OLUO MONGO OLONGIA 13 - KITABI HABARI MOPIOHE

Tei Yoahas olongia lo Isirai̒lu

¹ To taunu odulo pulaa totolu pamalenta lei Yoas walae̒e Ahasia to Yehuda, tei Yoahas walae̒e Yehu lowali olongia lo Isirai̒lu, wau tio helo malenta to Samaria mopulaa pitu lotaunu mola hiheolio.

² Debo odelo ti Olongia Yerobeam tahe lomalenta tou̒ dipo-dipolulio mai tio, tei Yoahas olo ilodusa to Eeya wau heloo̒ sababu taulo Isirai̒lu ilodusa. Tio diila pee̒enta mao̒ helo lolaa totoonulalo huhutuulio u moleeto.

³ Sababu uito Eeya lomuluka mai to Isirai̒lu tilinggula Eeya lopoluli mao̒ olei Hajael olongia lo Siria wolei Benhadad walai̒o, laito helo poo̒laaheo̒ Isirai̒lu.

⁴ Lapatao̒ tei Yoahas lodua̒ mola ode Eeya, wau Eeya lodungohei dua̒lio boito, sababu Eeya loo̒onto mai mailaba parangilio olongia lo Siria hemodeehe taulo Isirai̒lu.

⁵ Eeya longohi mai ode taulo Isirai̒lu tau̒wa ngota tahelo pobebasi olimongolio lonto okokawasa lo Siria tilinggula timongolio luli tilumumula lou̒ aamani debo odelo tou̒ muloololio mai.

⁶ Eleponu odito taulo Isirai̒lu diila lohuheli helohutu duduu-sawaalo u tilumula li Olongia Yerobeam. Timongolio hemohutu tulusi duduu-sawaalo boito, wau helo poluli bui̒ Dewi Asyera debo woluo to Samaria.

⁷ Hilaide popaatea lo Isirai̒lu mapilo binasa li olongia lo Siria tilinggula ti Olongia Yoahas bolo maito limo lopulu lota suludadu owadala, mopulu kaleta lo popaatea, wau mopulu lolihu lota pajule.

⁸ Hikaayati wewolio tomimbihu oli Olongia Yoahas wau ngoa̒amila huhutu umopiohu wau ohuna ode taa wewo wau opahaa-lawanilio tiluladu todelomo buku Sojara Mongo Olongia lo Isirai̒lu.

⁹ Tio yilate wau yilobungio to Samaria. Tei Yoas walai̒o lowali olongia lobuulota wolio.

Tei Yoas olongia lo Isirai̒lu

¹⁰ To taunu otolo pulaa pitu pamalenta li Olongia Yoas to Yehuda, tei Yoas walae̒e Yoahas lowali olongia lo Isirai̒lu wau helo malenta to Samaria mopulaa wolomo taunu mola hiheolio.

¹¹ Tio olo ilodusa to Eeya sababu helo dudua̒ ololeeto li Olongia Yerobeam tamaloo̒ sababu taulo Isirai̒lu helohutu dusa.

¹² Hikaayati wewolio tomimbihu oli Olongia Yoas, leituwoto opahaa-lawanilio todelomo popaatea helo luwali olei Amasia olongia lo Yehuda, tiluladu todelomo buku Sojara Mongo Olongia lo Isirai̒lu.

¹³ Tei Yoas yillate wau yilobungio to polobungalo mongo olongia to Samaria. Tei Yerobeam oluolio walai̒o lowali olongia lobuulota wolio.

Tei Elisa yilate

¹⁴ Tou̒ wakutu tuwau ti Nabi Elisa ilodungga lo ngongoto tiluhua, wau ti Olongia Yoas lonao̒ mai lomilohe olio. Tou̒ iloontongalio tei Elisa membideo̒ mate, yi ti olongia boito hilumoyongo wau loloi̒ya mao̒, “Paaa̒au̒, Paaa̒au̒, tamooduulua Isirai̒lu taa udaa̒!”

¹⁵ “Hamaawa mao̒ buutio̒ wau walao̒ pana!” palentaa lei Elisa olio. Tei Yoas lohama mao̒,

¹⁶ tulusi tei Elisa lopoa̒hu olio motidapato u momana. Ti Olongia olo lotidapato, wau tei Elisa helo podutu uluu̒lio toitaato uluu̒ li olongia.

¹⁷ Lapatao̒ lutuuu̒de wolo palenta linabi boito, ti olongia lomuo̒ mao̒ tutulowa u talutalu ode Siria. “Pomanawaalo mota panamu!” palenta mao̒ lei Elisa. Lolamemeto lapatio mao̒ ti olongia lopomana mota pana boito, tinabi boito longiibode, “Yio̒olo pana lo Eeya. Wolo pana boito Eeya mamopo olaaheo̒ Siria. Yio̒ mamopaatea moluwali taulo Siria to Apek tunggula yio̒ moo̒laaheo̒ olimongolio.”

¹⁸ Tei Elisa lopoa̒hu mao̒ oli Olongia Yoas lohama mai papaanalio uwewo wau lopo humbade mola ode huta. Ti Olongia lopo humbade mola poo̒otolu, lapatao̒ lohuheli.

¹⁹ Tei Elisa loingo, wau loloi̒ya mao̒, “Mapatutilio yio̒ mopo humbade mola tunggula poo̒olimo meaalo poo̒olomo, yi yio̒ moo̒ poa̒ntulu-antuluulo mao̒ bangusa lo Siria. Bo botia yio̒ mamopo olaaheo̒ olio bo poo̒otolu.”

²⁰ Diila lohiheo lapatio mao̒ tei Elisa yilate wau yilobungio. To maasa boito wowoo-mbowaalo Moab biasaalio hemoluhu lipu lo Isirai̒lu pee̒enta ngotaunu.

²¹ Todulahee tuwau tou̒ dengolo lota tau donggo hemo lobunga taa yilate, debolo timongolio loo̒onto woomboa lo Moab lonao̒ mai. Lolamemeto timongolio lopomahula wambai̒o milate boito ode delomo kuubulu lei Elisa lapatao̒ tilumeteo̒. Odito milate boito leitenggulo totulalo lei Elisa, yi milate boito luli tilumumulai tulusi tilimihula mola.

Popaatea towolota lo Isirai̒lu wau Siria

²² Ngotilonggadu pamalenta lei Yoas, tei Hajael olongia lo Siria helodeehe taulo Isirai̒lu.

²³ Bo Eeya lodehu hilao to umati-Lio wau helo ngambungu mai olimongolio. Tio diila motohilaa mopoluli olimongolio pobinasaalio bo motulungi olimongolio domi daantia-Lio wolei Abraham, Isihaka wau Yako. Tunggula botie diila pee̒enta mao̒ Eeya helo malonga umati-Lio.

²⁴ Lapatao̒ tei Hajael olongia lo Siria yilate, wau tei Benhadad walai̒o lowali olongia.

²⁵ Lapatao̒ tei Yoas olongia lo Isirai̒lu helo poo̒laaheo̒ olei Benhadad poo̒otolu mola wau luli lohama kokoo-tawaalo u mailambato lei Benhadad tomaasa pamalenta li Olongia Yoahas tiyamo lei Yoas.