OLUO MONGO OLONGIA 23 - KITABI HABARI MOPIOHE

Tei Yosia lopodiaaluo polubowalo dewa

¹ Ti Olongia Yosia helo tiangai ngoa̒amila tau̒wa lo Yehuda wau Yerusalemu.

^2-3 Lapatao̒ tio lonao̒ woli mongolio ode Bele lo Eeya, hetilunuhe lomongo iimamu, mongo nabi wau ngoa̒amila ulipu, mopio tamosikini boli taakaya. Totalu limongolio ngoa̒amila, totili lowolihi polumudu u tolomodu odeli olongia, ti olongia tilimihula mola wau helo pobaca mao̒ wolo suala daa̒ ngoa̒amila tuango buku daantia umaa ilodungga todelomo Bele lo Eeya. Lapatao̒ ti olongia helohutu daantia wolo Eeya u modungohe to Eeya, wau moponao̒ wolo lealeaatu lohilao wau ngoilanggubu jiwa ngoa̒amila palenta wau bubuu-too̒waalo Eeya. Ti Olongia olo helodanti u mopoo̒polu mao̒ danti to daantia lo Eeya wolo umati-Lio utula-tuladee todelomo buku boito. Ngoilanggubu ulipu lodudua̒ lodanti u modungohe to daantia boito.

⁴ Lapatao̒ uito ti olongia helo malentao̒ oli Iimamu Daa̒ Hilkia, mongo iimamu tamoo-mantua wau tahi pokawalia tao̒ tuugasi tohuhebu Bele lo Eeya, alihu mopolualao̒ monto Bele boito ngoa̒amila pakaakasi u pilomake hepo lubowalo Baal, Dewi Asyera, wau popoo-liyamaalo. Ngoa̒amila balangi boito hepilobu li Olongia Yosia to bulemengo kota totili lo Lumbaya Kidron, tulusi wahulio dilelio ode Betel.

⁵ Tio helo pohinggi mongo iimamu piluduo̒ lomongo olongia lo Yehuda u motuugasi totambati polubowalo dewa to kokoo-tawaalo Yehuda wau topalito Yerusalemu; wau olo mongo iimamu tahe lopodewo bake ode Baal, mato lodulahu, hulalo, planeti wau popoo-liyamaalo.

⁶ Bui̒ lo Dewi Asyera yiluwalio lonto Bele lo Eeya, wau dilelio ode bulemengo kota ode Lumbaya Kidron. Mola teto bui̒ boito pilobulio, lapatao̒ dui̒itio heilobui̒o loa̒aluti, daa̒ wau wahulio hepilo mua̒yadu toitaato kuubulu lotaa dadaata.

⁷ Huhuu-waliyaalo todelomo Bele lo Eeya u pilomake lomongo suuntali lokuili u hipohutua suuntali odelo tamoo-lubowa to dewa, ilaantulio. (To huhuu-waliyaalo boito mongobua hipoheola kaingi u hepomake todelomo polubowalo to Dewi Asyera.)

^8-9 Ngoa̒amila iimamu tahi biluloa̒wa to kokoo-tawaalo Yehuda hepilei̒ nao̒wa mai lei Yosia ode Yerusalemu, tulusi penu boli to utoonulalo mao̒ to ngoilanggubu lipu lo Yehuda tio helo ponajisi memees-bawaalo dewa tou̒toonu mongo iimamu boito malo podewo bake. Mongo iimamu boito diila yilohilio helohutu ibaadati todelomo Bele lo Eeya. Bo, timongolio mowali molamelao̒ roti diila oragi upilopo dapato ode mongo tamani limongolio. Memees-bawaalo upilopo tolomudu ode polubowalo todewa totili lo Hulubangi Yosua, uhuuhuhu lokota boito, heiloohubio. Hulubangi boito dudutuulio to ambahu oloihi lo Hulubangi Tau̒wa todalalo tumuwota ode kota.

¹⁰ Topet, deu̒yito-yito tambati polubowalo dewa to Lumbaya Hinom, pilopo najisilio. Lou̒ odito madiduu̒ taa umoo̒ podewo walai̒o odelo bake yilalango ode Dewa Molokh.

¹¹ Ngoa̒amila wadala upilopo tolomodu lomongo olongia lo Yehuda u polubowalo ode mato lodulahu hetilapilio, wau kakaa-letaalo u pilomake todelomo polubowala boito hepilobulio. (Kakaa-letaala boito woluo to paango Bele lo Eeya – totili lohuhebu hulubangi – diila molaminga monto duduu-ledehuwalo tambati biluloa̒ lei Natan Melekh, ngotaalio lo pogawee talailaio̒.)

