OLUO MONGO OLONGIA 16 - KITABI HABARI MOPIOHE

Tei Ahas olongia lo Yehuda

¹ To taunu opulaa pitu pamalenta li Olongia Pekah walae̒e Remalya to Isirai̒lu, tei Ahas walae̒e Yotam lowali olongia lo Yehuda.

² Tou̒ boito tio o umulu dulopulu lotaunu wau tio helo malenta to Yerusalemu mopulaa wolomo taunu mola hiheolio. Tio diila loo̒ dudua̒a u mopiohe lonto oli Olongia Dauda, loluuhurulio, bo helohutu udiila moo̒sanangi hilaa lo Eeya, Allahu Taa̒alaalio.

³ Tio tumutumulo debo odelo mongo olongia lo Isirai̒lu, tumbao̒ lopodewo walao̒ talolai̒lio lohihilao odelo bake ode dewa, lodudua̒ uu̒du mobulilo lotau-tauwalo tahe pilopolahi lo Eeya lonto lipu lo Kanaa̒n tou̒ taulo Isirai̒lu tilumuwota ode lipu boito.

⁴ Tei Ahas helo podewo bake wau helolapo dupa to tataa-mbatiyalo polubowalo dewa to huhuu ideyaalo wau towalungo bubuu-ngowaalo ayu u mohimbungo.

^5-6 To maasa boito ti olongia lo Edom luli longawaasa kota Elat wau helo polahi tau-tauwalo Yehuda tahi biluloa̒wa mota teto. Taulo Edom lapatao̒ lonao̒ mai lotitatapu tokota boito tunggula todulahee botie. To maasa boito olo tei Rejin olongia lo Siria wolei Pekah olongia lo Isirai̒lu heloluhu wau lomala Yerusalemu, bo diila loo̒laaheo̒ olei Ahas.

⁷ Tei Ahas malolao utolia odelei Tiglat-Pileser olongia lo Asyur wolo tahuli odie, “Watia watoonto utatapu wau molotolo hilao; sababu uito, watia momolohone ponao̒lo mai mopoa̒ahu olaatia monto oli olongia lo Siria wau olongia lo Isirai̒lu tadonggo hemoluhu olaatia.”

⁸ Tei Ahas olo helohama mao̒ hulawa wau talaa̒ lonto Bele lo Eeya, wau halata upango lobele biluloa̒ saaha li olongia, tulusi lolao mola odelo paraseni odeli olongia lo Asyur boito.

⁹ Ti Olongia Tiglat-Pileser lololimo polohone lei Ahas, tulusi heloluhu Damusiki wau loo̒kawasa mao̒ Damusiki. Ulipulio hebilintai̒o odelo tawalo ode Kir, wau olongialio, deu̒yito-yito ti Olongia Rejin, pilatelio yila-yilateelo mao̒.

¹⁰ Tou̒ ti Olongia Ahas lonao̒ ode Damusiki mola lodunggaya woli Olongia Tiglat-Pileser, tio loo̒onto mesba tokota boito. Lapatao̒ tio lolao mola odeli Iimamu Uria to Yerusalemu obaaya lomesba boito wolo tuu̒udio u pasipasi lomao̒ wolo yia̒apio mopatato.

¹¹ Yi tei Uria lopo tihulao̒ mesba lutuuu̒de wolo obaaya wau tuuu̒du u tilolimolio boito, wau helo poo̒lapato tou̒ tei Ahas diipo lohualingai.

¹² Tou̒ tio leidungga mai lonto Damusiki, tei Ahas loo̒onto deu̒ mesba boito mailapato.

¹³ Lapatao̒ toitaato mesba boito tio helo podewo bake lo binatangi wau bake lopale. Tio olo helo luwatao̒ bake lo angguru wau duhu lonto bake lo polodame toitaato mesba boito.

¹⁴ Tei Ahas loo̒onto olo deu̒ mesba lo polunggu u pilohetu ode Eeya dudutuulio towolota Bele lo Eeya wau mesbalio u bohu. Sababu uito mesba lo polunggu boito yilimbatio lonto talu Bele lo Eeya ode ambahu tilayo lo mesbalio u bohu boito.

¹⁵ Lapatao̒ uito tio loloi̒ya mao̒ odelei Uria, “Pomakeyalo mesbau̒ uleidaa̒ botie u polumbilalo bake dimodupo wau bake hui u hepilodewo mai li Olongia wau ulipu, wau tuwata mao̒ teto bake lo angguru lonto ulipu. Tuwata mao̒ olo ode yitaato mesba boito ngoa̒amila duhu lo binatangi u podewolo. Wau mesba lo polunggu u malohiheo boito polulia mai olau̒ tamo pomake mao̒ u pohileaalo potuhata monto roroo-huwaalo.”

¹⁶ Tei Uria helo ponao̒ palenta li olongia boito.

¹⁷ Lapatao̒ tei Ahas helo monggari mao̒ kakaa-letaalo polunggu u hepomake to Bele lo Eeya, wau lopo lopatao̒ bubuu-longgowalo lonto kakaa-letaalo boito. Ginti lo polunggu uleidaa̒ uwoluo towulea lo mopulaa duluo sapi polunggu boito hilamalio olo wau pilopo dutulio toitaato wumbato lonto botu.

¹⁸ Lapatao̒ u mohama hilaa li olongia lo Asyur, tei Ahas lolonggalo bele wimbihu talu uleidaa̒ tambati li olongia to Bele lo Eeya wau helo heu̒tao̒ huhebu potuwotalo u tolomodu odeli olongia.

¹⁹ Hikaayati wewolio tomimbihu oli Olongia Ahas tiluladu todelomo buku Sojara Mongo Olongia lo Yehuda.

²⁰ Tei Ahas yilate wau yilobungio to kuubulu lomongo olongia to Kota lei Dauda. Tei Hiskia walai̒o lowali olongia lobuulota wolio.