OLUO MONGO OLONGIA 5 - KITABI HABARI MOPIOHE

Tei Naa̒man piloo̒lulilio

¹ Tei Naa̒man yito eyaanggu diiti popaatea lo Siria tao̒ tolia̒ngio daa̒ wau hepasisia li olongia lo Siria. Sababu lotimbuludei olei Naa̒man, Eeya malongohi mai ode suludadu lo Siria u loo̒haama. Tei Naa̒man yito ngotaalio lo eyaanggu tamolotolo boli buheli daa̒, bo tio o ngongoto lo alipo u moo̒tihela hapato.

² Tou̒ wakutu tuwau taulo Siria loluhu taulo Isirai̒lu. To delomo polotuuhua boito walao̒ taabua ngota lo Isirai̒lu yilau̒pio wau dilelolio odelo tawalo, lapatao̒ lowali tamoomayawa todile lei Naa̒man.

³ Tou̒ dulahee tuwau malo loi̒ya tamoomayawa boito odeli mbuui̒, “Mbuui̒, humayaalio tituani monao̒ mota modunggaya woli nabi tabilu-biluloa̒ to Samaria, tantulo mao̒ tinabi boito mamo poo̒luli mai oli tuani.”

⁴ Tou̒ tei Naa̒man loo̒dungohe sua̒li boito, tio malonao̒ mota odeli olongia wau lohunggoli mao̒ wolo uiloi̒ya lowalao̒ taabua boito.

⁵ Ti Olongia loloi̒ya mao̒, “Ooo̒, ponao̒lo odeli olongia lo Isirai̒lu. Wau̒ mamolao mola tuladee ode olio.” Yi malo monggato tei Naa̒man wau lodelo tolopulu lolihu doi talaa̒, wolomo lihu doi hulawa, wau mopulu lopari pakeyangi u hipiohe.

⁶ Tuladee u dilelolio boito tingohio odie mola: “Moli tuladee botie watia mopoo̒taa mai polowila lowatia, Naa̒man, odeli Tuani alihu ti Tuani mopoo̒luli mao̒ olio monto ngongotio.”

⁷ Tou̒ ti olongia lo Isirai̒lu lopobaca mao̒ tuladee boito yi tio malo ngai-ngaidinga pakeyangilio sababu molawala, sambela loi̒-loi̒ya, “Topotala, wolo sababuulio ti olongia lo Siria boito mohile olau̒ mopoo̒luli mao̒ totau botie? Wau̒ diila Allahu Taa̒ala tao̒kawasa u mopotumulo meaalo mopopate tau! Tantulo mao̒ ti olongia lo Siria boito bo mihintinga olau̒!”

⁸ Ti Nabi Elisa loo̒dungohe pasali losua̒li boito, wau lolao mola tahuli botie odeli olongia lo Isirai̒lu, “Yilongola molawalo? Ahulilo mai tau boito monao̒ mai ode laatia alihu otaawalio deu̒ to Isirai̒lu botie woluo nabi ngota!”

⁹ Sababu uito malo monggato tei Naa̒man wolo kaleta lo wadalalio ode bele lei Elisa, wau lohuheli totalu lohuhebu.

¹⁰ Tei Elisa lolao ngotaalio tamoomayawa u loloi̒ya mao̒ odie odelei Naa̒man, “Ponao̒lo mota ti Tuani molihu poo̒opitu to Dutulaa Yordan, de ti Tuani mamoluli sama-samaata.”

¹¹ Loo̒dungohe uito, tei Naa̒man loingo wau loloi̒ya, “To pikiilangi mola laatia tio malumualai lohihilao mai modunggaya wolaatia, wau modua̒ mola ode Eeya, Allahu Taa̒alaalio, wau mopoo̒liyoo̒ uluu̒lio toitaato wimbihu wawaao̒ laatia u mongongota botie, tulusi watia mamoluli.

¹² Dutulaa Abana wau Parpar to Damusiki lebe mopioheo̒ penu boli wolo dutulaa toonu to Isirai̒lu! Watia mowali molihu teto mola wau mamoluli!”

¹³ Bo tahi pomayawa olio lohimbideo̒ olio wau loloi̒ya mao̒, “Tuani, humayaalio ti Tuani ahulalio mohutu hitua-tuawua u mototolo, tantu mapohutuo mao̒ li Tuani. Tidiyolo mao̒ tio bo lopoa̒hu mota oli Tuani molihu alihu moluli!”

¹⁴ Sababu uito malonao̒ tei Naa̒man ode Dutulaa Yordan, tulusi tilumuwota mola wau lopolomo wawaai̒o todelomo dutulaa boito poo̒opitu debo odelo u ilahula mai lei Elisa. Yi maloluli lomola tei Naa̒man. Wawaai̒o maluli sileehati mai debo odelo wawaao̒ lowalao̒ tadonggo humula.

