OLUO MONGO OLONGIA 22 - KITABI HABARI MOPIOHE

Tei Yosia olongia lo Yehuda

¹ Tei Yosia o umulu walu lotaunu tou̒ tio lowali olongia lo Yehuda, wau tio helo malenta to Yerusalemu tolo pulaa tuwau lotaunu mola hiheolio. Tiilolio ilunte Yedida walae̒e Adaya, lonto Bojkat.

² Tei Yosia helohutu uloo̒ sanangi hilaa lo Eeya. Tio loo̒baaya oli Olongia Dauda loluuhurulio, wau helo dungoheo̒ ngoa̒amila butoo̒ Allahu Taa̒ala wolo lealeaatu lohilao.

Buku bubuu-too̒waalo Eeya luli ilodunggaalio

^3-4 Ti Olongia Yosia o ngotaalio dulutuli lolipu tai̒lunte Sapan walae̒e Ajalya, wombu lei Mesulam. Totaunu opulaa walu pamalenta li Olongia Yosia, ti olongia longohi mao̒ palenta botie ode dulutuliilio boito, “Ponao̒lo mota odeli Iimamu Daa̒ Hilkia to Bele lo Eeya, wau pohilea mao̒ olio u mongohi mai lapuurani pasali lojumulaa doi u mailimoo̒ lomongo iimamu tao̒ tuugasi tohuhebu potuwotalo ode Bele lo Eeya.

⁵ Ahuli mao̒ tio mongohi doi boito ode tahi pongimatoa kalaja lo tahemo poo̒piohe Bele lo Eeya. Timongolio musi mopohuna doi boito u pomaayali wuupa

⁶ tomongo pani lo ayu, pani lohudungo, wau pani lobotu, wau motali ayu wau botu u palaluwolo.

⁷ Tahi pongimatoa kalaja boito hijuujurua daa̒, oditolio diila palalu pohileaala lopuurani lodoi monto olimongolio.”

⁸ Tei Sapan lopo tunggulao̒ palenta li olongia odelei Hilkia, tulusi tei Hilkia lohungguli mao̒ odelei Sapan deu̒ tio maloo̒ dungga buku bubuu-too̒waalo Eeya to Bele lo Eeya. Tei Hilkia longohi buku boito odelei Sapan wau tei Sapan lopobaca mao̒.

⁹ Lapatao̒ uito tei Sapan luli lohualinga mota odeli olongia wau lopo duloheo deu̒ doi u tahutahu to Bele lo Eeya mahilama wau yiludu mai lomongo wato li olongia ode tahi pongimatoa kalaja lo tahemo poo̒piohe Bele lo Eeya.

¹⁰ Lapatao̒ tei Sapan loloi̒ya mao̒, “Tei Hilkia longohi mai buku botie ode laatia.” Tulusi tei Sapan lopobaca mao̒ buku boito odeli olongia.

¹¹ Loo̒dungohe tuango buku boito, ti olongia longai-ngaidinga pakeyangilio sababu siluukali lohilao.

¹² Lapatao̒ ti olongia helongohi mao̒ palenta botie odeli Iimamu Hilkia, olei Ahikam walae̒e Sapan, olei Akhbor walae̒e Mikha, olei Sapan dulutuli lolipu, wau olei Asaya polowila tahe pomantu li:

¹³ “Ponao̒lo mota mohintu ode Eeya tomimbihu olau̒ wau ode ngoilanggubu ulipu lo Yehuda tomimbihu tuango buku botie. Eeya lomuluka mai to olanto sababu loluuhurunto diila helo ponao̒ papaa-lentawalo u hituladee todelomio.”

¹⁴ Yi malonao̒ tei Hilkia, Ahikam, Akhbor, Sapan wolei Asaya helohile potuhata totaabua ngota tai̒lunte Hulda. Tio ngotaalio lonabi tabilu-biluloa̒ to kambungu bohu to Yerusalemu. Dilelio tai̒lunte Salum walae̒e Tikwa, wombu lei Harhas; tio tamoo-ngulusia pakeyangi lo ibaadati to Bele lo Eeya. Tou̒ ti Hulda loo̒dungohe tombangi mongolio,

¹⁵ yi tio lopoa̒hu mao̒ olimongolio luli lohualinga odeli olongia wau lopo tunggulao̒

¹⁶ tahuda lo Eeya botie: “Wau̒ mamo hukuumani mai Yerusalemu wau ngoilanggubu ulipulio debo odelo u malei tuladee todelomo buku u boheli pilobaca mao̒ li olongia.

¹⁷ Timongolio malo lolaa mao̒ ola-U̒ wau helo podewo bake ode ila-ila wewo. Ngoa̒amila u hepilohutu limongolio loo̒toodei omulukaa-U̒. Wau̒ lomuluka mai ode Yerusalemu, wau omulukaa-U̒ diila mowali poo̒oleelo.

¹⁸ Bo tomimbihu li Olongia Yosia, utieelo tahuli-U̒ mai, Eeya, Allahu Taa̒ala lo Isirai̒lu, ‘Lapatao̒ yio̒ moo̒dungohe wolo u leituladu todelomo buku boito,

¹⁹ yio̒ mamolee̒ wau motidupapa lo batanga totalu-U̒. Wau̒ malo nganjamu u mohukumani mao̒ Yerusalemu wau ulipulio. Wau̒ mamopowali mao̒ kota boito tuwaulio polobilohe umoo̒ tihela hapato, wau tanggulo Yerusalemu mapowaliyo-U̒ mao̒ tanggulo laa̒anati. Bo tou̒ yio̒ modungoheo̒ pasali lo aanjamu-U̒ boito yio̒ mahumoyongo wau mongaidinga pakeyangimu tuotio suukali. Wau̒ malo dungohe dua̒amu,

²⁰ sababu uito hukumani ode Yerusalemu diila tapodehuwo-U̒ mai ngotilonggadu yio̒ donggo tumutumulo. Yio̒ mamaate wolo dame.’ ” Yi malo hualinggo mongo utolia boito odeli olongia wau helo potunggulao̒ tahuli boito.