OLUO MONGO OLONGIA 9 - KITABI HABARI MOPIOHE

Tei Yehu piludui̒o lowali olongia lo Isirai̒lu

¹ Tou̒ boito ti Nabi Elisa lotiangai tala ngota lonto mongo nabi tapiloo̒ laatio wau loloi̒ya mao̒, “Potidapa-dapatolo u monao̒ mola ode Ramot to Gilead wau delowalo mao̒ buutulu u tuatuanga winulo jaitun botie.

² Meidungga mola odito lolohemu mao̒ tei Yehu walae̒e Yosapat wau wombu lei Nimsi. Heinga mao̒ tio tutuuwau ode huwali tuwau,

³ wau huwata mao̒ winulo botie ode yitaato lunggongio, lapatao̒ polelea mao̒ olio, ‘Eeya lotahuda mai deu̒ Eeya momudua̒ olemu mowali olongia lo Isirai̒lu.’ Lapatao̒ mohutu sua̒li boito, hua̒a tolailo tambati boito.”

⁴ Ti Nabi tadonggo humula boito lomonggata ode Ramot,

⁵ tulusi loo̒dungga olei Yehu wau mongo eyaanggu wewelio donggo hemo dulohupa mola teto. Ti Nabi boito loloi̒ya mao̒, “Tuani, watia lodelo mai habari odeli Tuani.” Tei Yehu lolametao̒, “Ode olita?” “Odeli Tuani lohihilao,” tametao̒ linabi boito.

⁶ Lapatao̒ timongolio duduulota tilumuwotao̒ ode delomo bele, wau tinabi humula boito loluwatao̒ winulo jaitun boito toitaato lunggongee Yehu tulusi loloi̒ya mao̒, “Eeya Allahu Taa̒ala lo Isirai̒lu lotahuda mai, ‘Wau̒ momuduo̒ olemu mowali olongia to umati-U̒ Isirai̒lu.

⁷ Yio̒ mamopo binasa ngaalaa̒ li tuanimu Ahab. Lou̒ odito Wau̒ mamo hukuumani mai oli Isebel tamalomate yila-yilateelo mao̒ mongo nabi-U̒ wau mongo wato-U̒ wewo.

⁸ Ngoa̒amila ngaalaa̒ wau walao̒ wombu lei Ahab musi mate. Timii̒du mongo lolai̒ mopio panggola meaambo humula mapo binasaa-U̒.

⁹ Ngaalaa̒lio mapohutuwo-U̒ debo odelo u hepilo hutu-U̒ to ngaalaa̒ lei Yerobeam wau ngaalaa̒ lei Baesa, mongo olongia lo Isirai̒lu.

¹⁰ Ti Isebel diila taa lobungolio. Milatelio maa̒alo lo apula tomadala lo Yijreel.’ ” Lapatao̒ loloi̒ya mao̒ ngoa̒amila boito, ti nabi humula boito yimualao̒ tulusi tilumeteo̒.

¹¹ Tei Yehu luli lohualinga ode mongo tamaniilio, lapatao̒ timongolio helohintu olio, “O habari wolo? Taa biyonga boito ohilaa mongoola wolemu?” “Aa, mailotaawa limongoli,” tametao̒ lei Yehu.

¹² “Diila, diila otaawa lami!” tametao̒ limongolio. “Ntali polelea mai!” Tametao̒ lei Yehu, “Tio loposambe mai tahuli lo Eeya deu̒ wau̒ puduo̒ lo Eeya mowali olongia lo Isirai̒lu.”

¹³ Lolamemeta mongo tamani lei Yehu helo lopato jumba limongolio wau lomua̒adeo̒ to tutuua̒du totalu lei Yehu. Lapatao̒ timongolio lohiipa mola torompeti wau longuatio̒, “Tei Yehu olongia!”

