OLUO MONGO OLONGIA 17 - KITABI HABARI MOPIOHE

Tei Hosea olongia lo Isirai̒lu

¹ To taunu opulaa duluo pamalenta li Olongia Ahas to Yehuda, tei Hosea walae̒e Ela lowali olongia lo Isirai̒lu, wau tio helo malenta to Samaria tio lotaunu mola hiheolio.

² Tio ilodusa to Eeya, bo dusalio diila debo odelo daata lodusa mongo olongia lo Isirai̒lu tahe lomalenta tou̒ dipo-dipolulio mai.

³ Tio hetiluhu wau tilaa̒aluku lei Salmaneser olongia lo Asyur, tilinggula timii̒du taunu tio musi momayali doi hulawa uwajibu pomayali olio.

⁴ Bo tou̒ wakutu tuwau, tei Hosea lolao utolia odelei So olongia lo Masiri u mei̒ tulungi olio. Lapatao̒ tei Hosea lohuheli helo mayali doi hulawa uwajibu pomayali timii̒du taunu ode Asyur. Tou̒ ilotaawa lei Salmaneser pasali huhutu lei Hosea boito, yi tio loheu̒pa olei Hosea wau pilopo tuwotio ode delomo tutupa.

Dudehulio lo Samaria

⁵ Lapatao̒ tei Salmaneser olongia lo Asyur loluhu Isirai̒lu wau helomala Samaria. To taunu otolulio lou̒ pilomalawa boito,

⁶ – u debo odelo taunu otiolio pamalenta lei Hosea – tei Salmaneser lohama Samaria. Lapatao̒ taulo Isirai̒lu bilintai̒o odelo tawalo ode Asyur. Ngotayadu limongolio pilopo tambatilio tokota Halah, wau ngotayadu totili lo Dutulaa Habor to madala Gojan, wau ngotayadu poli to kokoo-tawaalo tolipu lo Madai.

⁷ Samaria lodehu sababu taulo Isirai̒lu ilodusa to Eeya, Allahu Taa̒ala limongolio, tamalo poa̒ahu olimongolio lonto oli olongia lo Masiri, wau lodelo olimongolio yilumualao̒ lonto lipu boito. Timongolio helolubo ila-ila wewo

⁸ wau lodudua̒ obobiasa lo babaa-ngusawalo tamaa pilopolahi lo Eeya tou̒ bangusa lo Isirai̒lu lomaju heloluhu babaa-ngusawalo boito. Bangusa lo Isirai̒lu helo duduo̒ uu̒du u hetilantu mao̒ lomongo olongia lo Isirai̒lu,

⁹ wau helohutu susuu-aliyaalo udiila yiluasia lo Eeya, Allahu Taa̒ala limongolio. Timongolio helo potihulao̒ tataa-mbatiyalo hipo lubowalo dewa to ngoa̒amila kota limongolio, mopio tokota kikiio̒ meaalo tokota leidaa̒.

¹⁰ Toitaato timii̒du huludu, wau to walungo timii̒du bungo lo ayu u mohimbuyungo, timongolio helo potihulao̒ tutuu-guwaalo wau bubuu-iyaalo Dewi Asyera.

^11-12 Timongolio olo helolapo dupa to ngoa̒amila mesba ode dewa, odelo obobiasa lo babaa-ngusawalo tamaa pilopolahi lo Eeya lonto lipu lo Kanaa̒n. Timongolio helolubo balaahala, eleponu Eeya malodini mao̒. Totoonulalo huhutu limongolio u moleeto helo potoodei omuluka lo Eeya.

¹³ Eeya lolao mai mongo utolia wau mongo nabi-Lio ode umati lo Isirai̒lu wau Yehuda u helopo tunggulao̒ poe̒ela botie: “Pohuhelilo mohutu u moleeto wau dungohilo totoonulalo palenta wau butoo̒ uilohi-U̒ mai ode loluuhurumu wau olemu lotimbulude to mongo nabi, mongo wato-U̒ boito.”

¹⁴ Bo Isirai̒lu wau Yehuda diila mohuto modungohu. Timongolio baaa̒ngiolo odelo loluuhuru limongolio tadiila palacaya to Eeya, Allahu Taa̒ala limongolio.

