OLUO MONGO OLONGIA 6 - KITABI HABARI MOPIOHE

Bulingo u luli ilodungga

¹ Tou̒ dulahee tuwau mongo nabi tadiliidiki lei Elisa, lohinggile olio. Timongolio loloi̒ya mao̒, “Tambati piloti biluloa̒nto botie meepita daa̒!

² Polulia mai amiaatia moluwodei ayu totili lo Dutulaa Yordan, wau momongu tambati poti biluloa̒nto mola teto.” “Ooo̒,” tametao̒ lei Elisa.

³ Tala ngota limongolio helo huntulao̒ alihu tei Elisa modudua̒ woli mongolio. Tei Elisa akolo,

⁴ tulusi timongolio lomonggato pee̒-pee̒enta. Tou̒ leidungga mola tobiihu Dutulaa Yordan, mailuwodi mongolio ayu boito.

⁵ Debolo mato lobulingo lo ngotaalio limongolio lodehu mola ode delomo taluhu. “Waduu, Paaa̒!” wuwaatii̒o odelei Elisa, “Uito bo bulingo bilolotai!”

⁶ “Tou̒toonu dudehuulio?” yilintu mao̒ lei Elisa. Tau boito lopo biloheo̒ tambatilio, lapatao̒ tei Elisa longolonga ayu ngoputu wau lopo mahulao̒ ode tambati boito. Yi malo tilantungai ode tudu lotaluhu mato lobulingo boito.

⁷ Tei Elisa maloloi̒ya, “Hamaawa!” Tau boito lohudu mota uluu̒lio tulusi lohama mato lobulingo boito.

Suludadu lo Siria ilolaahelio

⁸ Tou̒ wakutu tuwau Siria helo paatea wolo Isirai̒lu. Lapatao̒ lodulohupa wolo mongo polowilalio, ti olongia lo Siria lolantu mao̒ tou̒toonu timongolio musi motikema.

⁹ Bo tei Elisa lolao mota habari odeli olongia lo Isirai̒lu u lopoe̒ela olio alihu diila mao̒ monao̒ ode tambati boito, sababu tau-tauwalo Siria biasaalio hemolibaya molinto.

¹⁰ Oditolio ti olongia lo Isirai̒lu helo poe̒elao̒ to tahi biluloa̒wa totili leeto alihu mopoo̒daha-dahaalo mao̒. Odi-odieelo mola tei Elisa poo̒-poo̒ngoolo helo poe̒elao̒ oli olongia.

¹¹ Sua̒li boito loo̒yingo daa̒ oli olongia lo Siria, tilinggula tio lotiangai tomongo polowilalio wau lohintu mao̒, “Tantu to wolotanto woluo tamalo hiyanati. Tatoonu taulio? Ntali polelea mai!”

¹² Ngotaalio lomongo polowila boito lolametao̒, “Diaaluo penu boli ngotaa mao̒, Baginda. Ti Nabi Elisaalo taloo̒ sababu mao̒! Tio-tiolo talo potunggula mota odeli olongia lo Isirai̒lu wolo uiloi̒ya li Baginda boito, eleponu uito yiloi̒yaalio todelomo huwali potuluhelo.”

¹³ “Tuletea mao̒ tou̒toonu tio,” palenta li olongia, “alihu wau̒ mowali moheu̒pa olio.” Tau lopoo̒taa mao̒ olio deu̒ tei Elisa woluo to Dotan.

¹⁴ Lapatao̒ ti olongia lo Siria lolao mola ngopasuukani daa̒ tilunuhe lowadala wau kaleta lo popaatea. Tou̒ hui timongolio leidungga mola ode kota boito tulusi helomala mao̒.

¹⁵ Loombulio mola didimodupo daa̒ tou̒ tamoomayawa lei Elisa lobongu mai wau yilumualao̒, tio loo̒onto mota deu̒ suludadu lo Siria lomala kota boito wimu-wimumuto wolo wadalalio wau kaleta lo popaatea limongolio. Oditolio, tio luli lohualingao̒ odelei Elisa wau loloi̒ya mao̒, “Topotala ito, Tuani! wolo u musi pohutuwonto?”

¹⁶ “Diila mao̒ oohe,” tametao̒ lei Elisa. “Tawoluo towimbihu olanto lebe dadaata mao̒ u towimbihu olimongolio.”

¹⁷ Lapatao̒ tei Elisa malodua̒ mola, “Yaa Eeya, pohileaala dua̒ Eeya mopo hulaheo̒ mato lo tamoomayawa olo watotia alihu tio moo̒onto!” Eeya lodungohei dua̒ lei Elisa tilinggula tou̒ tamoomayawa olio boito lomilohe mota, iloontongalio hui̒dee boito lopolu lomola wolo wadala wau kaleta otulu lomalitai olei Elisa.

¹⁸ Tou̒ tau-tauwalo Siria boito loluhu, tei Elisa lodua̒ mola, “Yaa Eeya, ambunguolo popitoa̒alo mai tau-tauwala botie!” Eeya lodungohei dua̒ lei Elisa, wau timongolio ngoa̒amilalo lowali pitoo̒.