Tei Yoram olongia lo Isirai̒lu pilatelio yila-yilateelo mao̒

^14-15 Odi-odieelo mola tei Yehu helo woomboa loluwali oli Olongia Yoram tatou̒ boito woluo to Yijreel. Tei Yoram odito mola lei̒raawati palilio u lotapulio todelomo popaatea to Ramot helo luwali olei Hajael olongia lo Siria. Tei Yehu loloi̒ya mao̒ ode mongo tamaniilio mongo eyaanggu, “Wonu timongoli akolo watia mowali olongia, dahailo alihu diaaluo penu boli ngotaa mao̒ talumuala monto Ramot mola mopoo̒taa totau-tauwala to Yijreel.”

¹⁶ Lapatao̒ uito tio malotitae̒ tokaleta lo popaatealio tulusi lomonggata ode Yijreel. Tou̒ boito tei Yoram diipo loluli, wau tei Ahasia olongia lo Yehuda woluo mola teto lomilohe olio.

¹⁷ Tou̒ tamoo-kawalia monara lokota Yijreel loo̒onto mota olei Yehu wau taulio hinao̒wa mai, yi tio longiibodu, “Woluo ngopolemboa̒ tau hidulunga mai odia!” Tei Yoram lolametao̒, “Ahuli mao̒ pajule ngota owadala mota motulete wolo timongolio boito tamani meaalo laawani.”

¹⁸ Wolo lotitae̒ towadala, malonao̒ pajule boito mota lodunggaya wolei Yehu wau loloi̒ya, “Ti Olongia ohilaa motota mao̒ wolo nonao̒ mai li Tuani u motaamania.” “Uito diila uruusanimu!” tametao̒ lei Yehu, “Ntali popanggala lomai wolau̒.” Tamoo-kawalia monara boito loo̒onto pajule boito lei dungga mota to ngopolemboa̒ lotau boito, bo tio diilalo lohualingai. Yi tio malopo duloheo̒ sua̒li boito,

¹⁹ tulusi luli yilaolio mota pajule ngota tawewo. Pajule boito olo lohintu mao̒ odito olo odelei Yehu, wau pee̒entapo tei Yehu lolametao̒, “Uito diila uruusanimu! Ntali popanggala lomai wolau̒!”

²⁰ Tamoo-kawalia monara boito luli lopo duloheo̒ deu̒ utolia boito malei dungga mota to ngopolemboa̒ lotau boito bo tio diilalo lohualingai. Lapatao̒ tio lohumbutao̒, “Tanu tau̒wa lo polemboa̒ boito tei Yehu, sababu tio tae̒tae̒ tokaleta lo popaatealio debo odelo taa biyongo.”

²¹ “Podapato mao̒ kaletau̒,” palenta li Olongia Yoram. Yi kaleta pilopo dapatio mao̒, tulusi tei Yoram woli Olongia Ahasia lomonggata mota lodunggaya wolei Yehu, ngota-ngota tingga todelomo kaletalio lohihilao. Timongolio lodunggaya wolei Yehu to halabolu bakasi haku lei Nabot.

²² “Wolo nonao̒mu mai botie motaamania?” yilintu mao̒ lei Yoram odelei Yehu. Tei Yehu lolametao̒, “Diila pongalo aakali motaamania, wonu tewe donggo dadaata taa ogunaguna, wau donggo woluo tamoolubowa balaahala u hetilumula mao̒ li Ijebel tiilamu boito?”

²³ “Utie polo hiyanati, Ahasia!” wuwaatio̒ lei Yoram sambela lopobale mao̒ kaletaalio tulusi tilumeteo̒.

²⁴ Tei Yehu lomantango buutii̒o wolo tio̒otutua lomao̒ wau lomana mota olei Yoram to wulealio lolaapata demola putu. Tei Yoram loombahu lomola, wau yilate todelomo kaletaalio.

