OLUO MONGO OLONGIA 14 - KITABI HABARI MOPIOHE

Tei Amasia olongia lo Yehuda

¹ To taunu oluolio pamalenta lei Yoas walae̒e Yoahas to Isirai̒lu, tei Amasia walae̒e Yoas lowali olongia to Yehuda.

² Tou̒ boito tio o umulu dulo pulaa limo lotaunu, wau tio helo malenta Yerusalemu dulo pulaa tio lotaunu mola hiheolio. Tiilolio yito ti Yoadan lonto Yerusalemu.

³ Tei Amasia helohutu u loo̒sanangi hilaa lo Eeya, bo tio diila debo odelo tei Dauda, loluuhurulio. Debo odelo tiyamolio,

⁴ tio olo diila helo pobinaasa tataa-mbatiyalo polubowalo to dewa, tilinggula ulipu tulusi wambai̒o hemo podewo bake wau hemolapo dupa mola teto.

⁵ Lolamemeta tou̒ malo lotolai huhuloa̒lio, tei Amasia helo hukuumani yilate mongo pogawee talomate yila-yilateelo mao̒ oliyamolio.

⁶ Bo mongo walai̒o lomongo pogawee boito diila ilopatealio yila-yilateelo mao̒, sababu tio helo dudua̒ palenta lo Eeya todelomo Buku lei Musa u tingohio odie, “Diila mao̒ hukuumania mate tomongo dulaa̒ sababu ololeeto u hepilohutu lomongo walai mongolio, wau diila mao̒ hukuumania mate mongo walao̒ sababu ololeeto u hepilohutu lomongo dulaa̒ limongolio. Ngota-ngota bo mowali hukuu-maniyola mate sababu ololeeto upilo hutulio lohihilao.”

⁷ To delomo popaatea tuwau, tei Amasia helomate yila-yilateelo mao̒ mopulu lolihu lota pajule lo Edom to Lumbaya Asin, wau lolambato kota Sela. Kota boito ilunte Yokteel. Tunggula botia kota boito donggo unte-unte Yokteel.

⁸ Lapatao̒ tei Amasia lolao utolia odelei Yoas olongia lo Isirai̒lu u loteehengi olio mopaa̒atea.

⁹ Bo ti Olongia Yoas lolao tametio odie, “Tou̒ wakutu tuwau diu̒to oduhi to hihui̒-hui̒dea lo Libanon lolao habari botie ode bungo lo ayu woohu, ‘Wuu bungo lo ayu woohu, wohia mai walau̒mu tadulahu ode walau̒ mowali dilelio.’ Bo lapatio mao̒ yilumaodeo̒ teto binatangi tuwau lo oa̒ayuwa u helo lumbe-lumbetaa̒ diu̒to oduhi boito.

¹⁰ Yio̒, Amasia, malowali sombongi, sababu yio̒ malopo olaaheo̒ taulo Edom. Naa, diila malo tuuu̒de ohohaama boito? Opio-piohelio yio̒ potitolaalo mao̒ tobele! Pongoola mololohe sua̒li u bomoo̒ topotala batangamu lohihilao wau ulipumu?”

¹¹ Bo tei Amasia diila helo mandungi loi̒ya lei Yoas olongia lo Isirai̒lu. Sababu uito, ti Olongia Yoas wolo tahidudua̒ olio malo monggata mola ode Bet-Semes to Yehuda wau helopaatea wolei Amasia mola teto.

¹² Suludadu lo Yehuda ilolaahelio wau ngoa̒amila pajulelio tilumeteo̒ helo hualinga ode belelio ngota-ngota.

¹³ Tei Yoas loo̒ wau̒upa olei Amasia, tulusi lonao̒ ode Yerusalemu wau helo ngaantulu dingingo meeseli lokota boito ngohilayao̒ tanu dulo hetuto meeteri, tumulalo mao̒ monto Huhebu Hulubangi Eparim demota Huhebu Hulubangi Tutulio.

