OLUO MONGO OLONGIA 4 - KITABI HABARI MOPIOHE

Tei Elisa lotulungi janda ngota tamosikini

¹ Tou̒ dulahee tuwau janda lonto ngotaalio lo nabi lonao̒ mota odelei Elisa wau loloi̒ya mao̒, “Paaa̒, dile lowatia mailate! Wau otaawa li Paaa̒ deu̒ tio olo ngotaalio lotaa u modungohe to Allahu Taa̒ala, bo tio o biloli to tahingota-ngotawa. Botia tau boito lonao̒ mai lohama walao̒ watia duduulota wau timongolio he pilopowaliilio wato, odelo pomaayali biloli todile lowatia tamailate.”

² “Woloolo mola watia moo̒ tulungi mai oli Ibu?” yilintu mao̒ lei Elisa. “Ti Ibu owolo tobele?” “Watia diila owolo-wolo,” tametao̒ libua boito, “ngopohia bo winulo jaitun ngobuutulu u mooyoto.”

³ Tei Elisa loloi̒ya mao̒, “Ponao̒lo mota mobulotao̒ buutulu diila otua udaatalio diila o eenggadelio monto mongo tiheedi Ibu.

⁴ Lapatao̒ uito mamusi ti Ibu wau mongo walai̒ Ibu tumuwotao̒ ode delomo bele wau moheu̒tai huhebu. Tuwata mao̒ winulo monto buuntulu mooyota boito ode delomo bubuu-tuluwaalo boito, wau bua̒awa mao̒ u malopolu.”

⁵ Yi malo hualinga taabua boito ode belelio. Lapatao̒ tio wolo mongo walai̒o tilumuwotao̒ wau loheu̒tai huhebu lobele, tio lohama mao̒ buutulu mooyota boito u tuatuanga winulo jaitun boito, tulusi loluwatao̒ winulo boito ode delomo bubuu-tuluwaalo uilohi lomongo walai̒o olio.

⁶ Tou̒ bubuu-tuluwaalo boito malopolu ngoa̒amila, tio luli lohile mao̒ ngobuutulu. “Malo pulito,” tametao̒ ngotaalio lomongo walai̒o. Yi winulo boito diilalo tilumolohe.

⁷ Lapatao̒ ti Ibu boito luli lonao̒ mota odeli Nabi Elisa, wau tei Elisa loloi̒ya mao̒, “Potaliyalo winulo boito u pomaayali ngoa̒amila biloli li Ibu, wau lebelio ee̒enggade u mopotumulo oli Ibu wau mongo walai̒ Ibu.”

Tei Elisa wau taabua kaya to Sunem

⁸ To Sunem bilu-biluloa̒ taabua kaya ngota. Todulahee tuwau tou̒ tei Elisa lonao̒ mola ode Sunem, taabua boito loloduo olio lolamelo. Tumulalo mai tou̒ boito timii̒du tei Elisa mohepitao̒ to Sunem tio hemo lamela tobele lotaabua boito.

⁹ Lapatao̒ malo loi̒ya taabua boito ode dilelio, “Watia yakini ti Paaa̒ tingga maito hemo hepitai odia boito tutuulio-tutu ngotaalio wato lo Allahu Taa̒ala.

¹⁰ Mopiohulo ito mohutu mao̒ huwali tuwau u mooyota tobele-belea toitaato belento, wau mopo wimumutao̒ wolo tambati potibalatalo, meja, kadera, wau tohe alihu tio mowali mohuheli teto timii̒du tio monao̒ mai ode olanto.”

¹¹ Tou̒ dulahee tuwau tei Elisa luli lonao̒ mola ode Sunem. Lapatao̒ tio malo botulaa ode huwaliilio mola lohuheli,

¹² tio lopoa̒hu mao̒ olei Gehasi, tamoomayawa olio, mota lotiangai taabua boito. Tou̒ taabua boito leidungga mai,

¹³ ualei Elisa odelei Gehasi, “Yintua mao̒ olio woloolo mola wau̒ moo̒tuli mao̒ tolopanilio u pilohutu wolo suukali daa̒ to olanto. Tanu tio motohilao wau̒ monao̒ mota odeli olongia meaalo ode eyaanggu diti lo popaatea wau mobisala mao̒ huna utalu-talu ode olio.” Taabua boito lolametao̒, “Watia bilu-biluloa̒ towolota kaumu ngaalaa̒ lowatia wau diila kukuulangi lolo-loolo.”

¹⁴ Yi lohintu mao̒ tei Elisa odelei Gehasi, “Wonu odito, wolo umowali pohutuwou̒ mao̒ olio?” Tei Gehasi lolametao̒, “Tio diila owalao̒, Paaa̒, wau dilelio mapanggola.”