¹⁹ Tei Elisa lonao̒ mai ode limongolio wau loloi̒ya mao̒, “Timongoli yilapalo. Utie diila kota u helolohu limongoli. Dulo modudua̒i olaatia, de madepito mota laatia timongoli ode tahe lolohu limongoli.” Lapatao̒ tei Elisa lodepita mola olimongolio ode Samaria.

²⁰ Tou̒ timongolio tilumuwota ode kota boito, tei Elisa lodua̒ mola, “Yaa Eeya, ambunguolo pohulahelo mai mato limongolio alihu timongolio moo̒onto.” Eeya lodungohei dua̒ lei Elisa; Eeya helo pohulaheo̒ mato lotau-tauwala boito tilinggula timongolio lolinggolabu loo̒onto deu̒ timongolio woluo tokota Samaria.

²¹ Tou̒ ti olongia lo Isirai̒lu loo̒onto tau-tauwalo Siria boito, tio malohintu, “Elisa, wolo watia musi momate-mateelo mao̒ to tau-tauwalo botie?”

²² “Keke,” tametao̒ lei Elisa, “Hiambola suludadu tailau̒po li Baginda todelomo popaatea olo diila pilate li Baginda yila-yilateelo mao̒, tidiyolo mao̒ utie. Wohia mao̒ ua̒alo wau yilumolo toli mongolio, lapatao̒ polulia mao̒ timongolio muli mohualinga mota odeli olongia limongolio.”

²³ Yi ti olongia lo Iasirai̒ilu lohutu mao̒ potihunggu daa̒ ode limongolio. Lapatao̒ timongolio lolamelo wau longilu, tio lopoa̒hu olimongolio lohualinga mola odeli olongia lo Siria. Tumulalo mai tou̒ boito tau-tauwalo Siria lohuheli heloluhu lipu lo Isirai̒lu.

Samaria hebilalaalio

²⁴ Dengolo wakutu mola lapatio mao̒ tei Benhadad olongia lo Siria lodelo ngoa̒amila suludadulio u loluhu Isirai̒lu. Timongolio lomala kota Samaria,

²⁵ wau heloo̒ sababu mai polobiti ulaba labaalo todelomo kota, tilinggula lunggongo kolodai tuwau halagaalio walu lopuulo pita doi talaa̒, wau dulo onsi bountu lobulungi poombo limo lopita doi talaa̒.

²⁶ To wakutu tuwau tou̒ ti olongia donggo nao̒nao̒ toitaato dingingo meeseli lokota, taabua ngota longiibodu, “Baginda, tulungia mai!”

²⁷ Ti Olongia lolametao̒, “Wonu Eeya diila motulungi mai olemu, diila pongalo aakali wau̒ moo̒ tulungi mai olemu? Wau̒ diila opale meaalo taluhu lo angguru!

²⁸ Wolo osuukalimu!” Taabua boito lolametao̒, “Tamani laatia botie malo heinga olaatia alihu amiaatia molamelopo walao̒ watia, lapatao̒ loombulio mola amiaatia molamelo walai̒o.

²⁹ Masababu uito amiaatia malotubu walao̒ watia tulusi pilolamelo lamiaatia. Loloombulio mola tou̒ watia lohile mao̒ alihu amiaatia motubu walai̒o boito, tio maloluuo̒ olio!”

³⁰ Loo̒dungohe uito, ti olongia longaidinga pakeyangilio sababu siluukali. Tau-tauwalo tahitihula totili lodingingo meeseli boito lowali loo̒onto deu̒ boo̒ delomio lotau boito yito kaingi kado.

³¹ Ti Olongia longiibode, “Todulahee botie olo tei Elisa musi mate. Huliaalo mao̒ Allahu Taa̒ala mamo hukuumani mai olaatia mobuhe-buheetolo mao̒ wonu watia diila momate-mateelo mao̒ olei Elisa!”

³² Lapatao̒ ti olongia lolao mota ngotaalio leimulo wolio ode bele lei Elisa. Tou̒ boito tei Elisa woluo tobele, wau dengolo lota tahimuloa lo ulipu donggo lodumangao̒ odito. Tou̒ utolia li olongia boito diipo leidungga mota, tei Elisa loloi̒ya mao̒ ode tahimuloa lo ulipu boito, “Poo̒tuotilo! Tamoomatea mate-mateelo mao̒ lolao mai tau u momate-mateelo mao̒ olaatia. Wonu tau boito de meidungga mai, heu̒ti mao̒ huhebu diila polulia tio tumuwotai. Woliwoli mai olio mamonao̒ mai ti olongia lohihilao.”

³³ Tou̒ tei Elisa diipo yilapato lobisala, ti olongia malei dungga mai teto wau loloi̒ya mao̒, “Osuusa botie Eeya talo podungga mai to olanto! Oditolio donggo wolo hunalio wau̒ mei̒ tulungi mai to Eeya?”