OLUO MONGO OLONGIA 3 - KITABI HABARI MOPIOHE

Popaatea towolota lo Isirai̒lu wau Moab

¹ To taunu opulaa walulio pamalenta lei Yosapat olongia lo Yehuda, tei Yoram walae̒e Ahab lowali olongia to Isirai̒lu wau helo malenta to Samaria mopulaa dulo taunu mola hiheolio.

² Tio helohutu u moleeto to bibilohu Eeya, bo tio diila debo odelo ololeeto lei Ahab woli Isebel, mongo dulaa̒lio. Bui̒ upilohutu liyamolio u polubowalo to Baal mailoobio.

³ Bo, debo odelo ti Olongia Yerobeam walae̒e Nebat tahe lomalenta tou̒ dipolulio mai tio, tio olo heloo̒ sababu taulo Isirai̒lu ilodusa wau diila lohuheli helohutu sua̒li boito.

⁴ Ti Olongia Mesa lonto Moab obibiahe himba. Odelo pomaayali beya odeli olongia lo Isirai̒lu, timii̒du taunu tio hemongohi mao̒ ngohetuto lihu walao̒ himba wau olo lambuto himba monto ngohetuto lihu himba ulai̒.

⁵ Bo lapatao̒ ti Olongia Ahab yilate mao̒, tei Mesa lomintaa̒ tingolo ode Isirai̒lu.

⁶ Sababu uito ti Olongia Yoram hua̒a lololaa mao̒ Samaria wau mola lopodapato ngoa̒amila hilaide lo popaatealio.

⁷ Tio lolao tahuli botie odeli Olongia Yosapat lonto Yehuda, “Ti Olongia lo Moab malo mintaa̒a tingolo to olaatia; wolo mowali Ito mopaatea pee̒-pee̒enta wolaatia moluwali olio?” “Ooo̒,” tametao̒ li Olongia Yosapat, “Watia wau tahidudua̒ wolaatia wau pasuukani owadala laatia mamodudua̒ wolo wutato.

⁸ Moli dalala toonu ito mamoluhu?” “Ito mamohama dalalo umoli huta datahu wau luasi udelita lo Edom,” tametao̒ lei Yoram.

⁹ Yi malo monggato ti Olongia Yoram woli olongia lo Yehuda wau ti olongia lo Edom. Lapatao̒ todelomo nonao̒ ngotilonggadu pitu hui mola, timongolio ilopulita lotaluhu, tilinggula pasuukani limongolio wau binatangi hepo mintaa̒alo balangi limongolio diila loo̒ wilu.

¹⁰ “Topotala ito!” uali Olongia Yoram. “Eeya malo lanjana mai u mohudu mao̒ olanto toulota odeli olongia lo Moab!”

¹¹ Ti Olongia Yosapat lohintu mao̒, “Wolo tewe diaaluo nabi tamowali pohintuwalo to Eeya ode olanto?” Tala ngota lo polowila lonto suludadu li Olongia Yoram lolametao̒, “Woluo tei Elisa walae̒e Sapati! Tio muloololio mai tamoomantua olei Elia.”

¹² “Otutu! Eeya memangi helo tahuda mai lotimbulude olio,” uali Olongia Yosapat. Yi malonao̒ mota olongia toulota boito odelei Elisa.

¹³ “Yilongola mei̒ tulungi olaatia?” ualei Elisa odeli olongia lo Isirai̒lu. “Ponao̒lo mota ode mongo nabi lomongo dulaa̒ limongoli!” “Diila!” ualei Yoram, “Sababu Eeyaalo talo lanjana mai u mohudu olamiaatia toulota odeli olongia lo Moab!”

¹⁴ Tei Elisa lolametao̒, “Domi Eeya tatumu-tumulo, tahe bayaa lowatia, watia moloi̒ya mai lou̒ diila aibu deu̒ wonu diila sababu ti Olongia Yosapat tahe hurumatio lowatia, watia diila mohuto mou̒luusania woli Tuani.

