OLUO MONGO OLONGIA 2 - KITABI HABARI MOPIOHE

Tei Elia bilinta-I̒o mola ode sologa

¹ Malei dungga wakutuulio Eeya mamomintaa̒ mola olei Elia ode sologa wolo motimbulude todupoto huloyongo. Tou̒ boito tei Elia wolei Elisa malo monggato lonto Gilgal,

² wau tohuungo dalalo tei Elia loloi̒ya mao̒ odelei Elisa, “Poti biluloo̒po tewe. Wau̒ ilahula lo Eeya monao̒ ode Betel.” Bo tei Elisa lolametao̒, “Domi Eeya tatumu-tumulo wau domi nyawa li Paaa̒, watia diila tamololaa mao̒ oli Paaa̒.” Oditolio timongolio pee̒-pee̒enta lopo tolonga lononao̒ limongolio demola Betel.

³ Ngopolemboa̒ lonabi tahi biluloa̒wa mota teeto lodunggaya wolei Elisa wau lohintu mao̒, “Wolo otaawamu deu̒ todulahee botie ti tuanimu mamololaa mao̒ olemu sababu mabintao̒ mola lo Eeya?” “Ooo̒, otaawa laatia,” tametao̒ lei Elisa. “Bo sambelolo, sambelo ito mobisala pasali leeto.”

⁴ Lapatao̒ malo loi̒ya tei Elia odelei Elisa, “Poti biluloo̒po tewe, wau̒ ilahula lo Eeya monao̒ ode Yerikho.” Bo tei Elisa lolametao̒, “Domi Eeya tatumu-tumulo wau domi nyawa li Paaa̒, watia diila tamololaa mao̒ oli Paaa̒.” Oditolio timongolio duulota lopo tolonga lononao̒ limongolio demola Yerikho.

⁵ Ngopolemboa̒ lonabi tahi biluloa̒wa mota teto lodunggaya wolei Elisa wau lohintu mao̒, “Wolo otaawamu deu̒ todulahee botie tituanimu mabintao̒ mola lo Eeya Allahu Taa̒ala wau mamololaa mao̒ olemu?” “Ooo̒, otaawa laatia,” tametao̒ lei Elisa, “Bo sambelolo, sambelo ito mobisa pasali leeto.”

⁶ Lapatao̒ malo loi̒ya tei Elia olei Elisa, “Poti biluloo̒po tewe. Wau̒ ilahula lo Eeya monao̒ ode Dutulaa Yordan.” Bo tei Elisa lolametao̒, “Domi Eeya tatumu-tumulo wau domi Nyawa li Paaa̒ watia diila tamololaa mao̒ li Paaa̒.” Yi timongolio lopo tolonga lononao̒ limongolio demola Dutulaa Yordan,

⁷ wau limo pulu lota nabi tahidudua̒ olimongolio. Lapatao̒ tei Elia wolei Elisa lohuheli tobiihu dutulaa, wau talimo lopulu lota nabi boito hutihula diila ngoolo mao̒ lamingio lonteeto.

⁸ Tei Elia lohinggi jumbalio, tulusi lolilibeo̒ wau lopo molotao̒ toitaato taluhu lodutulaa boito. Yi taluhu dutulaa boito lotayade duluo, tilinggula tio wolei Elisa loo̒ nao̒ towamoo̒ u mohengu.

⁹ Tou̒ malei dungga mola ode ngotuali, tei Elia loloi̒ya mao̒ odelei Elisa, “Pohileaalo wolo u otohilaamu monto olau̒ tou̒ wau̒ diipo bintao̒ mola lo Eeya wau mololaa mao̒ olemu!” Tei Elisa lolametao̒, “Powarisiyalo mai olaatia kawasa li Paaa̒, alihu watia mowali mobuulota woli Paaa̒.”

¹⁰ “Waa, uito mototoola daa̒,” ualei Elia mao̒, “Bo wonu yio̒ moo̒onto olau̒ tou̒ wau̒ bintao̒ mola lo Eeya, hihiilemu boito mawoluo mai. Wonu diila oontongamu, hihiilemu boito diila tawoluo mai.”

¹¹ Sambela hinao̒wa, timongolio duulota tulusi hibisalawa. Debolo kaleta tuwau otulu udede-dedeea̒ towadala otulu mai lopobua̒ olimongolio duulota lapatao̒ tei Elia bilintaa̒a mola lodupoto huloyongo ode sologa.

