o toheto daantia u tilihuto Eeya woli mongoli dadaasari to papaa-rentaa-Lio.”

⁹ Lapatao̒ tei Musa, Haruna, Nadab, Abihu wau pitu lopulu tau̒wa boito malo tao̒de mola hui̒dee,

¹⁰ wau timongolio loo̒onto Allahu Taa̒ala lo Isirai̒lu tihu-tihula toitaato u hitua-tuawua debo odelo wumbato monto botu nilamu, wau wahue̒nte debo odelo heengo u mobaango.

¹¹ Mongo tau̒wa lo Isirai̒lu boito maloo̒onto Allahu Taa̒ala; eleponu odito timongolio diila bilinasaa-Lio. Lapatao̒ uito timongolio helo lamela wau longilu.

Tei Musa to Hui̒dee Sinai

¹² Lapatao̒ Eeya lotahuda odelei Musa, “Potao̒dulo mai ode ola-U̒ toitaato hui̒dee. Teto mawohi-U̒ mai olemu botu mohelu duluo u tiluladu-U̒ wolo ngoa̒amila butoo̒o-U̒. Ngoa̒amila butoo̒ boito wohi-U̒ mai odelo pongaajali ode bangusa boito.”

¹³ Lapatao̒ tei Musa wolei Yosua tamoo-hiyowa olio lotidapa-dapato wau tei Musa malo tao̒de mola hui̒dee biluloa̒ lo Eeya boito.

¹⁴ Tei Musa malo lahuli tomongo tau̒wa lo Isirai̒lu, “Yimailo mao̒ to pilokemawa botie dilumutu ami mohualingai. Tei Haruna wolei Hur woluo pee̒-pee̒enta woli mongoli tewe. Tatoonu tao̒ sua̒li, mowali motaalua woli mongolio huna moo̒tapu mao̒ lapatio.”

¹⁵ Tei Musa lotao̒de mola ode Hui̒dee Sinai, lapatao̒ tio tilau̒be mai loheengo ngobongga.

^16-17 Tinelo owoluo lo Eeya lotuhutai odeitaato hui̒dee boito wau taulo Isirai̒lu heloo̒onto debo odelo tulu ulei̒-lei̒ita to bolitutuo̒ hui̒du. Wolomohui mola hiheolio heengo helolau̒bei hui̒dee boito, wau todulahee opitulio Eeya lotianga olei Musa lonto heenga boito.

¹⁸ Lapatao̒ tei Musa tulusi lotao̒dee mola dilumutu tio tilumuotao̒ ode delomo heenga boito. Wopato pulu hui wau dulahu tei Musa helo tibiluloa̒ teto.