PILOTIMUA̒TA 23 - KITABI HABARI MOPIOHE

U aadili wau u juujulu

¹ “Diila mao̒ pololade habari wimbulo, wau diila mao̒ potulungi taa u moleeto tahi pongohia sakusi udiila otutu.

² Diila mao̒ poduduo̒ wolo odaa̒a lotau wonu timongolio mohutu mao̒ totala meaalo molambanga butoo̒ lou̒ mongohi sakusi udiila otutu.

³ Diila mao̒ popoo-hihiihedea tau todelomo palakala polobutoo̒, eleponu tabilutoo̒ boito taa mosikini.

⁴ Wonu timongolio molaahunga moo̒onto mao̒ sapi meaalo kolodai lo musumu u yilapalo, muli delowa mao̒ ode taa ohuu̒wolio.

⁵ Wonu kolodai lo musumu modehu sababu mobuheeto detohio, tulungia mao̒ tio mopotihulo kolodai boito; diila mao̒ tolai odito wambai̒o.

⁶ Pohutua mao̒ taa mosikini wolo aadili wonu tio mai mopo dudulao̒ palakalaalio ode polobutoo̒.

⁷ Polaminga mao̒ potuludu paluti wau diila mao̒ pohutua umoo̒ sababu taa u diila ototala hukuu-maniyola mate, kalana Wau̒ diila mopo banali mai taa mohutu u moleeto debo odelo uito.

⁸ Diila mao̒ pololimo doi soloi, sababu doi soloi boito moo̒ hutu totau mowali pitoo̒ tou̒ otutu wau moo̒ luhi totau-tauwalo tadiila ototala.

⁹ Diila mao̒ pohutua tau deli wolo totoonulalo otohilaa lohilao wambao̒; otaawa limongoli woloolo mola lasaalio mowali tau deli, sababu omoo̒omolu timongoli olo tau deli to Masiri.”

Taunu opitulio wau dulahee opitulio

¹⁰ “Wolomo taunu mola hiheolio timongoli mowali mopomulo mao̒ halabolu limongoli wau mohama wolo u tilapulio mai.

¹¹ Bo totaunu u opitulio huta boito musi lulia mao̒ limongoli. Ngotilonggadu taunu boito timongoli diila mowali mohimoa̒ wolo umobutu mai lohihilao to halabolumu. Lulia mao̒ uito ode taa mosikini, wau labitio ode binatangi molinggelo. Pohutua mao̒ odito olo wolo ilengi lo angguru wau bubuu-ngowaalo jaitun limongoli.

¹² Wolomohui mola todelomo ngodiminggu timongoli mowali mokalaja, bo todulahee u opitulio timongoli musi mohuheli, alihu bibiahumu, mongo watomu wau tau deli tahemo kalaja duo̒lomu mowali mohuheli olo.

¹³ Poo̒tuota mao̒ totoonulalo u mapilo tahuda-U̒ mai ode limongoli. Diila mao̒ polubo ila-ila wewo, tumbao̒ molanggula tanggulio olo diila mowali.”

Wuu̒du pasali duduu-laheyaalo lameyangi

¹⁴ “Timii̒du taunu timongoli musi mohutu mao̒ totolu lameyangi u mohulumati ola-U̒.

¹⁵ Todelomo hulalo Abib meaalo hulalo ubohulio, towakutu utilantu mao̒, timongoli musi mopolame Potihunggu lo Roti Diila Oragi wolo pohuli u mapilo malenta-U̒ mai olemu, sababu tohulala boito timongoli helo lolaa mao̒ Masiri. Diila mao̒ polamela roti upilohutu wolo ragi ngotilonggadu lameyangi pituhui mola boito. Timii̒du timongoli monao̒ mai moi̒baadati to ola-U̒, timongoli musi modelo mai podewo.

¹⁶ Polameyaalo potihunggu lo polipualo tou̒ timongoli molumula molipu bohulo tilapulo halabolu limongoli. Polameyaalo potihunggu lo Wombohe Duungo to pulito lotaunu tou̒ timongoli mohimoa̒a tilapulo ilengi lo angguru wau ilengi lo huhuu-ngowaalo.

