OLUO MONGO OLONGIA 25 - KITABI HABARI MOPIOHE

Yerusalemu lodehu

¹ Lapatao̒ tei Jedekia helo mintaa̒a tingolo to olei Nebukadnejar olongia lo Babel. Sababu uito tei Nebukadnejar wolo ngoilanggubu hilaide lo popaatealio lonao̒ mai wau heloluhu Yerusalemu todulahe opolulio wau hulalo opululio todelomo taunu otiolio pamalenta lei Jedekia. Timongolio lopo tihulao̒ malakasi to bulemengo kota, lomongu dingingo meeseli pomalawalo,

² wau tulusi helomala kota boito demola taunu opulaa tuwau pamalenta lei Jedekia.

³ Todulahu otiolio hulala opatio taunu boitolo tou̒ baala lopolobiti malo laba-labaalo tilinggula ulipu madiilalo o ua̒alo sama-samaata,

⁴ dingingo meeseli lokota heiruusa lomusu. To hui boito, eleponu taulo Babel donggo hemomala kota boito, ngoa̒amila suludadu lo Yehuda loo̒lahi lotidulunga ode Lumbaya Yordan. Timongolio helohaama dalalo loli ilengi u pilomuloa wolo bubuu-ngawaalo wau uwewolio mao̒ lobele biluloa̒ saaha li olongia, tulusi yilumuala loli huhebu hulubangi u helo pohumbuta oluo lodingingo meeseli totambati boito.

⁵ Bo suludadu lo Babel helo hilapita oli Olongia Jedekia, wau loheu̒pa olio todatahu lo Yerikho. Ngoa̒amila tahidudua̒ olio tilumeteo̒ lololaa mao̒ olio.

⁶ Lapatao̒ ti Olongia Jedekia dilelolio mola odelei Nebukadnejar tokota Ribla, tulusi dilehualio hukuumani.

⁷ Mongo walai̒o hepilatelio yila-yilateelo mao̒ totalu lomatolio. Lapatao̒ uito mato lei Jedekia yiluo̒ohu, tulusi pilungu wau dilelio mola ode Babel.

Bele lo Eeya ilaantulio

⁸ To dulahu opitulio hulala olimolio todelomo taunu opulaa tio pamalenta lei Nebukadnejar olongia lo Babel, malonao̒ mai ode Yerusalemu ngotaalio tai̒lunte Nebujaradan. Tio yito tamoo-nasehatia wau eyaanggu lo suludadu lei Nebukadnejar.

⁹ Tei Nebujaradan helomobu Bele lo Eeya, bele biluloa̒ saaha li olongia, wau ngoa̒amila bele lo tahimuloa lo ulipu to Yerusalemu.

¹⁰ Lapatao̒ ngoa̒amila tahidudua̒ olio helo poloohubeo̒ didii-ngingaalo meeseli tokota boito.

¹¹ Tulusi ulipu tadonggo woluo tokota, deu̒yito-yito tahi aahali mokalaja tailolabita, tau-tauwalo tahi mosikinia wau tau-tauwalo tahe loo̒teteo̒ lotiwambao̒ ode taulo Babel, ngoa̒amilalo hebilintai̒o mola ode Babel lei Nebujaradan.

¹² Bo ngotayadu lo ulipu tamosikini daa̒ wau tadiila ohalata tilolaalio mao̒ to Yehuda wau ilahulalio helo kalaja ilengo lo angguru wau hahaa-laaboluwalo.

¹³ Wowoo-lihiyaalo polunggu wau kakaa-letaalo to Bele lo Eeya pee̒-pee̒enta wolo ginti polunggulio hepiloo̒ taulo Babel, tulusi ngoa̒amila polunggulio bilintai̒o mola ode lipu limongolio.

¹⁴ Timongolio olo helo mintaa̒a mota babaa-langiyalo botie: sisii-kopuwaalo, tambati wahu lomesba, pakaa-kasiyaalo lotohe, mamaa-nggowaalo u polanggomo duhu lo binatangi u iloloto duo̒lo bake, mamaa-nggowaalo u pomobuwalo dupa, wau ngoa̒amila balangi lo polunggu wewolio u hepomake duo̒lo upacala poi̒baadatialo.

¹⁵ Babaa-langiyalo hulawa wau talaa̒, leituwoto manggo kekeei̒ wau pipii-nggeyaalo duo̒lo bohu hilama lei Nebujaradan lohihilao.