¹⁴ Ngoa̒amila hulawa wau talaa̒ wau ngoa̒amila pakaakasi u ilodunggaalio to Bele lo Eeya, wau ngoa̒amila halata upango lobele biluloa̒ saaha li olongia, wolo dengolo lota tahe tilawalo bilintai̒o lei Yoas ode Samaria.

¹⁵ Hikaayati wewolio tomimbihu oli Olongia Yoas, leituwoto opahaa-lawanilio helo luwali olei Amasia olongia lo Yehuda tiluladu todelomo buku Sojara Mongo Olongia lo Isirai̒lu.

¹⁶ Tei Yoas yilate wau yilobungio tokuubulu lomongo olongia to Samaria. Walai̒o, tei Yerobeam Oluolio lowali olongia lobuulota wolio.

Opopate lei Amasia olongia lo Yehuda

¹⁷ Lapatao̒ tei Yoas olongia lo Isirai̒lu yilate mao̒, tei Amasia olongia lo Yehuda, donggo loo̒ tumula mola mopulaa limo lotaunu poli.

^18-21 To Yerusalemu woluo ngopolemboa̒ tao̒ hilaa momate-mateelo mao̒ olei Amasia. Sababu uito tio malolahi ode Lakhis, bo mumuu-suulio helo hilapita olio odito mola wau lomate olio yila-yilateelo mao̒. Milatelio bilintai̒o wolo wadala ode Yerusalemu, tulusi yilobungio to kuubulu lomongo olongia to Kota lei Dauda. Yi ulipu lo Yehuda malo mudua̒a olei Ujia, talolai̒ lei Amasia lowali olongia limongolio. Tou̒ boito tei Ujia boheli o umulu mopulaa wolomo taunu. Hikaayati weweolio tomimbihu li Olongia Amasia tiluladu todelomo buku Sojara Mongo Olongia lo Yehuda.

²² Lapatao̒ ilopatea liyamolio, tei Ujia luli lolambata kota Elat wau luli bilongulio.

Tei Yerobeam oluolio olongia lo Isirai̒lu

²³ To taunu opulaa limo pamalenta lei Amasia walae̒e Yoas to Yehuda, tei Yerobeam Oluolio walae̒e Yoas lowali olongia to Isirai̒lu, wau helo malenta to Samaria wopato pulaa tuwau lotaunu mola hiheolio.

²⁴ Tio ilodusa to Eeya, sababu tio heloo̒ dudua̒ ololeeto li Olongia Yerobeam Bohulio tamalohutu taulo Isirai̒lu ilodusa.

²⁵ Tei Yerobeam Oluolio botieelo taluli lohama ngoilanggubu madala lo Isirai̒lu, lonto dalala ode Hamat totilayo demola Lau Mate to hulialio. Uito lutuuu̒de wolo danti lo Eeya, Allahu Taa̒ala lo Isirai̒lu, lotimbulude towato-Lio, ti Nabi Yunu walae̒e Amitai taulo Gat-Heper.

²⁶ Eeya loo̒onto mai malo odito dutolio taulo Isirai̒lu, wau diaaluo boli ngotaa mao̒ tamohuto motulungi olimongolio.

²⁷ Eeya diila opatuju mongantulu taulo Isirai̒lu u ohiheo-hiheolo mao̒, sababu uito Eeya lotulungi mai olimongolio lotimbulude toli Olongia Yerobeam Oluolio.

²⁸ Hikaayati wewolio tomimbihu oli Olongia Yerobeam Oluolio, tomimbihu opahaa-lawanilio todelomo popaatea wau woloolo mola tio luli lohama Damusiki wau Hamat lonto Yehuda ode Isirai̒lu, ngoa̒amilalo tiluladu todelomo buku Sojara Mongo olongia lo Isirai̒lu.

²⁹ Tei Yerobeam Oluolio yilate wau yilobungio tokuubulu lomongo olongia. Tei Jakaria walai̒o talolai̒ lowali olongia lobuulota wolio.