¹² Tei Elisa loo̒onto mao̒ olio tulusi longiibode, “Elia, Paaa̒au̒! Paaa̒au̒! Tamoo-duo̒lawa Isirai̒lu tamolotolo boli buheli! Ti Paaa̒ madiduu̒!” Yi mailoolilo mola tei Elia to bibilohio lei Elisa. Wolo suukali lohilao tei Elisa longaidinga jumbalio lowali dulopita,

¹³ tulusi lohama mao̒ jumba lei Elia ulodehu. Lapatao̒ uito tio luli lohualinga mota tilimihula tobiihu Dutulaa Yordan,

¹⁴ tulusi lopo molotao̒ jumba lei Elia boito toitaato taluhu wau loloi̒ya, “Tou̒toonu Eeya, Allahu Taa̒ala lei Elia boito?” Lapatao̒ tio lopo molotao̒ jumba boito toitaato taluhu dutulaa boito, yi taluhu lotayade duluo wau tio lonao̒ ode ngotuwali.

¹⁵ Talimo lopulu lota nabi to Yerikho boito loo̒onto olio, tulusi malo loi̒ya, “Kawasa lei Elia malo limbatao̒ odelei Elisa!” Timongolio lotahudei olio tulusi losujudu lomola totalulio,

¹⁶ wau loloi̒ya mao̒, “Amiaatia woluo limo lopulu lota, ngoa̒amila hilootola. Sababu uito, duloolo ito mololohe olei Elia oli tuanimu. Tanu Rohu lo Eeya malodelo mola olio ode hui̒dee meaalo ode lumbaya, lapatao̒ lololaa mao̒ olio teto.” “Sambelolo!” tametao̒ lei Elisa.

¹⁷ Bo timongolio debo tulusi hemo huntulo tilinggula ilakololio. Yi malonao̒ talimo lopulu lota nabi boito mola lololohe olei Elia ngotilonggadu tolohui mola, bo timongolio diila loo̒dungga olio.

¹⁸ Lapatao̒ timongolio luli lohualingai odelei Elisa udonggo yimayima to Yerikho. “Diila mapilolele mai lowatia deu̒ timongoli diilalo poonao̒?” ualei Elisa ode limongolio.

Momoo̒o-linggolabeyalo u hepilohutu lei Elisa

¹⁹ Dengolo lota talonto Yerikho lonao̒ mai odelei Elisa wau loloi̒ya mao̒, “Paaa̒, debo odelo u iloontonga li Paaa̒ lohihilao, kota botie mopiohe, bo taluhio diila mopiohe wau heloo̒ sababu mongobua tahi ombodaa̒awa, eenggila.”

²⁰ “Hamaawa mai manggo udonggo bohu,” ualei Elisa, “wau dutua mao̒ watingo todelomio.” Yi timongolio lodelo mao̒ u pilohilelio boito ode olio.

²¹ Lapatao̒ malonao̒ tei Elisa ode butu lotaluhu tulusi lolapi mao̒ watingo boito ode delomo taluhu wau loloi̒ya, “Uti-utieelo u tilahuda mai lo Eeya: ‘Wau̒ mopo tolango taluhee botie alihu diilalo moo̒sababu opopate meaambo eenggila!’ ”

²² Tonggadio uito malo tolangoolo mola taluhee boito lotuuu̒de lou̒ wolo uiloi̒ya lei Elisa.

²³ Lapatao̒ uito malonao̒ tei Elisa lonto Yerikho ode Betel. To huungo dalalo ngopolemboa̒ tau̒kekeei̒ yilumualai lonto kota wau helo hente-hentea̒ olio, “Wuu dayato, dayato, pohinggi mao̒ monteea!” wuwaatii̒ mongolio.

²⁴ Tei Elisa loili mota wau loo̒onto olimongolio lapatao̒ helo tadia olimongolio domi tanggulo Eeya. Tou̒ boitolo boruangi bilango mohelu duluo yilumualai lonto oa̒ayua wau helo nganta-ngantangao̒ wopato pulaa duulota walao̒ towolota lo tau̒kekeei̒ boito.

²⁵ Tei Elisa lopo tolonga mola lononao̒lio ode hui̒dee Karmel, lapatao̒ luli lohualinga ode Samaria.