¹⁶ Babaa-langiyalo polunggu u hepilohutu li Olongia Salomo ode Bele lo Eeya, duu̒yito-yito wolihi duluo, kakaa-letaalo wau ginti leidaa̒, ngoa̒amilalo odito buheetio tilinggula diila otimenga.

¹⁷ Wolihi duluo lo polunggu boito tutuuwauwa; langgatio tinggai walu lomeeteri wolo ngoputu tau̒wa lowolihi lonto polunggu ngoilanggata tuwau koma tolo meeteri. To palito lotimii̒du tau̒wa lowolihi boito ohalamo wolo poromu hungo lodalima lonto polunggu.

Taulo Yehuda hebilintai̒o ode Babel

^18-19 Wewolio leeto, tei Nebujaradan loheu̒pa oli Iimamu Daa̒ Seraya, Sepanya iimamu tamoo-mantua, toulota tamoo-dahawa huhebu Bele lo Eeya, limo lota tamoo-nasehatia batanga hihilao li olongia tadonggo woluo tokota, eyaanggu, wakili li eyaanggu tahemo nguurusi administrasi lo suludadu, wau wolomo pulu lota taduduulaa̒ lo ulipu wewolio.

²⁰ Ngoa̒amila tau boito dilelolio mola odeli Olongia Nebukadnejar tokota Ribla,

²¹ tomadala Hamat. Mola teto timongolio hesilii-kisaalio wau pilatelio yila-yilateelo mao̒. Odi-odieelo mola tau-tauwalo Yehuda hebilintai̒o lonto lipu limongolio wau dilelolio ode polayahu.

Tei Gedalya gubolonulu lo Yehuda

²² Lapatao̒ uito ti Olongia Nebukadnejar lomudua̒a olei Gedalya walae̒e Ahikam wau wombu lei Sapan, lowali gubolonulu to Yehuda u lomalenta to ngoa̒amila taa udonggo leitolaa mola teto.

²³ Tou̒ mongo polowila wau pajule lo Yehuda tadiila taa̒aluku loo̒dungohe pasali lo polimudua̒ to Babel boito, yi timongolio lonao̒ mai odelei Gadalya to Mispa. Mongo polowila boito yito tei Ismai̒lu walae̒e Netanya, tei Yohanan walae̒e Kereah, tei Seraya walae̒e Tanhumet lonto kota Netopa, wolei Yajanya lonto kota Maakha.

²⁴ Malo loi̒ya mao̒ tei Gedalya ode limongolio ngoa̒amilalo, “Timongoli diila palalu moohe to taduduulaa̒ pomalenta lo Babel. Poti biluloo̒lo wambao̒ to lipunto botie wau potiwaliilo mola wato li olongia lo Babel. Pongakua mai laatia deu̒ timongoli mamoa̒ahu.”

²⁵ Bo to hulalo opitulio taunu boito tei Ismai̒lu walae̒e Netanya wau wombu lei Elisama tadonggo wali mola li olongia, lonao̒ mota pee̒-pee̒enta wolo tamopulu lota ode Mispa. Timongolio loluhu wau helomate yila-yilateelo mao̒ olei Gedalya wolo taulo Yehuda wau taulo Babel tawoluo mota teto pee̒-pee̒enta wolei Gedalya.

²⁶ Yi ngoilanggubu ulipu lo Yehuda, kaya boli mosikini, pee̒-pee̒enta wolo mongo polowila tilumetea̒ ode Masiri sababu moohe to taulo Babel.

Tei Yoyakhin yilopatio lonto tutupa

²⁷ To dulahu odulo pulaa pitu hulalo opulaa duluo todelomo taunu otolo pulaa pitu lapatio mao̒ tei Yoyakhin bilintai̒o mota ode polayahu, tei Ewil-Moredakh lowali olongia lo Babel. To taunu boitolo tio helo poi̒laalo odehu hilaalio to olei Yoyakhin, wau lolopata olio lonto tutupa,

²⁸ wau helohutu mao̒ olio lou̒ mopiohe. Tei Yoyakhin yilohiyalio huhuloa̒ lebe lailaio̒ wolo mongo olongia wewo tahe pilolayahu olo ode Babel.

^29-30 Tei Yoyakhin diilalo lomake pakeyangi lotutupa wau biasaalio hemo lamelo tobele biluloa̒ saaha li olongia boli heilohia doi u palalu potumulio. 85