PILIPI 1 - KITABI HABARI MOPIOHE

¹ Mongo wutato umati lo Allahu Taa̒ala ngoa̒amilalo tahi biluloa̒awa to Pilipi, wau tamalowali tuwau woli Isa Almasi. Olo mongo wutato tau̒wa wau tamoo-mantua jamaa̒! Watia, Paulus, wolei Timotius, mongo wato li Isa Almasi,

² mohalapu pohileaala dua̒ Allahu Taa̒ala ti Paapanto wau Eeya Isa Almasi mongohi mai balakati wau salaamati olimongoli.

Dua̒ lei Paulus ode jamaa̒

³ Timii̒du watia moo̒ eela mola olimongoli, watia hemo lapali mola oduo̒lo ode Allahu Taa̒ala.

⁴ Wau timii̒du watia modua̒ mola to Wutato ngoa̒amilalo, watia hemodua̒ wolo sanangi lohilao.

⁵ Watia helo lapali mola oduo̒lo ode Allahu Taa̒ala sababu anggadu bohulo dulahu dilumutu botia, timongoli malomantu olaatia lopo-loladu Habari Mopiohe lonto Allahu Taa̒ala.

⁶ Allahu Taa̒ala lohihilao talo lumula kalaja u mopiohe boito olimongoli, wau watia yakini Tio mamopo tolonga mola kalaja boito dilumutu aahua todulahee ti Isa Almasi muli meidungga mai.

⁷ Memangi to tambatilio watia o pongolaasa debo odelo uito olimongoli, sababu Wutato ngoa̒amilalo laito modudula to hilaa lowatia. Wau olo sababu timongoli modudua̒ mololimo pee̒-pee̒enta wolaatia, ponu uilohi mai lo Allahu Taa̒ala olaatia; mopio masaatia botie tou̒ donggo watia todelomo tutupa boli tou̒ watia woluo to bulemengio u mopodulua wau momintengi Habari Mopiohe boito.

⁸ Otaawa lo Allahu Taa̒ala deu̒ watia otutu mooloolo daa̒ olimongoli wolo laasa tolia̒ngo tataabia lohilao monto li Isa Almasi lohihilao.

⁹ Utieelo dua̒ lowatia olimongoli: pohileaala dua̒ timongoli lebe motolia̒ngo Allahu Taa̒ala wau timongotalio wau he oduhenga mola laito pongotota u otutu wau huhaama u molinepo.

¹⁰ Lou̒ odito otaawa limongoli molulaota wolo ulebe mopiohe daa̒, wau tutumuli mongoli mamobelesi monto aibu meaalo potulude penu boli wolo wambai̒o todulahee muli podungga mai li Almasi.

¹¹ Tutumuli mongoli mamolepata wolo huhutu u otu-otutuulo mao̒ mopiohe u bo mowali pohutuo mao̒ otilapulo li Isa Almasi lohihilao; yi Allahu Taa̒ala mapolaio̒lo wau piluji boli puji.

Tumumulo odeli Almasi

¹² Otohilaa lowatia timongoli motota mao̒, deu̒ susuu-aliyaalo umalo toduo mai olaatia tumbao̒ loo̒sababu lebe dadaata mao̒ tau lodungohe wau palacaya to Habari Mopiohe boito.

¹³ Akibatilio, ngoa̒amila tamoo-kawalia bele biluloa̒ saaha li olongia wau tau-tauwalo wewolio tokota botie motota deu̒ watia tilutupalio sababu watia hemomaya li Almasi.

¹⁴ Wau pilo tutupawa olaatia maloo̒ sababu odaata lonto tau-tauwalo Nasara tokota botie lowali lebe yakini poli to Eeya, tilinggula timongolio lebe buheli helo pohabari tahuli lo Allahu Taa̒ala lou̒ diila wohe-wohe.

¹⁵ Memangi woluo dengolo lota towolota limongolio tahelo pohabari li Almasi sababu mohiihia wau mohuto mohahaamawa, bo tawewolio helo pohabari li Almasi o makusudu u mantali.

¹⁶ Tau-tauwala botie helohutu uito sababu timongolio motolia̒ngo Allahu Taa̒ala wau olaatia, sababu otaawa limongolio deu̒ Allahu Taa̒ala malo poa̒hu mai olaatia u mopo biloheo̒ deu̒ Habari Mopiohe boito otutu.

