OLUO MONGO OLONGIA 7 - KITABI HABARI MOPIOHE

¹ Tei Elisa lolametao̒, “Dungohi mao̒ wolo u tilahuda mai lo Eeya! Loombu tanu to wakutu debo odelo utie, wolo ngopita doi talaa̒ wambai̒o tau moo̒tali tolokilo pale u mopiohe daa̒ meaalo wolomo kilo u ngodalala wewo.”

² Polowila tahe pomantu li batanga hihilao toli olongia lolametao̒, “Ualita! Uito diila pongalo aakali, eleponu to saa̒ati botieelo Eeya mopotuhutai didi daa̒ monto hulungo!” “De yio̒ mamoo̒onto mao̒ sua̒li boito motoduo mai, bo yio̒ diila tamoo̒ lamitao̒ ua̒alo boito penu boli ngoi̒di mao̒,” tametao̒ lei Elisa.

Pasuukani lo Siria lololaa mao̒ tambati

³ Todulahee boito wopatota tao̒ ngongoto lo alipo u moo̒tihela hapato woluo to bulemengo huhebu hulubangi lo Samaria. Timongolio loloi̒ya ngota timongota, “Wolo hunalio ito motihuloa̒a tewe mohima mate?

⁴ Wonu ito tumuwota ode kota, ito mamaate lo polobiti; wau wonu ito motitolaa wambai̒o tewe, ito mamaate olo. Mopiohulo ito ode kema taulo Siria. Ngoi̒dilio ito mapateelio mate-mateelo mao̒ limongolio. Bo mowaliilio olo deu̒ ito diila tapongo-pongolaalio.”

⁵ Tou̒ dulahee mahemo dio̒lomai timongolio lonao̒ mota ode kema taulo Siria, bo timongolio diila loo̒onto penu boli ngotaa mao̒ mota teto.

⁶ Sababu, Eeya malohutu taulo Siria moo̒dungohe tingohu debo odelo tiluhu lo ngopasuukani daa̒ owadala wau okaleta. Tau-tauwalo Siria boito helo lantabu ti olongia lo Isirai̒lu maloseuwa olongia lo Het wau Masiri wolo suludadulio u loluhu olimongolio.

⁷ Masababu uito tou̒ huilo boito timongolio lolahi helo poa̒ahu batanga limongolio, wau lololaa mao̒ kema, wadala, wau kolodai limongolio odito wambai̒o to pilo tikemawa.

⁸ Tawopatota tao̒ ngongoto lo alipo boito leidungga mota totili pilo tikemawa boito, wau tilumuwotao̒ ode kema tuwau. Timongolio lolamelo wau longilu teto wau helohama hulawa, talaa̒ wau papaa-keyangiyalo tulusi mota loluua̒ao̒. Lapatao̒ uito timongolio luli lohualingai wau tilumuwota ode kema uwewo, tulusi helohutu sua̒li u tutuuwauwa.

⁹ Timongolio loloi̒ya ngota timongota, “Huhuutunto botie diila mopiohe. Habari botie habari u mopiohe wau patutilio poo̒taanto mao̒! Wonu yimaanto demola loombulio mola, tantulo mao̒ ito hukuu-maniyola. Mopiohulo sua̒li botie poo̒taantu mota ode bele biluloa̒ saaha li olongia.”

¹⁰ Sababu uito malo hualingo timongolio ode Samaria wau longiibode to tamoo-kawalia hulubangi lokota, “Ami malonao̒ mola ode pilo tikemawa taulo Siria, wau loilaalo diaaluo tau mola teto. Wadala wau kolodai limongolio ilodungga lami donggo hitihuta to tambatilio, wau kekee-mawaalo limongolio tilolaalio mao̒ odito wambai̒o.”

¹¹ Tahi pokawalia helo powatia̒ mola habari boito, tilinggula tau helo potunggula mota habari boito ode bele biluloa̒ saaha li olongia.

¹² Tou̒ boito dulahee donggo hui, bo ti olongia debo yilumuala olo lonto huwali potuluhelio wau loloi̒ya mao̒ ode mongo pogaweelio, “Dungohi mai! Otaawau̒ lanjana tau-tauwalo Siria boito! Otaawa limongolio ito donggo hipolaanga, sababu uito timongolio lololaa mao̒ pilo tikemawa limongolio wau mota lotituuo̒ tohuta datahu u luasi daa̒ u momaalo olanto lumualo mopeehu ua̒alo. Lapatao̒ uito timongolio mamoo-montoa̒ olanto wau mokawaasa mao̒ kota.”

¹³ Ngotaalio lo pogawee li olongia loloi̒ya mao̒, “Baginda, ito tadonggo woluo todelomo kota botie paladio tutuuwauwa wambao̒ woli mongolio tamailate. Sababu uito mopiohulo ito mopoa̒hu mola dengolo lota tamotitae̒ towadala mohelu limo towolota lo wawaa-dalaalo udonggo woluo, wau monao̒ mola odito u momilohe wolo u mailowali.”

¹⁴ Yi timongolio lolulaotao̒ dengolo lota, tulusi ti olongia lopoa̒hu tau-tauwalo boito lotijoki mao̒ toduluo kaleta lo popaatea wau mola lotulete wolo u mailowali to suludadu lo Siria.

¹⁵ Timongolio demola Dutulaa Yordan. To ngohayaa̒ lo dalalo timongolio heloo̒onto pakeyangi wau pakaa-kasiyaalo ubolo hipule-pulepeyalo mao̒. Ngoa̒amila boito bolo hepilo mahulio odito wambai̒o lo taulo Siria tou̒ timongolio tilumeteo̒. Mongo utolia boito lohualingai wau helo poduloheo̒ odeli olongia.

¹⁶ Yi ulipu lo Samaria tilumetaa̒ mota ode bulemengo kota wau helo lambato pilo tikemawa taulo Siria. Lutuuu̒de lou̒ wolo u tilahuda mai lo Eeya, lotoduwolo mai deu̒ tolokilo pale u mopiohe daa̒ meaalo wolomo kilo pale u ngodalala wewolio, halagaalio bo ngopita doi talaa̒.

¹⁷ Lolahunga tou̒ boito polowila tahe pomantu toli olongia hihilao otuugasi mongimato huhebu hulubangi lokota. Tio yilate teto hepilo duduutaa̒ lo ulipu. Sua̒li boito lotoduo tutuuu̒de lou̒ uiloi̒ya lei Elisa odeli olongia tou̒ ti olongia lonao̒ mai ode olio.

¹⁸ Tei Elisa malo loi̒ya deu̒ tanu towakutu debo odelo uito loombu mola dulahio, tolokilo pale u mopiohe daa̒ wau wolomo kilo pale ngodalala wewo, mapotali to Samaria wolo halaga ngopita doi talaa̒.

¹⁹ Wau tou̒ boito polowila tahe pomantu toli olongia hihilao boito malo loi̒ya, “Ualita! Uito diila pongalo aakali, eleponu tou̒ botieelo Eeya mopo tuhutai didi polodu monto hulungo!” Lapatao̒ tilametao̒ lei Elisa, “De yio̒ mamoo̒onto sua̒li boito motoduo mai, bo yio̒ diila tamoo̒ lamitao̒ ua̒alo boito penu boli ngoi̒di mao̒.”

²⁰ Odi-odieelo mola u lotoduo mai totau boito – tio yilate hedilutaa̒ lo ulipu tohuhebu hulubangi.