PILOTIMUA̒TA 16 - KITABI HABARI MOPIOHE

Manna wau bilu-biluulu

¹ Lapatao̒ ngoilanggubu umati lo Isirai̒lu lomonggato lonto Elim, wau todulahee opulaa limo hulala oluolio lapatao̒ timongolio lololaa mao̒ Masiri, leidungga mola timongolio tohuta udatahu wau luasi udelita lo Sin, towolota lo Elim wau Hui̒dee Sinai.

² To huta udatahu wau luasi udelita boito timongolio ngoa̒amila helo hungoto tolei Musa wolei Haruna.

³ Uali mongolio, “Lebe mopioheo̒ wonu humayaalio ami mailate pilate lo Eeya yila-yilateelo mao̒ to Masiri. Mola teto ngoi̒diilio ami mowali motihuloa̒ molamela tapu wau roti tunggula mobutuhu. Bo timongoli malodelo olami odia mai alihu ami ngoa̒amila mate lopolaango.”

⁴ Tahuda lo Eeya odelei Musa, “Botia matuhuto-U̒ mai ua̒alo uleta-letaao̒ debo odelo didi ode limongoli ngoa̒amila. Timii̒du dulahu timongoli musi mohimoa̒ ua̒alo boito tutuuu̒delo mao̒ tou̒ ngohui. Wolo pohuli boito Wau̒ ohilaa motesi mai umati-U̒ alihu otaawa-U̒ mao̒ wolo timongolio modungohe totoonulalo palentaa-U̒ meaalo diila.

⁵ Todulahee olomio timongolio musi mohimoa̒ ua̒alo boito poo̒oluo piu̒wa daatalio.”

⁶ Yi malo loi̒ya tei Musa wolei Haruna ode ngoa̒amila taulo Isirai̒lu, “Lolaanga botie timongoli mamotota mao̒ deu̒ Eeyaalo talodelo mai olimongoli yilumualao̒ lonto Masiri.

⁷ Loombu mola dumodupo timongoli mamoo̒onto tinelaa owoluo lo Eeya. Eeya maloo̒ dungohe olimongoli hemoingo Olio; ooo̒ to Eeya, sababu ami botie bo hipohutua upilo malentaa-Lio mai.

⁸ Eeya mamongohi mai olimongoli tapu tou̒ lolaango, wau roti tou̒ dumodupo, tunggula timongoli mobutuhu, sababu Eeya maloo̒ dungohe olimongoli hemoingo Olio. Tutuulio tutu, wonu timongoli hemoingo olami, yi timongoli hemoingo to Eeya.”

⁹ Lapatao̒ tei Musa loloi̒ya mao̒ odelei Haruna, “Pei̒ nao̒waalo mai timongolio ngoa̒amila mai motaalua wolo Eeya, sababu maa ilodungohe-Lio huhuungoti mongolio.”

¹⁰ Tou̒ tei Haruna donggo hemobisala mao̒ ode limongolio ngoa̒amila, timongolio helo milohe mota ode huta udatahu wau luasi udelita wau debolo tinelo Eeya maa iloontonga mola todelomo heengo.

¹¹ Tahuda lo Eeya odelei Musa,

¹² “Wau̒ maloo̒ dungohe huhuungoto taulo Isirai̒lu. Polelea mao̒ olimongolio deu̒ tou̒ lolaango timongolio mowali molamela tapu, wau tou̒ dumodupo timongolio mowali molamela roti tunggula mobutuhu. Yi timongolio mamotota mao̒ deu̒ Wau̒lo Eeya, Allahu Taa̒ala limongolio.”

¹³ Tou̒ malo laango tilumombotai bilu-biluulu dadaata daa̒ tilinggula loo̒ tau̒ubeo̒ ngoilanggubu kema, wau tou̒ dumodupo malo tuhutai wambulo topalito kema.

¹⁴ Tou̒ wambulo boito lohumbua̒a mola, manilaasa mai toitaato lohuta datahu wau luasi daa̒ u hitua-tuawua umolipa debo odelo tolitio̒ wau moa̒aluti debo odelo wambulo ulowali esi.

¹⁵ Tou̒ taulo Isirai̒lu loo̒onto mota, diila ilotaawa limongolio wolo uito. Yi mahipo hihiintua timongolio ngota-timongota, “Wolo uito.” Lapatao̒ tei Musa loloi̒ya mao̒ ode limongolio, “Ui-uitolo ua̒alo uilohi mai lo Eeya ode limongoli.

¹⁶ Eeya lomalentao̒ alihu ngota-ngota mohimoa̒ ngodaata lou̒ palaluwola, deu̒yito-yito dulo liiteri timii̒du pongawaa̒ lou̒ ngaalaa̒.”

¹⁷ Taulo Isirai̒lu helohutu mao̒ odito; bo woluo tahelo himoa̒ lebe lou̒ dulo liiteri ode ngotaalio wau woluo takuulangi.

