OLUO TAWARI 3 - KITABI HABARI MOPIOHE

¹ Ti Olongia Dauda malolantu mao̒ deu̒ Bele lo Eeya musi bongulola to Yerusalemu to Hui̒dee Moria totambati hepo lumbetaa̒lo pale haku lei Arauna taulo Yebus. Pilmongula Bele lo Eeya boito tilumula li Olongia Salomo

² to hulala oluolio totaunu opaatio pamalentaalio.

³ Hayao̒ Bele boito dulo pulaa pitu lomeeteri wau tanggalo tio lomeeteri.

⁴ Hayao̒ huwali leidaa̒ totalu tutuuwauwa wolo tanggalo bele boito, deu̒yito-yito tio lomeeteri. Langgatio limo lopulaa pato lomeeteri. To wimbihu delomio lohuwali leidaa̒ boito yilolude wolo hulawa tutu.

⁵ Tau̒wa lohuwali leidaa̒ dilupia wolo ayu woohu u mopio̒he daa̒ wau yilolude wolo hulawa deedelo. To woludu hulawa boito o ukiiri gambari bungo lo ombulo wau gambari rante.

⁶ Ti Olongia helo dadai Bele boito wolo botu poliyoto u higaagawa wau wolo hulawa u pilopo woluo mai lonto lipu lo Parwaim.

⁷ Tio helomake hulawa boito olo u pilo woludeo̒ didii-ngingaalo meeseli Bele lo Eeya boito, babaa-lakiyaalo, kokoo-sengiyaalo huhebu wau huhuu-hebulio. Didii-ngingaalo meeselilio hei̒luukiri wolo gambari malai̒kati opolipio̒.

⁸ Huwali Leidaa̒ delomio u ilunte Huwali Leidaa̒ Laba-labaalo mantali hayai̒o tio lomeeteri wau tanggalio tio lomeeteri, tutuuwauwa wolo tanggalo Bele lo Eeya boito. Dulo pulu lotonu hulawa pilomakelio u lohulude didii-ngingaalo meeseli lo Huwali Leidaa̒ Laba-labaalo mantali boito

⁹ wau limo lohetuto pitu lopulu loharamu hulawa u pilohutu paku. Dingingo meeseli lo huhuu-waliyaalo leidaa̒ tobele-belea yitaato olo yilolude wolo hulawa.

^10-13 Ti Olongia olo helo poa̒hu tahi pokalajaalio boito lohutu bui̒ mohelu duluo lo malai̒kati opolipio̒ lonto logamu. Bubuu-iyaalo boito he yiloludelio wolo hulawa wau pilopohuli titiilia to Huwali Leidaa̒ Laba-labaalo mantali talutalu ode huhebu. Timii̒du malai̒kati opolipio̒ boito opolipio̒ duluo, hayai̒o tinggai dulo koma dulo meeteri. Popoo-lipoo̒waalo boito bua̒-bua̒ade odito rupalio tilinggula hudu u tuwau tinggai motenggula to huungo huwali leidaa̒ wau hudu uwewo moo̒oma dingingo meeseli to oloihi wau olowala. Oditolio, popoo-lipoo̒waalo boito hibua̒ade ngohilayaa̒ tio lo meeteri deu̒yito yito ngotanggalo huwali leidaa̒ boito.

¹⁴ Duo̒lo Huwali Leidaa̒ Laba-labaalo mantali boito, pilohutu olo podehu lonto kaingi lineni wau kaingi wewo u tumbai̒o wahue̒nte, lailoumu wau meela. Podehu boito diladai wolo gagaa-mbariyaalo malai̒kati opolipio̒.

Duluo wolihi leidaa̒ lonto polunggu

¹⁵ Ti Olongia helohutu duluo wolihi leidaa̒ u langgatio tinggai mopulaa limo wau ngoputu lomeeteri, lapatao̒ lopo tambati mao̒ totalu Bele lo Eeya. Timii̒du wolihi boito owolihi tau̒wa ngoilanggato dulo koma dulo meeteri.

¹⁶ To wimbihu yitaato lo wowoo-lihiyaalo boito hepiloo̒ gaagalio wolo dadai lonto polunggu, debo odelo walamo rante wolo ngohetuto hungo lodalima.

¹⁷ Wowoo-lihiyaalo boito pilopo tihulo totili oloihi wau olowala lo huhebu potuwotalo ode Bele lo Eeya; u to ambahu huliaalio ilunte Yakhin, wau to ambahu tilayo ilunte Boas.