PILOTIMUA̒TA 20 - KITABI HABARI MOPIOHE

Opulu lopalenta

¹ Lapatao̒ Allahu Taa̒ala helo bisala mai, wau uti-utieelo tataahe-Lio,

² “Wau̒lo Eeya Allahu Taa̒ala limongoli tahe lodelo olimongoli yilumualao̒ lonto Masiri tambati pilowatolio olimongoli.

³ Diila mao̒ polubo ila-ila wewo. Tubowaalo Wau̒ wambao̒.

⁴ Diila mao̒ pohutua ode batangamu bui̒ u penu boli debo odelo wolo uwoluo tohulungo, tohuta meaalo todelomo taluhu to walungo huta.

⁵ Diila mao̒ polubo bui̒ debo odelo uito, sababu Wau̒lo Eeya Allahu Taa̒ala limongoli, wau Wau̒ diila motohilaa potutuu-wauwolo penu boli wolita. Tau-tauwalo tahi polonua̒wa ola-U̒, hukuu-maniyo-U̒ demola wali otolulio wau opatio.

⁶ Bo Wau̒ mopo bilohei ponu-U̒ ode helihu-lihua wali mai lotau-tauwalo tahipo tolia̒ngowa ola-U̒ wau modungohe palentaa-U̒.

⁷ Diila mao̒ polanggula tanggulu-U̒ wolo laatao̒ laatao̒, sababu Wau̒, Eeya Allahu Taa̒ala limongoli, mohukuumani mai penu boli tatoonu tamomake tanggulu-U̒ lou̒ talatala.

⁸ Polameyaalo dulahu Saabati wau hulumatia mao̒ dulahee boito.

⁹ Wolomo hui mola wohi-U̒ mai olimongoli u mokalaja,

¹⁰ bo todulahee u opitulio yi todulahee u tolomodu pohuheliyalo ode ola-U̒. Todulahee boito diaaluo penu boli ngotaa mao̒ tamowali mokalaja, mopio timongoli, meaalo mongo walau̒mu, mongo watomu, bibiahumu meaalo tau deli tahi biluloa̒wa tolipumu.

¹¹ To delomo wolomo hui mola, Wau̒, Eeya, helo powali mai dunia, hulungo, deheto, wau totoonulalo uwoluo todelomio, bo todulahee u opitulio Wau̒ lohuheli. Uitolo sababuulio Wau̒, Eeya lobalakati mai dulahu Saabati wau lopo tolomodu mao̒ duo̒lo batanga-U̒.

¹² Hulumatia mao̒ tiyamo wau tiilamu, alihu timongoli moa̒ahu wau otutumulo hayahaya tolipu u mawohi-U̒ mai olemu.

¹³ Diila mao̒ pomate mate-mateelo mao̒.

¹⁴ Diila mao̒ pojina.

¹⁵ Diila mao̒ potao̒.

¹⁶ Diila mao̒ pongohi sakusi paluti pasali lotaa wewo.

¹⁷ Diila mao̒ potohilaa halata lotaa wewo: belelio, dilelio taabua, mongo watolio, bibiahio, kolodailio, meaalo penu boli wolo u mililikiilio.”

Owoohe taulo Isirai̒lu

¹⁸ Tou̒ tau-tauwala loo̒dungohe bulonggodu wau tingohu torompeti, wau loo̒onto ilato wau hui̒dee u opoloo̒, timongolio mahulu-huluhelio yiloohe wau tilimihulao̒ helo tilaminga mota.

¹⁹ Uali mongolio odelei Musa, “Yio̒lo wambao̒ tamo bisala mai to olami, ami mamo dungoheo̒; bo diila mao̒ Allahu Taa̒ala tamo bisala mai to olami, de ami mate.”

²⁰ Tametao̒ lei Musa, “Diila mao̒ oohe, Allahu Taa̒ala dungga-dungga mai bo mai mohimontala olimongoli alihu timongoli debo modungohe o-Lio, wau diila odusa.”

²¹ Bo tau-tauwalo boito debo hitihula helo tilaminga mota, wau bo tei Musa wambao̒ talo himbideo̒ heengo modio̒lomo totambati owoluwo lo Allahu Taa̒ala.

Wuu̒du pasali lomesba

²² Eeya lomalentao̒ olei Musa u lopoo̒taa tobangusa lo Isirai̒lu, “Timongoli maloo̒onto woloolo mola Wau̒, Eeya, helo tahuda mai olemu lonto hulungo.

²³ Diila mao̒ pohutua duo̒lo batangamu bubuu-iyaalo talaa̒ meaalo hulawa u tuboo limongoli ngopohia Wau̒.

²⁴ Pohutua mao̒ ode ola-U̒ mesba tuwau monto huta, lapatao̒ podewowalo teto himba wau sapi limongoli duo̒lo bake yilalango wau bake lo polodame. To timii̒du tambati u tantuwo-U̒ mao̒ olimongoli odelo tambati u poi̒baadatialo ode ola-U̒, Wau̒ mamei dungga mai wau mobalakati olimongoli.

²⁵ Wonu timongoli mohutu mao̒ ola-U̒ mesba tuwau monto botu, diila mao̒ pohutua uito monto botu u pilaahati, sababu wonu timongoli momake pahaati u momuongo botu, yi mesba boito diilalo mowali pomake ode ola-U̒.

²⁶ Diila mao̒ pomongu mesba u molanggato tilunggula musi pia̒atolo wolo tutuua̒du, alihu diila mao̒ oontonga wimbihu wawau̒mu udiila patuti biloheelo.”