¹² Memees-bawaalo u bilongu mongo olongia lo Yehuda to watopo toitaato huhuu-waliyaalo li Olongia Ahas, ilaantululio. Wau olo memees-bawaalo u pilotihuli Olongia Manasye todulo paango Bele lo Eeya, ilaantulu lei Yosia, tulusi tilapilio ode Lumbaya Kidron.

¹³ Wau olo memees-bawaalo to wimbihu tiimuru lo Yerusalemu, to ambahu huliaalio lo Huludu Ololeeto hepilo najisilio. Memees-bawaalo boito hepilo tihuli Olongia Salomo u polubowalo dedeewaalo u moo̒jijio̒ – deu̒yito-yito Asytoret dewi bangusa lo Sidon, Kamos dewa bangusa lo Moab, wau Milkom dewa bangusa Amon.

¹⁴ Tutuu-guwaalo dewa wau bui̒ Dewi Asyera he ilantululio, tulusi huta tou̒toonu tutuu-guwaalo wau bubuu-iyaala boito pilotihulo, hetilambula lei Yosia wolo tutuu-lalowaalo manusia.

¹⁵ Tio olo helo ngaantulu tambati polubowalo to Betel u pilotihuli Olongia Yerobeam walae̒e Nebat – olongia tamaloo̒ sababu taulo Isirai̒lu helohutu dusa. Lapatao̒ tei Yosia helomoo̒ mesba totambati polubowala boito, wau lomobu mao̒ pee̒-pe̒enta wolo bui̒ Dewi Asyera uwoluo teto.

¹⁶ Lapatao̒ tei Yosia loili mota, wau loo̒onto mola dengolo kuubulu toitaato hui̒du. Yi tio lopoa̒hu tau mola lomonggari kuubulu boito, wau lopolualai tutuu-laloolio tulusi lolumbilao tomesba u donggo tumbi-tumbila boito. Odi-odieelo mola dudeloolio tio helopo najisi mesba boito. Yi lotoduwolo mola wolo u mailaamali muloololio mai linabi lo Eeya tou̒ ti Olongia Yerobeam donggo tihu-tihula totili lomesba boito tou̒ orameyangi tuwau. Lapatao̒ uito ti Olongia Yosia luli loo̒onto kuubulu tuwau uwewo poli.

¹⁷ Yi tio lohintu mao̒, “Kuubulu lo tatoonu utie?” Tau-tauwalo Betel helo lametao̒, “Uito kuubulu ngotaalio nabi lo Eeya tapee̒enta lonao̒ mai odia lonto Yehuda, wau helo laamali susuu-aliyaalo ubohu wambai̒o. Pohutuwalo li Baginda ode mesba botie.”

¹⁸ “Diila mao̒ pongola-pongola kuubulu boito,” palenta mao̒ li olongia. “Huliilo mao̒ tutuu-laloolio teto, diila mao̒ limbata!” Yi tutuu-laloowalo linabi lonto Yehuda boito diila he pilongoolalio; odito olo tutuu-lalowaalo linabi lonto Samaria tailobungio teto.

¹⁹ To timii̒du kota to Isirai̒lu, ti Olongia Yosia helo poloohubeo̒ ngoa̒amila tambati polubowalo dewa u bilongu lomongo olongia lo Isirai̒lu, wau umaloo̒ sababu Eeya malo muluka. Wolo u mapilohutu li Olongia Yosia to Betel, uito hepilo hutulio olo to memees-bawaalo to ngoilanggubu Isirai̒lu.

²⁰ Ngoa̒amila iimamu tahi otuugasia to tataa-mbatiyalo polubowalo dewa hepilatelio yila-yilateelo mao̒ to memees-bawaalo tou̒toonu timongolio otuugasi. Wau timii̒du mesba boito tei Yosia helomobu tutuu-laloowalo manusia. Lapatao̒ uito tio luli lohualinga ode Yerusalemu.

Tei Yosia helo porame Paska

²¹ Lapatao̒ ti Olongia Yosia lomalentao̒ ulipu helo porame Paska debo odelo u tulatuladee todelomo buku Daantia Wolo Eeya. Lou̒ odito timongolio helo hurumati to Eeya, Allahu Taa̒ala limongolio.

²² Tumulalo mao̒ tomaasa bangusa lo Isirai̒lu hepilarenta lo paapahaa-lawaniyalo diipo pee̒enta mao̒ woluo olongia lo Isirai̒lu meaambo olongia lo Yehuda tahe loporame Paska debo odelo uito.

