PILEMON 1 - KITABI HABARI MOPIOHE

¹ Wutato Pilemon, tamani wau waito lami! Wau̒, Paulus, ngotaalio lotutupa sababu ti Isa Almasi, pee̒-pee̒enta wolo wutatonto Timotius; loluladei tulade botie olemu

² wau ode jamaa̒ tahia̒mbua tobelemu; olo to wutatonto, ti Appia wau tamani tangopo hipate, tei Arkhipusi.

³ Ami motiwunela pohileaala dua̒ Allahu Taa̒ala ti Paapanto wau Eeya Isa Almasi mongohi mai balakati wau salaamati olemu.

Tolia̒ngo wau iimani lei Pilemon

⁴ Timii̒du watia modua̒, watia hemo langgulao̒ tanggulo Wutato wau molapali mola oduo̒lo ode Allahu Taa̒ala.

⁵ Sababu watia lodungohe deu̒ Wutato tio̒otutua palacaya to Eeya Isa wau motolia̒nga ngoa̒amila umati lo Allahu Taa̒ala.

⁶ Watia modua̒ mola pohileaala dua̒ potolo wutatonto odelo tau-tauwalo palacaya mamoo̒ toduo mai huhaama ulebe udaa̒ mao̒ to ngoa̒amilalo balakati u mililikinto sababu lotituwau woli Almasi.

⁷ Wutato Pilemon, tolia̒ngumu ode ngoa̒amila umati lo Allahu Taa̒ala, loe̒engahe olaatia wau lohuntulo olaatia! Ngoa̒amila umati lo Allahu Taa̒ala malowali leengahu sababu Wutato.

Hihiile odelei Onesimus

⁸ Masababu uito, odelo ngotaalio lowutato tango iimani, watia mowali wambai̒o momalentai to Wutato u mohutu mao̒ wolo u musi pohutuo lo Wutato.

⁹ Bo sababu watia motolia̒nga to Wutato, watia bo mohile wambao̒. Watia botie taa panggola ngota wau botia donggo tataahangi todelomo tutupa sababu ti Isa Almasi.

¹⁰ Watia Paulus, moo̒owoli mai lo hihiile tuwau olemu tomimbihu olei Onesimus, walao̒ watia todelomo li Almasi. Sababu todelomo tutupa botie watia malowali tiyamo lo rohulio.

¹¹ Omoo̒omolu tio diila ohuna olemu, bo botia tio ohuna olemu, diila bo olemu wambao̒ bo tolaatia olo.

¹² Botia taa u otolia̒ngo lowatia boito muli laolo mai lowatia olemu.

¹³ Otutuulio mao̒ watia ohilaa molahangi olio pee̒-pee̒enta wolaatia debo odelo pobulotalo wolemu, alihu tio mowali momantu olaatia, ngotilonggadu watia tataahangi todelomo tutupa botie sababu helo pohabari Habari Mopiohe lonto Allahu Taa̒ala.

¹⁴ Bo watia diila mohuto motohilaa wolo-wolo wonu Wutato diipo akolo. Watia lebe motohilaa Wutato mohutu uito wolo iloheela lohilao lohihilao; watia diila motohilaa momakusa olemu.

¹⁵ Tanu tei Onesimus mobua̒ monto Wutato u ngopee̒ mola alihu Wutato mowali muli moo̒tapu olio u ohiheo-hiheolo mao̒.

¹⁶ Masaatia tio diila bo ngotaalio lowato duo̒lo Wutato; tio lebe mao̒ leeto. Tio yito timongota taulo Nasara tai̒lo tolia̒ngo. Tio ohuna daa̒ olaatia, tidiyolo mao̒ olemu! Tantu tio ohuna daa̒ mopio odelo wato meaalo odelo wutata ngota todelomo Eeya!

¹⁷ Masababu uito, sababu Wutato monganggapu olaatia tamani timongota lo Nasara, muli tolimowa mao̒ tei Onesimus tutuuwauwa debo odelo Wutato malo lolimo olaatia.

¹⁸ Wonu tio ototala meaalo obiloli olemu, huliilo mao̒ de watia tamaa momanta ngoa̒amilalo boito.

¹⁹ Naa, mopiohulo watia moluladeo̒ lohihilao tewe: Watia, Paulus, mamomayali mao̒ ngoa̒amilalo. (Tantu diila palalu watia mopoe̒elai deu̒ Wutato lohihilao obiloli olaatia, deu̒ito-yito tutumulumu u bohu odelo taulo Nasara.)

²⁰ Sababu uito, domi Eeya ntali tulungia mai watia, powengahe mai hilaa lowatia odelo wutato todelomo li Almasi.

²¹ Watia loluladei tulade botie sababu yakini deu̒ Wutato mamohutu wolo u pohile lowatia. Tumbao̒ otaawa lowatia Wutato mamohutu lebe mao̒ leeto.

²² Sambela uito, tulungia mao̒ mopodapato huwali olaatia tobelemu, sababu watia motiwunela to Allahu Taa̒ala modungohe dua̒ lo Mongo wutato ngoa̒aa̒milalo wau modelo olaatia muli mohualingai ode limongoli.

Salamu pulitio

²³ Tei Epapras, tawoluo pee̒-pee̒enta wolaatia todelomo tutupa sababu ti Isa Almasi, lolao salamulio olemu.

²⁴ Tolimowa mao̒ olo salamu lomongo tamani lowatia; Markusi, Aristarkus, Demas wolei Lukasi.

²⁵ Pohileaala dua̒ Eeya Isa Almasi mobalakati mai olimongoli. Hulumati lamiaatia, Paulus 2