OLUO MONGO OLONGIA 15 - KITABI HABARI MOPIOHE

Tei Ujia olongia lo Yehuda

¹ To taunu odulo pulaa pitu pamalenta li Olongia Yerobeam Oluolio to Isirai̒lu, tei Ujia walae̒e Amasia lowali olongia lo Yehuda.

² Tou̒ boito tio o umulu mopulaa wolomo taunu wau helo malenta to Yerusalemu limo lopulaa duluo lotaunu mola hiheolio. Tiilolio ilunte Yekholya, taabua lo Yerusalemu.

³ Debo odelo tiyamolio, tei Ujia olo helohutu u loo̒sanangi hilaa lo Eeya.

⁴ Bo leetio, tio diila helo pobinasa tataa-mbatiyalo polubowalo dewa, tilinggula ulipu debo hemo podewo bake wau hemolapo dupa mota teto.

⁵ Eeya lohutu mai olio ilongongoto lo alipo u moo̒tihela hapato, wau tunggula tio yilate, ngongotio boito diila loluli. Tio pilopo tihilio tobele ngowale wau yilopatio lonto tuugasilio. Tei Yotam walai̒o talolai̒ helo malenta ulipu odelo wakiliilio.

⁶ Hikaayati wewolio tomimbihu oli Olongia Ujia tiluladu todelomo buku Sojara Mongo Olongia lo Yehuda.

⁷ Tei Ujia yilate wau yilobungio tokuubu lomongo olongia to Kota lei Dauda. Tei Yotam walai̒o talolai̒ lowali olongia lobuulota wolio.

Tei Jakaria olongia lo Isirai̒lu

⁸ To taunu otoolo pulaa walu pamalenta li Olongia Ujia to Yehuda, tei Jakaria walae̒e Yerobeam Oluolio lowali olongia lo Isirai̒lu wau helo malenta to Samaria wolomo hula mola hiheolio.

⁹ Tutuuwauwa debo odelo mongo olongia tahe lomalenta tou̒ dipo-dipolulio mai tio, yi tio olo ilodusa to Eeya. Tio heloo̒ dudua̒a ololeeto li Olongia Yerobeam Bohulio, tamalohutu taulo Isirai̒lu ilodusa.

¹⁰ Tei Salum walae̒e Yabesh helo woomboa loluwali oli Olongia Jakaria, wau lomate yila-yilateelo mao̒ olio to Yibleam, lapatao̒ lowali olongia lobuulota wolio.

^11-12 Lou̒ odito lotoduwolo mola wolo u mapilo danti mai lo Eeya odeli Olongia Yehu deu̒ walao̒ wau wombulio demola wali opatio mamowali olongia to Isirai̒lu. Hikaayati wewolio tomimbihu oli olongia Jakaria, tiluladu todelomo buku Sojara Mongo Olongia lo Isirai̒lu.

Tei Salum olongia lo Isirai̒lu

¹³ To taunu otoolo pulaa tio pamalenta li Olongia Ujia to Yehuda, tei Salum walae̒e Yabesh lowali olongia lo Isirai̒lu. Tio helo malenta to Samaria bo ngohula mola

¹⁴ sababu tei Menahem walae̒e Gad lonao̒ mota lonto Tirsa ode Samaria, lapatao̒ lomate yila-yilateelo mao̒ olei Salum, wau lowali olongia lobuulota wolio.

^15-16 To delomo nonao̒olio lonto Tirja, tei Menahem helo ngaantulu sama-samaata kota Tipsah wau mamaa-dalawaalo to palitio wau helo pobinasa ngoa̒amila ulipulio. Sababu kota boito diila mohuto taa̒aluku to olio, yi tio helomutaa̒ ombongo mongobua tahi ombodaa̒wa tokota boito, Hikaayati wewolio tomimbihu oli Olongia Salum, leituwoto woomboalio, tiluladu todelomo buku Sojara Mongo Olongia lo Isirai̒lu.

Tei Menahem olongia lo Isirai̒lu

¹⁷ To taunu otoolo pulaa tio pamalenta li Olongia Ujia to Yehuda, tei Menahem walae̒e Gad lowali olongia lo Isirai̒lu, wau helo malenta to Samaria mopulu lotaunu mola hiheolio.

¹⁸ Ngotupa lo tutumulio tio ilodusa to Eeya sababu loo̒ dudua̒a ololeeto li Olongia Yerobeam Bohulio, tahe lohutu taulo Isirai̒lu ilodusa.

¹⁹ Tou̒ tei Pulu olongia lo Asyur heloluhu Isirai̒lu, tei Menahem longohi mao̒ olio tolo pulaa pato lihu lokilo talaa̒ alihu tio momantu mopoo̒ tohetao̒ okokawasa lei Menahem to Isirai̒lu.