¹⁵ “Tianga mai taabua boito,” ualei Elisa. Taabua boito malonao̒ mai wau tilimihulao̒ tohuhebu.

¹⁶ Lapatao̒ ualei Elisa olio, “Taunu talutalu mai, tou̒ debo odelo utie, ti Ibu mamomudua̒ walao̒ unge ngota talolai̒.” “Paaa̒, diila pohimbulo!” ualo taabua boito. “Ti Paaa̒ wato lo Allahu Taa̒ala!”

¹⁷ Bo otutuulo wolo uiloi̒ya lei Elisa. Taunu wumbutio mola, tanu tou̒ wakutu u tutuuwauwa taabua boito malo potutu mai walao̒ talolai̒ ngota.

¹⁸ Lapatao̒ walao̒ boito mai̒ludua̒ mai, tou̒ dulahee tuwau to polosembo, walaa̒a boito lonao̒ mota ode liyamolio uwoluo to halabolu wolo tahi pongotola.

¹⁹ Debolo walao̒ boito malo nguatia̒ ode liyamolio, “Akee! Lunggongo lowatia mongongoto!” “Delowalo walao̒ botie ode liilolio,” loi̒ya liyamolio ode ngotaalio tamoomayawa.

²⁰ Walao̒ boito dilelo mota ode liilolio, tulusi tiilolio lomudua̒ olio. Tou̒ lolaangio mola walao̒ boito yilate.

²¹ Tiilolio malodelo olio ode yitaato huwali lei Elisa, wau lopo balatao̒ olio totambati potuluhelo. Lapatao̒ uito tio yilumualo wau loheu̒tao̒ huhebu,

²² tulusi mota lotiangai dilelio. Tio loloi̒ya mao̒, “Ahuliilo ngotaalio tamoomayawa odia mai wolo kolodai tuwau. Wau̒ musi molamea̒ mota li Nabi Elisa, wau mahua̒a mohualingai.”

²³ “Yilongola musi monao̒ botia?” yilintu mao̒ lodilelio. “Dulahee botie diila dulahee saabati wau olo diila dulahu buka lo Hulalo Bohu.” “Diila mongola,” tametio mao̒.

²⁴ Lapatao̒ tio lopohuli lopolana tokolodai boito, tio loloi̒ya mao̒ ode tamoomayawa olio, “Polinggahe mota kolodai botie alihu teteei̒o molinggahe daa̒; diila mao̒ ilangia linggahio wonu diila ahulau̒.”

²⁵ Yi malo monggato taabua boito ode Hui̒dee Karmel ode tambati lei Elisa. Monto u molamingo tei Elisa maloo̒onto taabua boito dulu-dulungai. Tei Elisa loloi̒ya mao̒ odelei Gehasi, “Bilohi, ti Ibu lonto Sunem boito dulu-dulungai!

²⁶ Aliheo̒olo mota modunggaya wolio wau yintua mao̒ woloolo mola owowoluwoalio ongongaalaa̒.” “Ngoa̒amilalo mopiohe,” ualo taabua boito odelei Gehasi.

²⁷ Bo tou̒ leidungga mai ode talu lei Elisa, tio losujudu lomola wau longoo̒ode oa̒ato lei Elisa. Tei Gehasi mamopo hinggi olio monteeto, bo tei Elisa loloi̒ya, “Poluliyalo mao̒! Oontonga mao̒ tio suukali daa̒. Bo Eeya diila lopoo̒taa mai wolo-wolo olau̒!”

²⁸ Taabua boito loloi̒ya mao̒, “Paaa̒, watia diila mohile walao̒ toli Paaa̒. Mailoi̒ya mai lowatia olo odeli Paaa̒ alihu diila mao̒ pongohi mai halaapani udiila ohuna ode laatia.”

²⁹ Tei Elisa loili mao̒ odelei Gehasi lapatao̒ loloi̒ya, “Aliheo̒! Hamaawa mao̒ tungguduu̒ wau lato ponao̒lo ode bele li Ibu botie. Diila mao̒ pohuheli mongohi salamu penu boli olo tatoonu taa odunggaamu todalalo. Wonu taa mongohi salamu olemu, diila mao̒ poboyu u momaalasi salamulio. Tou̒ meidungga mota, hua̒a podutua tungguduu̒ towawaao̒ lowalao̒ boito.”

³⁰ Taabua boito loloi̒ya mao̒, “Paaa̒ Elisa! Domi Eeya tatumu-tumulo wau domi nyawa li Paaa̒, watia diila tamololaa mao̒ oli Paaa̒!” Sababu uito malo monggato tei Elisa wolo taabua boito ode belelio.