²³ Bo totaunu opulaa walu pamalenta lei Yosia boito deu̒ito Paska luli hepilopo ramelio to Yerusalemu u mohurumati to Eeya.

Poopolo-bohuwaalo wewo lei Yosia

²⁴ U moponao̒ bubuu-too̒waalo u tulatulade todelomo buku u ilodungga li Iimamu Daa̒ Hilkia to Bele lo Eeya, ngoa̒amila tamoo-tiangawa aruwa wau tamoo-laamalia pilopolahi li Olongia Yosia lonto Yerusalemu wau lonto ngoilanggubu Yehuda, tulusi hetilapilio ngoa̒amila dewa u motuhatawa wolo uruusani, balaahala, wau babaa-langiyalo u pilomake polubowalo dedeewaalo.

²⁵ Diipo pee̒enta mao̒ woluo olongia debo odelo ti Olongia Yosia tahe lotiwato to Eeya wolo lealeaatu lo hilaalio, wau helo poi̒laalo uito todelomo dudelo tutumulo wau huhutuulio, lotuuu̒de wolo ngoilanggubu butoo̒ uwoluo todelomo Buku lei Musa. Lapatao̒ ti Olongia Yosia olo, diduu̒ mao̒ olongia tadebo odelo tio.

²⁶ Bo huhutu li Olongia Manasye maloo̒ toodei omuluka lo Eeya ode Yehuda; wau omulukaa-Lio boito diipo lopulito.

²⁷ Eeya lotahuda mai, “Wolo u mapilohutu-U̒ ode Isirai̒lu, mapo hutuwo-U̒ ode Yehuda. Taulo Yehuda matapilo-U̒ monto lipu uilohi-U̒ mai ode limongolio. Wau̒ madiilalo mololimo Yerusalemu, kota u tilulaotu-U̒, wau olo bele-U̒ botie, umodudua̒ tahudaa-U̒ mamowali tambati poi̒baadatiala ola-U̒.”

Pulito pamalenta lei Yosia

^28-30 Ti Olongia Yosia yilate todelomo popaatea to Megido tou̒ tio mola loluhu olei Nekho, olongia lo Masiri, tadonggo majumaju wolo pasuukanilio u momantu oli olongia lo Asyur tobiihu Dutulaa Eperat. Milate li Olongia Yosia hilama lomongo pogaweelio tulusi dilelolio wolo kaleta ode Yerusalemu. Mola teto tio yilobungio to polobunga mongo olongia. Lapatao̒ ulipu lo Yehuda lolulaoto wau lomudua̒a olei Yoahas walai̒o talolai̒ lowali olongia lobuulota wolio. Hikaayati wewolio tomimbihu li Olongia Yosia tiluladu todelomo buku Sojara Mongo olongia lo Yehuda.

Tei Yoahas olongia lo Yehuda

³¹ Tei Yoahas o umulu dulo pulaa tolo taunu tou̒ tio lowali olongia lo Yehuda, wau tio helo malenta to Yerusalemu tolo hula mola hiheolio. Tiilolio ilunte Hamutal walae̒e Yeremia lonto kota Libna.

³² Tei Yoahas ilodusa to Eeya debo odelo loluuhurulio.

³³ Pamalenta lei Yoahas lopulita tou̒ tei Nekho olongia lo Masiri lolawalao̒ olio to Ribla, tomadala Hamat, wau helo makusao̒ Yehuda momaayali doi hulawa wau uwewolio mao̒ uwajibu ode olio ngodaata tolo lihu wopato hetuto kilo talaa̒ wau tolo pulaa pato kilo hulawa.

³⁴ Lapatao̒ ti Olongia Nekho lomudua̒a walao̒ talolai̒ lei Yosia tai̒lunte Elyakim lowali olongia lo Yehuda wau lolomelao̒ tanggulei Elyakim lowali Yoyakim. Tei Yoahas dilelolio ode Masiri wau tio yilate mola teto.

Tei Yoyakim olongia lo Yehuda

³⁵ U momayaali doi hulawa wau uwewolio mao̒ uwajibu odeli olongia u hepilohile wolo moo̒ohuu̒ li olongia lo Masiri, ti Olongia Yoyakim helo himoa̒a beya lonto ulipu lodudua̒ u omamboa limongolio ngota-ngota.

³⁶ Tei Yoyakim o umulu dulo pulaa limo lotaunu tou̒ tio lowali olongia lo Yehuda, wau tio helo malenta to Yerusalemu mopulaa tuwau lotaunu mola hiheolio. Tiilolio ilunte Jebuda, walae̒e Pedaya lonto kota Ruma.

³⁷ Tei Yoyakim ilodusa to Eeya debo odelo loluuhurulio.