¹⁵ Isirai̒lu wau Yehuda diila lohutu lodungohu papaa-lentawalo Eeya wau diila tatapu wau molotolo hilao to daantia umaa pilohutu-Lio wolo loluuhuru limongolio. Timongolio diila helo mandungi totoonulalo didinii-Lio, bo helo ibaadati ode babaa-laahalaalo udiila ohunalio. Timongolio heloo̒ baaya to babaa-ngusawalo topalito limongolio, eleponu Eeya malodini mai.

¹⁶ Timongolio helo lambanga ngoa̒amila butoo̒ lo Eeya, Allahu Taa̒ala limongolio, wau lohutu sapi mohelu duluo lonto logamu u hetuboolo. Timongolio lohutu bui̒ lo Dewi Asyera, helolubo bibii-natangiyalo wau hipo ibaadatia ode Dewa Baal.

¹⁷ Timongolio helo podewo mongo walai̒ mongolio odelo bake yilalango ode dewa. Timongolio helomake pongotota tomimbihu totoonulalo udiila oontonga wau hemohile potuhata monto huhuu-langowalo umowali mohumbuta wolo roroo-huwaalo. Timongolio malo odito olohio hemohutu susuu-aliyaalo udiila moo̒sanangi hilaa lo Eeya

¹⁸ tilinggula Eeya lomuluka daa̒ olimongolio wau diilalo helo poo̒tuotai olimongolio; uleitolaa mao̒ bolo bele biluloa̒ saaha li olongia lo Yehuda.

¹⁹ Tau tauwalo Yehuda olo diila helo dungohe totoonulalo butoo̒ lo Eeya, Allahu Taa̒ala limongolio. Timongolio heloo̒ dudua̒a obobiasa taulo Isirai̒lu,

²⁰ yi Eeya diilalo lotolongaku mao̒ ngoa̒amila umati lo Isirai̒lu. Tio lohukuumani mai wau helohudu olimongolio ode mumuu-suuwaalo limongolio tadiila omanusia. Tio diilalo lopoo̒ tuotai olimongolio, tumbao̒ lopo layeheo̒ olimongolio lonto huta uilohi-Lio mai ode limongolio.

²¹ Lapatao̒ Eeya lopobua̒ mao̒ Isirai̒lu lonto Yehuda, taulo Isirai̒lu, lomudua̒a olei Yerobeam walae̒e Nebat lowali olongia limongolio. Lapatao̒ tei Yerobeam lohutu olimongolio lololaa mao̒ to Eeya wau helohutu duduu-sawaalo u udaa̒.

²² Timongolio loo̒baaya olei Yerobeam wau debo hipohutua ngoa̒amila dusa u pilohutulio,

²³ tilinggula pulitio Eeya diilalo lopoo̒ tuotai olimongolio, bo lopolayahe mota olimongolio lonto huta uilohi-Lio olimongolio. Uito lotoduo tutuuu̒de wolo poe̒ela uilohi mai lo Eeya ode limongolio lotimbulude tomongo wato-Lio, wau mongo nabi. Odi-odieelo mola taulo Isirai̒lu hepilo layahio mota ode Asyur, wau mota teteetolo timongolio lotibiluloa̒ tunggula todulahee botie.

Tau-tauwalo Asyur helo titatapu to Isirai̒lu

²⁴ Odela potowali taulo Isirai̒lu tamaa bilintaa̒a mota ode polayahu boito, ti olongia Asyur helo potambati to kokoo-tawaalo Samaria, tau-tauwala lonto Babel, Kuta, Awa, Hamat, wau Separwaim. Tau-tauwalo boito lotibiluloa̒ to kokoo-tawaalo boito wau lotitatapu mota teto.

²⁵ Tou̒ timongolio bohu-bohulio lotibiluloa̒ mota teto timongolio diila helo hurumati to Eeya; uito sababuulio Eeya lopodungga mai sisii-ngawaalo u lodangapo ngotayadi mongolio.