¹⁸ Tou̒ tilonggade mola limongolio, malo ilaalo deu̒ tahelo himoa̒ dadaata, diila ilolebealio, wau tahelo himoa̒ ngoi̒di, diila kukuulangi. Ngota-ngota helo himoaa̒ ngodaata lou̒ pilalalulio.

¹⁹ Ualei Musa ode limongolio, “Penu boli tatoonu diila mowali molahu ua̒alo boito penu bo ngoi̒di mao̒ ode u loombu.”

²⁰ Bo dengolo lota towolota limongolio diila helo mandungi loi̒ya lei Musa. Timongolio debo lolahu olo ngotayadu lou̒ aalo boito. Loombulio mola malo ilaalo ua̒alo boito mai̒lo wulodu wau boboolo mohutodu; yi tei Musa maloingo olimongolio.

²¹ Timii̒du dumodupo timongolio helo himoaa̒ ua̒alo boito ngodaata lou̒ palaluo limongolio, wau wonu dulahee mahe mopatu mai, ua̒alo u ilolabita tohuta boito humeheto.

²² Todulahee olomio timongolio helo himoaa̒ ua̒alo boito poo̒oluo piu̒wa daatalio, deu̒yito-yito wopato liiteri ode ngotaalio. Ngoa̒amila tau̒wa limongolio lonao̒ mai wau helo poo̒taa mao̒ sua̒li boito odelei Musa.

²³ Ualei Musa ode limongolio, “Uti-utieelo palenta lo Eeya: Loombu yito tolomodu dulahu u pohuheliyalo, dulahu Saabati, dulahu u pilopo dewo ode Eeya. Wolo u otohilaa panggangio limongoli dulahee botie, panggangiyalo, wau wolo u otohilaa lahee limongoli, laheyalo. U lebe lou̒ palaluolo todulahee botie bua̒awa mao̒ wau tahuwa mao̒ u loombulio mola.”

²⁴ Oditolio ua̒alo u olebelio boito hetilahu limongolio ode u loombu mola debo odelo upilo malentao̒ lei Musa; ua̒alo boito diila lowali lobunuto wau diila lowali yilulodu.

²⁵ Tei Musa loloi̒ya mao̒, “Uti-utieelo ua̒alomu todulahee botie, sababu dulahee botie yito dulahu Saabati, dulahu pohuheliyalo u mohulumati to Eeya, wau timongoli diila tamoo̒ dungga ua̒alo boito penu boli ngoi̒di mao̒ to bulemengo kema.

²⁶ Wolomohui mola hiheolio timongoli musi mohimoaa̒ ua̒alo, bo todulahee opitulio yi todulahee pohuheliyalo, wau diaaluo ua̒alo u motuhutai todulahee boito.”

²⁷ Todulahee opitulio dengolo lota taulo Isirai̒lu ohilaa mohimoaa̒ ua̒alo, bo timongolio diila loo̒dungga wolo-wolo.

²⁸ Lapatao̒ Eeya lotahuda mao̒ odelei Musa, “Tunggula omolua timongoli diila mohuto modungohe palentaa-U̒?

²⁹ Eelailo deu̒ Wau̒ mongohi mai dulahee tuwau u pohuheliyalo. Uitolo sababuulio todulahee u olomio Wau̒ mongohi mai ua̒alo u tutuuu̒de duo̒lo duuhui mola. Todulahee opitulio timii̒du tau musi motibiluloa̒ tobele, wau diila mowali lumualo.”

³⁰ Sababu uito todulahee u opitulio timongolio diila mowali mokalaja.

³¹ Ua̒alo boito ilunte manna lotau Isirai̒lu. Otanu debo odelo bili kekeei̒ lakulio moputio̒ wau lamitio debo odelo kuukusi upilohutu lomake hula lotiia̒.

³² Ualei Musa, “Eeya lopoa̒hu mai olanto mohama mao̒ ngoi̒diilio dulo liiteri manna u tahuwolo ode waliinto mai, alihu timongolio mowali moo̒onto mao̒ ua̒alo uilohi mai lo Eeya olanto tohuta udatahu wau luasi udelita, tou̒ ito yilua-Lio mai lonto Masiri.”

³³ Tei Musa loloi̒ya mao̒ odelei Haruna, “Hamaalo mao̒ ulonga tuwau, wau tuangi mao̒ ngoi̒diilio manna dulo liiteri wau podutua mao̒ totalu lo Eeya u tahuwolo ode waliinto mai.”

³⁴ Yi tei Haruna malo podutu mao̒ ulongo boito totalu lo Bulua Daantia u tahuwolo tutuuu̒de wolo palenta lo Eeya odelei Musa.

³⁵ Manna boito lowali ua̒alo duo̒lo taulo Isirai̒lu ngotilonggadu wopato pulu lotaunu wumbutio mola, tunggula timongolio leidungga mola ode Kanaa̒n, tambati poti tatapua limongolio. (

³⁶ Totonggadu lo upango moobuo̒ ubiasa hepomake lotau tou̒ boito, tuangio dulo pulu loliiteri.)