^25-26 Lapatao̒ ualei Yehu odelei Bidkar polowila tahe pomantulio, “Wolo donggo o eelamu mola, tou̒ ito helo titae̒ towadala lodudua̒ olei Ahab, tiyamo lei Yoram? Tou̒ boito Eeya lotahuda mai odelei Ahab, ‘otaawa-U̒ tatoonu talomate yila-yilateelo mao̒ olei Nabot wau mongo walai̒o olaango, wau wau̒ modanti mai mamo hukuumani mao̒ olemu to ilengi botie olo.’ ” “Sababu uito,” ualei Yehu wumbutio mola odelei polowila tahe pomantulio boito, “pomahula mota milate lei Yoram boito ode ilengi lei Nabot, alihu pohupohutu hukuumani lo Allahu Taa̒ala to olio.”

Tei Ahasia olongia lo Yehuda pilatelio yila-yilateelo mao̒

²⁷ Tei Ahasia loo̒onto wolo u mailowali mai, yi tio helopo tetea̒ kaletaalio lotidulunga ode kota Bet-Hagan. Tei Yehu helo hilapita olio wau longuatia̒a ode tahidudua̒ olio, “Pateaalo tio mate-mateelo mao̒ olo!” Timongolio helomana olio wau loo̒pali olio todalalo u duludulunga ode Gur, membideo̒ lokota Yibleam. Bo tio loo̒lahi demola Megido, wau mota teto tio yilate.

²⁸ Mongo pogaweelio lohama mao̒ milatelio wau lodelo wolo kaletaalio luli lohualinga ode Yerusalemu, tulusi lolobungao̒ to delomo pilolobunga lomongo olongia to Kota lei Dauda.

²⁹ Tei Ahasia lowali olongia lo Yehuda tou̒ ti Olongia Yoram walae̒e Ahab malo malenta Isirai̒lu mopulaa tuwau lotaun mola.

Ti Olongia Taabua Isebel pilatelio yila-yilateelo mao̒

³⁰ Malei dungga tei Yehu to Yijreel. Lapatao̒ ti Isebel loo̒dungohe pasali wolo uilowali boito, yi tio lodadai huwoi̒o, wau lomake mao̒ motinelo molilingga, tulusi lomilohe mola ode walungo lonto tutulowa lobele biluloa̒ saaha li olongia.

³¹ Tou̒ tei Yehu tilumuwotao̒ loli huhebu hulubangi, ti Isebel longiibodu, “Wuu Jimri, tamoomatea mate-mateelo mao̒! Ohilaa mongoola yio̒ odia mai?”

³² Tei Yehu lomilohe mola ode yitaato ode mantahu tutulowa, wau loloi̒ya, “Tatoonu tamoti wambao̒ ode olau̒?” Loo̒dungohe uito, duluo wau toulota pogawee lobele biluloa̒ saaha li olongia lomilohe mola ode walungo.

³³ Tei Yehu loloi̒ya mola ode limongolio, “Pomahula mai tio ode walungo!” Yi timongolio malo pomahula oli Isebel ode walungo tulusi tio yilihito kaleta tilinggula duhulio loputato ode dingingo meeseli wau wawaa-dalaalo kaleta boito.

³⁴ Lapatao̒ tei Yehu tilumuwotao̒ ode delomo bele biluloa̒ saaha li olongia wau lolamelo. Tulusi tio loloi̒ya mao̒, “Taabua boito laa̒laa̒anati. Eleponu odito, lobungaalo milatelio sababu tio puusili li olongia.”

³⁵ Bo tou̒ tau-tauwala mota mohama milatelio u molobungao̒ olio, timongolio bo loo̒dungga bakakaulio, wau tutuu-lalowaalo polotodu wau oa̒atio.

³⁶ Tou̒ sua̒li boito pilodulohio mao̒ odelei Yehu, yi maloloi̒ya tio, “Utie mailaamali lo Eeya, tou̒ Eeya lotahuda mai odie deu̒ motimbulude olei Elia wato-Lio: ‘Milate li Isebel maa̒alo lo apula tomadala lo Yijreel,

³⁷ wau labito lo milatelio boito mamo pupuulepe lomao̒ debo odelo bountu lo binatangi tilinggula diaaluo penu boli ngotaa mao̒ tamoo̒onuhe wonu milate lo tatoonu uito.’ ”