²⁶ Lapatao̒ tau lopoo̒taa odeli olongia lo Asyur deu̒ tau-tauwalo tapilopo tambatilio to kokoo-tawaalo Samaria diila motota bubuu-too̒waalo dewa lolipu boito. Uito sababuulio dewa boito lopodungga mai singa lodangapo olimongolio.

²⁷ Sababu uito olongia lo Asyur lomalentao̒ alihu ngotaalio li iimamu towolota lo tahi tawaloa tamaa pilolayahio mota ode Asyur, muli laoloolo ode Samaria. “Ahuli mao̒ tio mohualinga wau motibiluloa̒ mota teto alihu tio mowali mongaajali totau-tauwala boito pasali bubuu-too̒waalo dewa lolipu boito,” uali olongia.

²⁸ Yi ngotaa̒lio li iimamu lo Isirai̒lu, tamaa bilintai̒o lonto Samaria ode Asyur lohualingai wau lotibiluloa̒ to Betel. Mola teto tio helo ngaajali ulipu woloolo mola patutilio molubo Eeya.

²⁹ Bo tau-tauwalo tahi biluloa̒wa to Samaria boito debo hipohutua babaa-laahalaalo limongolio lohihilao wau hepilo tambatilio todelomo kukuu-wiliyaalo upilopo tihulo taulo Isirai̒lu u muloololio mai hibiluloa̒wa tokota boito. Timii̒du kaumu helohutu balaahalalio lohihilao tokota upilo tibiluloa̒ limongolio:

³⁰ Taulo Babel helohutu bui̒ lo Dewa Sukot-Benot, taulo Kuta helohutu bui̒ Nergal, taulo Hamat bui̒ Asima,

³¹ taulo Awa bui̒ Nibhas wau Tartaki, wau taulo Separwaim helo podewo mongo walai̒ mongolio odelo bake yilalango ode Dewa Adramelekh wau Anamelekh.

³² Ngopohia hemolubo dedeewaalo boito, timongolio olo hemolubo Eeya. Timongolio helo lulaotao̒ towolota limongolio hidala-dalaalawa tau u otuugasi odelo iimamu wau u mopodewo bake to kukuu-wiliyaalo balaahala.

³³ Oditolio, timongolio hemolubo Eeya, bo hemolubo olo dedeewaalo limongolio lohihilao, tutuuu̒de wolo uu̒du lolipu asali mai limongolio.

³⁴ Tunggula todulahee botie timongolio donggo hemo ponao̒ uu̒du limongolio. Timongolio diila hemo ibaadati to Eeya wau diila olo hemo dungohe totoonulalo butoo̒ wau totoonulalo palentaa-Lio uilohi-Lio mai ode wali mola lei Yako, tai̒lunte olo Isirai̒lu.

³⁵ Eeya malohutu mai daantia u wumbutio mola botie wolo umati lo Isirai̒lu, “Diila mao̒ poi̒baadati ode ila-ila wewo; diila mao̒ posujudu molubo olimongolio meaalo momaya olimongolio, meaalo mopodewo bake to olimongolio.

³⁶ Pohurumatilo ola-U̒, Eeya, tamalodelo wau lopolualai olimongoli lonto Masiri wolo kawasa; poluboolo ola-U̒ wau podewowalo bake ode Olau̒.

³⁷ Dungohilo mao̒ laito bubuu-too̒waalo wau papaa-lentawaalo umaa tilaludu-U̒ ode olemu. Diila mao̒ poi̒baadati to ila-ila wewo,

³⁸ wau diila mao̒ palonga daantia towolota-U̒ woli mongoli.

³⁹ Podungohulo ola-U̒, Eeya Allahu Taa̒ala limongoli, yi Wau̒ mamo lopatai olimongoli monto mumuu-suuwaalo limongoli.”

⁴⁰ Bo ulipu lo Samaria boito diila lohuto lodungohe; timongolio debo hemotidihu to uu̒du limongoli.

⁴¹ Oditolio, timongolio hemolubo to Eeya, bo hipoluboa olo babaa-laahalaalo limongolio. Tunggula todulahee botie olo wali mola limongolio donggo hipohutua sua̒li boito.