PILOTIMUA̒TA 17 - KITABI HABARI MOPIOHE

Taluhu lonto botu leidaa̒

¹ Lapatao̒ ngoilanggubu umati lo Isirai̒lu lololaa mao̒ huta udatahu wau luasi udelita Sin wau limbatao̒ limbatao̒ lonto tambati tuwau ode tambati uwewo debo odelo pilo malentao̒ lo Eeya. To wakutu tuwau timongolio lotitikema to Rapidim, bo mota teto diaalu taluhu u yilumolo.

² Tulusi timongolio helo hungoto to olei Musa wau loloi̒ya mao̒, “Wohia mai ami taluhu u yilumolo.” Tei Musa lolametao̒, “Yilongola timongoli hemo huungoto wau mohimontala to Eeya?”

³ Bo tau-tauwala boito malo odito totoa̒ngio wau timongolio hemo hungoto tulusi to olei Musa. Uali mongolio, “Yilongola ami yiluwalumu mai lonto Masiri? Otohilaamu alihu ami, mongo walao̒ lami, bibiahu lami mate lou̒ mototoa̒ngo?”

⁴ Yi malo ngiibodulo mola tei Musa ode Eeya, ualio mao̒, “Wolo u musi pohutuo mao̒ lo watotia ode tau-tauwalo botie? Bilohilo timongolio ohilaa momai̒ lobotu olo watotia.”

⁵ Tahuda lo Eeya odelei Musa, “Tianga mao̒ dengolo lota tau̒wa wau ponao̒lo pee̒-pee̒enta woli mongolio meimulo wolo bangusa boito. Deloa mota olo tunggudu u pomakemu pomolota to Dutulaa Nil.

⁶ Wau̒ matimihula to talumu toitaato botu leidaa̒ tuwau to Hui̒dee Sinai. Wumbade mao̒ botu boito yi taluhu malumualai tunggula tau-tauwala boito mowali mongilu.” Tei Musa lohutu mao̒ odito silakusia lomongo tau̒wa lo Isirai̒lu.

⁷ Tambati boito ilunteelio Masa sababu totambati boito taulo Isirai̒lu helo himontala to Eeya tou̒ timongolio helohintu, “Wolo Eeya wolanto meaalo diila?” Tambati boito olo ilunteelio Meriba sababu totambati boito taulo Isirai̒lu helo hungoto.

Popaatea wolo taulo Amalek

⁸ Lapatao̒ taulo Amalek lonao̒ mai loluhu taulo Isirai̒lu to Rapidim.

⁹ Ualei Musa odelei Yosua, “Tulaotalo dengolo lota u moluhu taulo Amalek. Loombu watia matimihula to balitutuo̒ hui̒dee modihu tunggudu upilei̒ delo mai lo Allahu Taa̒ala.”

¹⁰ Tei Yosua helohutu mao̒ wolo u pilomalenta lei Musa to olio. Tio malonao̒ mota loluhu taulo Amalek, hiambola tei Musa, Haruna wolei Hur helo tao̒de hui̒dee demola balitutui̒o.

¹¹ Ngotilonggadu tei Musa helo mintaaa̒ mola uluu̒lio, taulo Isirai̒lu moo̒haama. Bo wonu tei Musa mopolaahe mola uluu̒lio, taulo Amalek tamoo̒haama.

¹² Tou̒ tei Musa maloongolo, tei Haruna wolei Hur mohama mao̒ botu tuwau alihu tei Musa mowali motihuloo̒; tei Haruna wolei Hur tihu-tihulo to oloihi wau to olowala lei Musa u molumude uluu̒lio alihu debo binta-bintaaa̒ demola dulahee tumolopa mota.

¹³ Pulitio mao̒ taulo Amalek ilolaahe lei Yosua.

¹⁴ Tahuda mai lo Eeya odelei Musa, “Tuladee mao̒ pasali lo ohohaama botie alihu debo toloe̒elalo. Polelea mao̒ odelei Josua deu̒ Wau̒ mamopo binasa mai taulo Amalek.”

¹⁵ Lapatao̒ tei Musa malomongu mesba tuwau wau ilunteelio mao̒ “Eeya yito Panjiu̒.”

¹⁶ Ualei Musa, “Dihimaalo mola molangga-langgatolo mao̒ panji lo Eeya! Eeya helo paatea loluwali taulo Amalek u ohiheo-hiheolo mao̒!”