²⁰ Dudelolio lei Menahem heloo̒tapu doi boito yito wolo lomakusa tahi kaayawa to Isirai̒lu mongohi mai olio limo lopuulo pita doi talaa̒ timii̒du ngotaalio. Sababu uito tei Pulu lololaa mao̒ lipu boito wau lohualinga ode lipulio lohihilao.

²¹ Hikaayati wewolio tomimbihu oli Olongia Menahem tiluladu todelomo buku Sojara Mongo Olongia lo Isirai̒lu.

²² Tio yilate wau yilobungio, lapatao̒ tei Pekahya walai̒o lowali olongia lobuulota wolio.

Tei Pekahya olongia lo Isirai̒lu

²³ To taunu olimo lopulu pamalenta li Olongia Ujia to Yehuda, tei Pekahya walae̒e Menahem lowali olongia lo Isirai̒lu wau helo malenta to Samaria dulo taunu mola hiheolio.

²⁴ Tio ilodusa to Eeya sababu loo̒ dudua̒a ololeeto li Olongia Yerobeam Bohulio, tahe lohutu taulo Isirai̒lu ilodusa.

²⁵ Tala ngota lomongo polowilalio, deu̒yito-yito tei Pekah walae̒e Remalya, helo woomboa wolo talimo lopulu lota lonto Gilead. Lapatao̒ todelomo biintengi tuwau tobele biluloa̒ saaha li olongia to Samaria timongolio helomate olei Pekahya yila-yilateelo mao̒ wolo taduulota wewolio tai̒lunte Argob wau Arye. Lapatao̒ tei Pekah lowali olongia lobuulota wolei Pekahya.

²⁶ Hikaayati wewolio tomimbihu oli Olongia Pekahya tiluladu todelomo buku Sojara Mongo Olongia lo Isirai̒lu.

Tei Pekah olongia lo Isirai̒lu

²⁷ To taunu olimo lopulaa duluo pamalenta li Olongia Ujia to Yehuda, tei Pekah walae̒e Remalya lowali olongia lo Isirai̒lu. Tio helo malenta to Samaria dulopulu lotaunu mola hiheolio.

²⁸ Tio ilodusa to Eeya sababu loo̒ dudua̒a ololeeto li Olongia Yerobeam Bohulio tahe lohutu taulo Isirai̒lu ilodusa.

²⁹ To maasa pamalenta lei Pekah, tei Tiglat-Pileser olongia lo Asyur helohama kota Iyon, Abel-Bet-Maakha, Yanoah, Kedes, Hajor, madala Gilead, Galilea wau Naputali. Ulipulio hebilintai̒o olo odelo tawalo ode Asyur.

³⁰ To taunu odulo pulu pamalenta li Olongia Yotam walae̒e Ujia to Yehuda, tei Hosea walae̒e Ela helo woomboa loluwali oli Olongia Pekah wau lomate yila-yilateelo mao̒ olio, lapatao̒ lowali olongia lobuulota wolio.

³¹ Hikaayati wewolio tomimbihu oli Olongia Pekah tiluladu todelomo buku Sojara Mongo Olongia lo Isirai̒lu.

Tei Yotam olongia lo Yehuda

³² To taunu oluolio pamalenta li Olongia Pekah walae̒e Remalya to Isirai̒lu, tei Yotam walae̒e Ujia lowali olongia lo Yehuda.

³³ Tou̒ boito tio o umulu dulo pulaa limo lotaunu wau tio helo malenta to Yerusalemu mopulaa wolomo taunu mola hiheolio. Tiilolio yito ti Yerusa walae̒e Jadok.

³⁴ Tei Yotam helohutu u loo̒sanangi hilaa lo Eeya, debo odelo tei Ujia tiyamolio.

³⁵ Bo leetio, tataa-mbatiyalo polubowalo dewa diila ilantululio tilinggula ulipu debo tulusi wambai̒o hemo podewo bake wau hemolapo dupa mota teto. Tei Yotamilo talo mongu huhebu Hulubangi Tilayo to Bele lo Eeya.

^36-37 To maasa pamalenta lei Yotam, Eeya malolao olei Rejin olongia lo Siria wolei Pekah olongia lo Isirai̒lu mola loluhu Yehuda. Hikaayati wewolio tomimbihu oli Olongia Yotam tiluladu todelomo buku Sojara Mongo Olongia lo Yehuda.

³⁸ Tio yilate wau yilobungio tokuubulu lomongo olongia to Kota lei Dauda. Tei Ahas walai̒o lowali olongia lobuulota wolia.