¹⁷ Bo taawewo helo pohabari li Almasi wolo makusudu udiila mopiohe; timongolio helo pohabari li Almasi wolo makusudu u polohuna daa̒ batanga hihilao. Woleeto boito timongolio hemo halapu u lebe mopoo̒ suusa olaatia todelomo tutupa.

¹⁸ Bo diila mongola! Sababu penu boli woloolo mola olo, mopio uito pilohutu wolo makusudu u mantali meaalo wolo makusudu u talatala, bo debo ti Almasi tapilo habarilio olo; oditolio watia sanangi. Wau watia madebo molaasa odito,

¹⁹ sababu otaawa lowatia deu̒ wolo duduu-aawaalo limongoli wau lou̒ bilantua mai lo Rohu li Isa Almasi, watia malopatolio.

²⁰ U tio̒otutua otohilaa wau halapuo lowatia yito alihu watia sama-samaata diila bolo dia ohuna todelomo tuugasi lowatia. Bolii̒o mao̒ watia hemo halapu timii̒du saaa̒ti, laba-labaalo mopiohe daa̒ masaatia, watia mowali opii̒li buheli tilinggula wolo jiwa wau batanga lealeaatulo mao̒ lowatia – mopio watia tumutumulo meaalo watia mate mao̒ – ti Almasi polaio̒lo.

²¹ Sababu olaatia, dulungo lo tutumulo laatia boti Almasi wambao̒! Wau mate boliilio mao̒ untungi.

²² Bo wonu wolo tutumulo todunia botie, watia mowali mohutu mao̒ kalaja ulebe ohuna, yi diila otaawa lowatia toonu umusi tulaoto lowatia.

²³ Watia bilantangalio monto mohu-mohuwalia. Otohilaa daa̒ lowatia mololaa mao̒ dunia botie wau mola motibiluloa̒ woli Almasi, sababu uitolo ulaba-labaalo mopiohu;

²⁴ bo, ode polohuna daa̒ limongoli, deu̒ito-yito lebe mopioheo̒ wonu watia debo bilu-biluloa̒ todunia.

²⁵ Watia yakini tosua̒li boito. Uito sababuulio otaawa lowatia deu̒ watia madebo motibiluloa̒ wolo Wutato ngoa̒amilalo, alihu moo̒ tulungi olimongoli mowali helebe molotolo wau helebe sanangi todelomo palacaya to Eeya.

²⁶ Sababu uito, wonu watia de mohualingai ode limongoli, timongoli tamalo tituwau woli Isa Almasi maa oa̒alasani lebe dadaata mao̒ poli u molaasa meengahu tobatanga laatia.

²⁷ Naa, u polohuna daa̒ botia yito deu̒ timongoli tumumulo motuuu̒de lou̒ wolo u pohile wolo moo̒ohuu̒ lo Habari Mopiohe pasali li Isa Almasi boito. Lou̒ odito, diila otaawa laatia donggo moo̒ dunggaya woli mongoli meaalo diila, watia mamo dungoheo̒ deu̒ timongoli molotolo motituwau wau mohipate pee̒-pee̒enta bo u makusudu tuwau wau tuwau ilohilaa; deu̒ito-yito to opopalacaya u motuuu̒de wolo Habari Mopiohe monto Allahu Taa̒ala boito.

²⁸ Mamusi timongoli laito buheli; diila mao̒ oohe to tahi potuwalia olimongoli. Lou̒ odito timongoli mopo biloheo̒ deu̒ timongolio tantu mao̒laahe, wau timongoli mamoo̒haama, sababu Allahu Taa̒ala lohihilaolo talo poo̒haama olimongoli.

²⁹ Sababu Allahu Taa̒ala malongohi mai ponu olimongoli diila bo u palacaya li Almasi wambao̒, bo u modutolo olo odeli Almasi.

³⁰ Masaatia timongoli olo modudua̒ wolaatia todelomo polohipate u tutuuwauwa; deu̒ito-yito u pee̒enta iloontonga limongoli hipo hipatea laatia muloololio mai, wau udebo donggo hipo hipatea laatia dilumutu botia, debo odelo umaa ilodungohe limongoli botia.