¹⁵ Botia delowalo mai ngotaalio lo tamooitohe kecapi.” Tou̒ tau boito donggo hemo poitoheo̒ lo kocapilio, tei Elisa kiluwaasa mai Rohu lo Eeya,

¹⁶ tilinggula tio loloi̒ya, “Uti-utieelo u tilahuda mai lo Eeya: ‘Pohutua mao̒ tataa-nggiyaalo to dutulaa u mohengu tohuta ohungaya u luasi botie.

¹⁷ Eleponu timongoli diila moo̒onto didi motuhutai meaalo dupoto mohiipo, bo taluhio mamolepatai todutulaa u mohengu tohuta ohungaya u luasi botie. Timongoli wolo bibiahi mongoli wau binatangi moodelowa balangi limongoli mamoo̒tapu taluhee u totoonggade u yilumolo motolu-toluulo mao̒.’ ”

¹⁸ Lapatao̒ ualei Elisa wumbutio mola, “Bo uito bo palakala kikiio̒ wambai̒o to Eeya. Eeya mamongohi mai olimongoli u moo̒haama totau-tawala lo Moab.

¹⁹ Ngoa̒amila kota limongolio u obiintengi wau hipiiohe mapo loohubuo limongoli; ngoa̒amila bungo lo ayu u hipomungoa matiboto limongoli, ngoa̒amila butu lotaluhu pambola limongoli, wau ngoa̒amila halabolu limongolio u molomiyodu mapai̒o limongoli wolo botu tunggula moruusa sama-samaata.”

²⁰ Loombulio mola, tou̒ helo podewo bake dimodupo, maa tilumolohei taluhee lonto mantahu Edom tilinggula lopolu lomola dutulaa mohengu tohuta ohungayo u luasi boito.

²¹ Tou̒ taulo Moab loo̒dungohe deu̒ olongia toulota boito malonao̒ mai loluhu, yi ngoa̒amila tau – monto tahulango daa demola tahumula daa̒ – taa mowali momota tingolo, tiliyango lotia̒mbu wau pilo tambatilio to sipatana.

²² Loombulio mola, tou̒ timongolio lobongu mai dumodupo, mato lodulahu lotinelai totudu lotaluhu tilinggula oontonga meela debo odelo duhu.

²³ Timongolio longuatio̒, “Duhu! Tantulo mao̒ mongo pajule lonto otolu pasuukani lomusu malo loohulua wau tinggai lopaatea yila yilateelo mao̒! Dulo ito mota molambato kema limongolio!”

²⁴ Bo tou̒ tau-tauwalo Moab boito leidungga mota tokema boito, timongolio tilumouli tiluhu mai lotau Isirai̒lu u tulusi lomaju hemo hilapita sambela helomate olimongolio yila-yilateelo mao̒

²⁵ wau helopo aantulu kokoo-tawaalo limongolio. Timii̒du halabolu u molomiyode uilaode limongolio, hepilai̒ limongolio wolo botu. Pulitio mao̒ ngoa̒amila halabolu leipambolo wolo botu. Tau-tauwalo Isirai̒lu olo helo mambolao̒ ngoa̒amila butu lotaluhu wau lotibotao̒ bubuu-ngowaalo ayu moomungoa. U leitolaa bo kota Kir-Hareset wambao̒, tiilo lokota Moab. Pulitio mao̒ boli kota boito olo bilalaa wau pilai̒ lobotu lotahi pomai̒yawa wolo tali u tiluanga botu.

²⁶ Tou̒ longalati mai deu̒ tio diilalo moo̒ tahangi, yi ti olongia lo Moab lodelo mota pajule pitu lohetuto lota tamoolato mopohuna wamilo, lapatao̒ helo tolopani tilumuwotao̒ ode biintengi li olongia Edom, bo diila ilohaasili.

²⁷ Sababu uito tio lohama walao̒ talolai̒ li olongia, tulusi lopodewo olio toitaato dingingo meeseli lokota odelo bake ode dewa Moab. Yi mailoohe tau-tauwalo Isirai̒lu, tilinggula timongolio helo potouli pasuukani limongolio lonto kota boito tulusi lohualinga ode lipu limongolio.