¹⁵ Lapatao̒ tio wau ngoa̒amila tahidudua̒ olio luli lohualinga mota odelei Elisa. “Botia mailotaawa laatia,” ualei Naa̒man odelei Elisa, “deu̒ to ngoilanggubu dunia bo woluo ngota Allahu Taa̒ala, deu̒yito-yito Allahu Taa̒ala tahe tuboo lotau Isirai̒lu. Sababu uito, potala ti Tuani mololimo mao̒ wowohi monto olaatia.”

¹⁶ Tei Elisa lolametao̒, “Domi Eeya tatumu-tumulo, tahe bayaa laatia, watia diila tamo lolimo penu boli wowohi wolo wambai̒o.” Tei Naa̒man helo huntulao̒ alihu tei Elisa mohuto mololimo wowohilio boito, bo tei Elisa debo lopotouli mao̒.

¹⁷ Lapatao̒ ualei Naa̒man, “Wonu ti Tuani diila tamohuto olo mololimo wowohi laatia, polulia mai watia modelo mohualingo huta ngodaata u mowali odeloa lo ngopanggalo bagal. Sababu tumulalo mai botia watia mamo podewo bake bo ode Eeya wambao̒, wau diila ode ila wewo.

¹⁸ Wonu bolo watia de musi modudua̒ oli olongia laatia mota motabia tokuili Rimon dewa lo Siria, pohileaala dua̒ Eeya mongambungu mai olaatia.”

¹⁹ Ualei Elisa, “Ponao̒lo wolo moa̒ahu.” Lapatao̒ lonao̒lo tei Naa̒man. Diila lohiheo lapatio mao̒ tei Naa̒man lomonggato,

²⁰ tei Gehasi tamoomayawa olei Elisa, mapiki-pikiilangi, “Aa, yilongola tio pilopoluli lonao̒ wau diila lomaayali wolo-wolo? Patutilio tituani laatia mololimo mao̒ wowohi taulo Siria boito! Domi Eeya tatumu-tumulo, watia musi mohilapita mota olio wau moo̒tapu u hitua-tuawua monto olio!”

²¹ Lapatao̒ tei Gehasi malo hilapita mota olei Naa̒man. Tou̒ tei Naa̒man loo̒onto woluo talonao̒ mai, yi tio malolaahe mola lonto kaletaalio wau lohintu mao̒, “Hinta mawolo?”

²² Tei Gehasi lolametao̒, “Maa̒apu Tuani, watia ilahula mai mopo tunggulao̒ odeli Tuani deu̒ boheli mola nabi humula duulota leidungga mai lonto madala hihui̒-hui̒dea lo Epraim. Ti Tuani laatia lei̒hile mao̒ alihu ti Tuani mongohi mai tolo lihu doi talaa̒ wau dulo pari pakeyangi u hipiiohe odeli nabi duuloota boito.”

²³ “Tantulo mao̒!” ualei Naa̒man, wau tio malo huntulao̒ alihu tei Gehasi modelo mota wolomo lihu doi talaa̒. Tei Naa̒man malomolu mao̒ doi boito todelomo dulo bututu, wau lohama dulo pari pakeyangi u hipiiohe. Ngoa̒amila boito yilohilio ode tahi pomayaalio duulota, tailahulio lonao̒ leimulo wolei Gehasi.

²⁴ Tou̒ leidungga mola to huludu tambati biluloa̒ lei Elisa, tei Gehasi malohama doi wau pakeyangi boito lonto tahi pomayaalio lei Naa̒man, lapatao̒ loluua̒ao̒ todelomo belelio. Tahi pomayaalio lei Naa̒man boito mapilei̒ walingalio,

²⁵ tulusi tio luli tilumuwotao̒ ode delomo bele. Tei Elisa lohintu mao̒, “Yio̒ lonto utoonu?” “Diila lonto utoonu, Tuani!” tametio mao̒.

²⁶ Bo tei Elisa loloi̒ya mao̒, “Hilaau̒ woluo mola teto tou̒ tei Naa̒man lolaaheo̒ lonto kaletaalio u lodunggaya wolemu. Botie diila wakutuulio u moo̒tapu doi wau motali ilengi lo jaitun, ilengi lo angguru, himba wau sapi boli mongo wato!

²⁷ Sababu yio̒ malo lolimo wowohi boito, yi yio̒ mamo lolimo olo ngongoto lei Naa̒man. Tumbao̒ u ohiheo-hiheolo mao̒ waliimu mola olo mamoo̒tapu ngongoto boito!” Tou̒ tei Gehasi yilumuolao̒ lonteeto, yi tio maloo̒tapu ngongoto lo alipo – alipio malowali hula daa̒.