PILOTIMUA̒TA 19 - KITABI HABARI MOPIOHE

Taulo Isirai̒lu to Hui̒dee Sinai

^1-2 Lapatao̒ uito bangusa lo Isirai̒lu lololaa mao̒ Rapidim, wau tobohula dulahu hulala otolulio tou̒ timongolio lololaa mao̒ Masiri, malei dungga mola timongolio tohuta udatahu wau luasi udelita lo Sinai. Timongolio helo titikema tobungo lo hui̒dee Sinai,

³ wau tei Musa lotao̒de mola ode hui̒dee boito u lodunggaya wolo Allahu Taa̒ala. Eeya lotahuda mai odelei Musa lonto hui̒dee boito wau lopoa̒hu olio mopo malalumu mao̒ ode taulo Isirai̒lu, wali mai lei Yako,

⁴ “Timongoli maloo̒onto wolo u pilohutu-U̒ totaulo Masiri, wau woloolo mola Wau̒ helodelo mai olimongoli ode ola-U̒ ode tambati botie wolo kawasa uleidaa̒, debo odelo bulungi rajawali helodelo walai̒o toitaato polipii̒o.

⁵ Botia wonu timongoli modungohe ola-U̒ wau tatapu molotolo hilao todaanti-U̒, timongoli mapo waliyo-U̒ umati-U̒ lohihilao. Ngoilanggubu dunia yito milikii-U̒, bo timongoli mamowali miliki tapilonu-U̒,

⁶ tolomodu duo̒lo batanga-U̒ lohihilao, wau timongoli mamomaya ola-U̒ odelo mongo iimamu.”

⁷ Yi malolaahe mola tei Musa wau helo tiangai mongo tau̒wa alihu motia̒mbu, lapatao̒ sililitaalio mao̒ olimongolio ngoa̒amila upilo malentai lo Eeya olio.

^8-9 Timongolio ngoa̒amila wolo pee̒entalo mao̒ lolameta, “Amiaatia mohuto mohutu mao̒ totoonulalo upilo tahuda mai lo Eeya,” wau totameta boito pilo tunggulao̒ lei Musa ode Eeya. Lapatao̒ tahuda lo Eeya odelei Musa, “Wau̒ mamei dungga mai ode olemu lilu-lilunga todelomo heengo u mohulodu; tau-tauwalo mamo dungohe ola-U̒ motahuda mai ode olemu, wau tumulalo mao̒ tou̒ boito timongolio malaito palacaya to olemu.

¹⁰ Botia podunggaya mao̒ wolo tau-tauwala boito, wau ahuli mao̒ timongolio todulahee botie wau loombu mopohetu lo batanga u moi̒baadati. Timongolio musi mongulo pakeyangi limongolio.

¹¹ Ngoonu timongoli musi malei dapato. Todulahee boito Wau̒ mamolaahei ode hui̒dee Sinai, tambati lotaa ngoa̒amila mowali momilohe ola-U̒.

¹² Pohutua mao̒ tuoto topalito hui̒dee botie odelo siipati u diila mowali laode lo bangusa boito. Dinia mao̒ bangusa boito motao̒de mola hui̒dee, tumbao̒ mohimbideo̒. Titaalo tita tamolaode siipatilio, mahukuu-maniyola mate;

¹³ tau boito musi pai̒yolo wolo botu meaalo panaalo, wau diila mowali dedetolo. Utie pohu-pohutu mopio duo̒lo manusia meaalo duo̒lo binatangi; ngoa̒amila taa molaode siipati boito musi hukuu-maniyola mate. Tou̒ odungohe mao̒ tingohu hayahaya lo torompeti, tau-tauwalo boito musi motao̒de mola hui̒du.”

^14-15 Lapatao̒ tei Musa lotuhuta mola lonto hui̒dee wau lopoa̒hu tau-tauwalo boito helo tidapa-dapato u moi̒baadati. Ualio mao̒, “Ngoonu timongoli musi motidapato, wau tou̒ botie timongoli diila mowali modiilea.” Lapatao̒ bangusa boito malo tidapa-dapato wau helongulo pakeyangi limongolio.

¹⁶ Todulahee u otolulio, tou̒ dumodupo, woluo bulonggodu wau ilato. Heengo u mohulodu yilumunetai toitaato hui̒dee wau dungo-dungohei tingohu torompeti u moo̒ohuu̒ daa̒. Ngoa̒amila taa tokema mahilu mehela lou̒ moohe.

¹⁷ Tei Musa lodelo olimongolio yilumualao̒ lodunggaya wolo Allahu Taa̒ala, lapatao̒ timongolio tilimihula tobungo lohui̒dee boito.

¹⁸ Ngoilanggubu Hui̒dee Sinai tilau̒be mai lopoloo̒, sababu Eeya lolaahei ode yitaatio todelomo tulu. Poloo̒ boito lohubulo debo odelo poloo̒ lonto tambati pomobuwalo wau ngoilanggubu hui̒dee hilumehela daa̒.

¹⁹ Tingohu torompeti bo helebe udaa̒ mai. Tei Musa helo bisala, wau Allahu Taa̒ala helo lametai wolo bulonggodu.

²⁰ Eeya lotuhutai ode balitutuo̒ Hui̒dee Sinai, wau lotianga olei Musa u motao̒de mola ode balitutuo̒ hui̒dee boito. Lapatao̒ tei Musa malo tao̒dee mola,

²¹ wau Eeya helo tahuda mai olio, “Potuhutolo mola wau poe̒ela mao̒ totau-tauwalo boito deu̒ timongolio diila mowali molaodee siipati u mai momilohe ola-U̒. Wonu timongolio debo diila modungohe, yi dadaata towolota limongolio maamate.

²² Tumbao̒ mongo iimamu tao̒hilaa mohimbidei ola-U̒, musi mopo mantali lobatanga; wonu diila timongolio mahukuu-maniyo-U̒ mai.”

²³ Ualei Musa ode Eeya, “Tau-tauwalo boito diila mowali motao̒dei, sababu Eeya helo malentai ode mongowtotia u monganggapu mao̒ hui̒dee botie odelo tambati u mantali wau mopoo̒ tuotao̒ siipati to palitio.”

²⁴ Tahuda mai lo Eeya, “Potuhutolo mola, wau lapatao̒ muli pohualingai odia pee̒-pee̒enta wolei Haruna. Bo mongo iimamu wau ulipu diila mowali molaodeo̒ siipati u monao̒ mai ode ola-U̒. Wonu timongolio molaodeo̒ uito, yi timongolio mahukuu-maniyo-U̒.”

²⁵ Lapatao̒ tei Musa malo tuhutolo mola lodunggaya wolo bangusa boito wau pilopo tunggulio mao̒ tahuli lo Eeya ode limongolio.