¹⁷ Timii̒du taunu tou̒ powoluwolo otolu lo lameyangi boito, ngoa̒amila mongo lolai̒ musi monao̒ mai moi̒baadati to Olau̒, Eeya Allahu Taa̒ala limongoli.

¹⁸ Diila mao̒ podewowa roti u oragi tou̒ timongoli mopobake bibiahe ode Olau̒. Tabo lobibiahe u pobakeelo ode Olau̒ ngotilonggadu lameyangi boito diila mowali polabitolo tunggula lombulio mola dumodupo.

¹⁹ Timii̒du taunu timongoli musi modelo mota ode bele lo Eeya Allahu Taa̒ala limongoli pale ubohulo ilotolao̒ limongoli. Tapu lowalao̒ himba meaalo walao̒ batade diila mowali tubuwolaa wolo taluhu susu liilolio.”

Danti wau palenta

²⁰ “Wau̒ mamolao mai malai̒kati-U̒ meimulo limongoli u moduo̒la olimongoli todelomo nonao̒ wau modelo olimongoli ode tambati u podapato-U̒.

²¹ Poo̒tuota mao̒ wau dungohilo tio. Diila pomalakala wolio sababu tio utoliya-U̒, wau tio diila tamo ngambungu totalaamu.

²² Wonu timongoli modungohe olio wau mohutu mao̒ totoonulalo upilo malentaa-U̒, Wau̒ mamopaatea moluwali ngoa̒amila musumu.

²³ Malai̒kati-U̒ mameimulo woli mongoli wau modelo olimongoli ode lipu bangusa lo Amori, Het, Peris, Kanaa̒n, Hewi wau Yebus, wau timongolio mapo binasaa-U̒.

²⁴ Diila mao̒ polubo bubuu-iyaalo u mooduo̒lawa olimongolio wau diila mao̒ poduduo̒ dudelo limongolio moi̒baadati. Antulua mao̒ bubuu-iyaalo mooduo̒lawa olimongolio boito wau bolia mao̒ wowoo-lihiyaalo botu u hepomake limongolio u moi̒baadati.

²⁵ Wonu timongoli molubo ola-U̒, Eeya Allahu Taa̒ala limongoli, timongoli maa balakatiya-U̒ mai wolo ua̒alo wau minumani, wau totoonulalo ngongoto mapo walahu-U̒ monto olimongoli.

²⁶ To lipumu diaaluo tamaa eenggila meaalo hunusa. Timongoli mawohiya-U̒ mai tutumulo uhaya-haya.

²⁷ Babaa-ngusawalo tanao̒o mai limongoli mapo hutuwo-U̒ moohe ola-U̒; timongolio mapo waliyo-U̒ mao̒ ambulati, ngoa̒amila musumu mamuli mobale wau tumeteo̒.

²⁸ Mumuu-suumu mapopoo-puyooto-U̒, wau babaa-ngusawalo Hewi, Kanaa̒n wau Het polontulo-U̒ monto talumu alihu timongoli mowali momaju.

²⁹ Timongolio diila tapoloontulo-U̒ pee̒entalo mao̒ todelomo u ngotaunu, alihu huta boito diila bo pohuli mao̒ odito, wau binatangi mongantau diila mao̒ molajalela.

³⁰ Timongolio mapolontulo-U̒ ngota-ngotayadu, dilimutu tau-tauwalo limongoli malo tuuu̒de daatalio u motihuloa̒ tohuta boito.

³¹ Sisii-patiyala lo lipumu tantuwo-U̒ mao̒ monto Wulungo lo Akaba demola dutulaa Eperat, wau monto Lau Tenga demola huta udatahu wau luasi udelita. Timongoli wohiya-U̒ mai kawasa to tuango lipu boito, tilinggula timongolio mowali polontulo limongoli tou̒ timongoli momaju mohama huta boito.

³² Diila mao̒ pohutu daantia wolo tau-tauwala boito meaalo wolo ila-ila limongolio.

³³ Diila mao̒ polulia tau-tauwalo boito motibiluloa̒ to lipumu, alihu timongoli diila tamolubo ila-ila limongolio wau odusa to ola-U̒. Wonu timongoli molubo ila-ila limongolio, timongoli modehu ode delomo hentobu lomautu.”