³¹ Tei Gehasi leimulo woli mongolio mota lopodutu mao̒ tunggudu lei Elisa towawaao̒ lowalao̒ boito, bo diaaluo tingohe meaalo tuoto uwewo deu̒ walao̒ boito tumumulai. Lapatao̒ malonao̒ tei Gehasi mota lodunggaya wolei Elisa wau loloi̒ya mao̒, “Walao̒ boito diila lobongu.”

³² Tou̒ leidungga mota ode bele lo taabua boito, tei Elisa tilumuwotao̒ tutuuwau ode delomo huwaliilio wau loo̒onto milate lowalao̒ boito balabalata toitaato tambati potuluhelo.

³³ Tei Elisa loheu̒tai huhebu tulusi lodua̒ mola ode Eeya.

³⁴ Lapatao̒ uito tio lotidambao̒ toitaato walao̒ boito wau lopo dembinga tunggilo, mato wau uluu̒lio ode tunggilo, mato wau uluu̒ lowalao̒ boito. Sababu tio lohutu mao̒ u odito, yi wawaao̒ lowalao̒ boito malopatu mai.

³⁵ Tei Elisa lobongu mola wau lonao̒ odito mota odia mai todelomo huwali boito, lapatao̒ luli lotidambao̒ towawaao̒ lowalao̒ boito. Pulitio mao̒ walao̒ boito loboolai poo̒opitu, wau lohulahei.

³⁶ Tei Elisa lopoa̒hu olei Gehasi lotiangai oliilo lowalao̒ boito, wau lapatao̒ ti ibu boito tilumuwotao̒, malo loi̒ya tei Elisa olio, “Utie walai̒ Ibu.”

³⁷ Ti Ibu boito losujudu lomola totalu lei Elisa lapatao̒ lodelo walai̒o ode bulemengio.

Duluo poli u moo̒linggolabe

³⁸ Tou̒ wakutu tuwau lotoduo mai baala lo polobiti to ngoilanggubu lipu. Yi tei Elisa luli lohualinga ode Gilgal. Tou̒ tio donggo hemo ngaajali to ngopolemboa̒ nabi, tio lopoa̒hu tamoomayawa olio mota lohama mai ulongo uleidaa̒ wau lotubu mao̒ ua̒alo ode limongolio.

³⁹ Tala ngota lomongo nabi boito yilumualao̒ ode halabolu mota lopeehu saayori, lapatao̒ tio loo̒dungga pilomulo lohuumayawa wolo bolongga u tohila-hilaalio. Tio lolipu mao̒ hungo lo pilomulo boito odaata-daatalo mao̒, wau dilelolio mai lohualingo. Diila otaawalio hungo wolo uito, tio malo muwo-muwongo wau helo potuwotao̒ ode delomo ulongo boito.

⁴⁰ Tou̒ lolutu mai, tio helo laya-layadeo̒ ode mongo nabi boito. Bo boheli yilamitao̒ limongolio ua̒alo boito, timongolio malo nguatia̒ odelei Elisa, “Paaa̒, utie peedi!” Timongolio diilalo lohuto lolamelo.

⁴¹ Yi tei Elisa lei̒hama mai labu ngoi̒di, tulusi pilomua̒yadio ode delomo ulongo boito. Lapatao̒ uito tio loloi̒ya, “Muli tayade mota utilubu boito.” Yi loi̒laalo mao̒ ua̒alo boito diilalo moo̒topotala.

⁴² Tou̒ wakutu tuwau uwewo, talolai̒ ngota lonao̒ mai lonto Baal-Salisa. Tio lodelo mai odelei Elisa pale u boheli tilotobio wau olo dulopulu lobotu roti u pilohutu lonto pale tilapulo bohulio losembo totaunu boito. Tei Elisa lopoa̒hu mao̒ tamoomayawa olio helo laya-layadeo̒ roti boito ode mongo nabi boito,

⁴³ bo tamoomayawa boito loloi̒ya mao̒, “Diila pongalo aakali moo̒tuheto ode tangohetuto lota.” Tei Elisa lolametao̒, “Tayadelo mao̒ alihu timongolio molamelo, sababu Eeya lotahuda mai deu̒ timongolio mamo lamelo wau lapatao̒ molamelao̒ donggo woluo labitio.”

⁴⁴ Tamoomayawa boito helo laya-layaadeo̒ ua̒alo boito ode limongolio, wau timongolio ngoa̒amilalo lolamelo. Lapatao̒ lolamelao̒ donggo woluo labitio debo odelo u tilahuda mai lo Eeya.