PILIPI 4 - KITABI HABARI MOPIOHE

Popoo-tuhatawalo

¹ Sababu uito, Mongo wutatuu̒ tatolia̒ngo, odi-odieelo mola wajibulio timongoli tumumulo wolo tio̒otutua palacaya ode Eeya. Hilaa lowatia mooloolo olimongoli! Timongolilo tamoo̒ bangga olaatia wau talo eengahe olaatia.

² Wutato ti Euodia wau Wutato ti Sintike! Pohile lowatia tio̒otutua alihu Wutato ngohilao odelo tau-tauwalo tango iimani.

³ Duo̒lo sahabati lowatia taa tatapu wau molotolo hilao, pohile lowatia olo alihu Wutato momantu taabua duulota boito. Timongolio malo kalaja tio̒otutua wolaatia helo pohabari Habari Mopiohe lonto Allahu Taa̒ala; tutuuwauwa debo odelo tei Klemen wau ngoa̒amila taa wewolio tahemo kalaja pee̒-pee̒enta wolaatia. Tataa-nggulalo limongolio woluo todelomo Kitabi Taa Tumutumulo.

⁴ Pohileaala dua̒ timongoli laito meengahu sababu timongoli matilu mumulo lotituwau wolo Eeya. Pee̒entapo watia moloi̒ya mai: poti wengahulo!

⁵ Mamusi ngoa̒amila tau mowali moo̒onto pii̒limu ohale mopiohu. Sababu diilalo mohiheo Eeya mamei dungga mai.

⁶ Diila polawalo tomimbihu penu boli wolo. Todelomo totoonulalo sua̒li, podua̒alo wau wudua mola hihiilemu ode Allahu Taa̒ala. Wolo palaluo limongoli, poo̒taa mao̒ uito laito ode Allahu Taa̒ala wolo molapali mola oduo̒lo.

⁷ Yi salaamati monto Allahu Taa̒ala udiila pongalo aakali opahamua lomanusia, mamodaha hilaa wau pikiilangi limongoli umalo tituwau woli Isa Almasi.

⁸ Pulitio mao̒, Mongo wutato, tuangi mola pikiilangi limongoli wolo susuu-aliyaalo u oboliilio, u paatuti pujiolo, deu̒ito-yito susuu-aliyaalo u otutu, uhulu-hulumati, u aadili, mantali, molamahu, wau mopiohe.

⁹ Ponao̒wa mao̒ wolo upilo balajali wau tilolimo limongoli lonto olaatia; mopio lonto tataa-heyaalo boli lonto totoonulalo huhutu lowatia. Allahu Taa̒ala tapilo butua mai lou̒ salaamati, mawoli mongoli.

Lapali oduo̒lo

¹⁰ Todelomo tutumulo laatia u lotituwau wolo Eeya, watia molaasa donggo boli sanangi tutu, sababu lapatao̒ odito hiheolio, botia timongoli luli ilohiyango lotolo mikiilangi mola owowoluwoa lowatia. Makusudu lowatia deu̒ diila pitualio timongoli malo lipata olaatia; timongoli memangi hemo poo̒tuoto olaatia, bo timongoli diila ilohiyango u lopo biloheo̒.

¹¹ Tiloo̒owoli mai lowatia utie diila kalana watia ilodiaa̒, sababu watia malo balajali lolaasa sanangi lou̒ wolo uwoluo.

¹² Watia maloo̒laasa tilumumulo ilodiaa̒ sama-samaata, wau olo tilumumulo lou̒ lebe-lebe. Mai̒lotaawa lowatia lahasialio u motaalua lo owowoluwoa u penu boli odelo woloolo mola olo; mopio owowoluwoa maa̒mulu meaalo owowoluwoa mosikini, mopio owowoluwoa dadaata ngoa̒amilalo meaalo owowoluwoa ilodiaa̒.

¹³ Wolo kawasa uilohi mai li Almasi odelaatia, watia loo̒toduo mai lotolo u lotaalua wolo totoonulalo owowoluwoa u hidala-dalaala.

¹⁴ Bo timongoli malo tulungi olaatia todelomo watia usuusa; wau wolo upilohutu limongoli boito memangi mopiohu.

¹⁵ Mongo wutato taulo Pilipi! Otutu otaawa limongoli lohihilao deu̒ tou̒ watia omoo̒omolu lololaa mao̒ Makedonia, tou̒ Habari Mopiohe boito pilo pololadu lowatia ubohulio, timongolilo tuwa-tuwaulo jamaa̒ tahelo mantu olaatia; timongoli tuwa-tuwaulo talodudua̒ loo̒laasa pae̒eda wau luhilio pee̒-pee̒enta wolaatia.

¹⁶ Tou̒ watia to Tesalonika wau lei̒bantu, malebe lou̒ pee̒enta timongoli helolao dembulo odelaatia.

¹⁷ Uito diila oboliilio deu̒ watia bo wambao̒ ohilaa mololimo wowohi. U otohilaa lowatia yito alihu watia mowali moo̒onto titii-lapuwaalo u moduhengo pae̒eda olimongoli.

¹⁸ Watia malo lolimo ngoa̒amilalo – tumbao̒ lebe lou̒ motuuheta! Ngoa̒amila wowohi uilao mai limongoli olaatia, matilolimo lowatia lonto olei Epaproditus. Botia watia mai̒lo woluwoa lo ngoa̒amila upalaluo lowatia. Ngoa̒amila wowohi lonto olimongoli boito yito debo odelo boolo moonu lo bake u pilodewo ode Allahu Taa̒ala wau u tilolimo lo Allahu Taa̒ala wolo hilaa sanangi.

¹⁹ Allahu Taa̒ala tahe tuboo lowatia, taleta-letaao̒ wolo okokaya todelomo li Isa Almasi, mamo poo̒polu mai totoonulalo upalaluo limongoli.

²⁰ Ilopujialo mola Allahu Taa̒ala ti Paapanto ohiheo-hiheolo mao̒! Amin.

Salamu pulitio

²¹ Potunggula mao̒ salamu lowatia ode ngoilanggubu umati lo Allahu Taa̒ala talo tituwau woli Isa Almasi. Wau tolimoa mao̒ olo salamu lonto mongo wutato tawoluo pee̒-pee̒enta wolaatia teea.

²² Ngoa̒amila umati lo Allahu Taa̒ala tokota botie, laba-labaalo mopiohu timongolio talonto bele biluloa̒ li Kaisari, lolao salamu olimongoli.

²³ Pohileaala dua̒ Eeya Isa Almasi mobalakati mai Wutato ngoa̒amilalo. Hulumati lamiaatia, Paulus wolei Timotius 13