OLUO MONGO OLONGIA 12 - KITABI HABARI MOPIOHE

Tei Yoas olongia lo Yehuda

¹ To taunu opitulio pamalenta lei Yehu to Isirai̒lu, tei Yoas lowali olongia lo Yehuda. Tio helo malenta to Yerusalemu wopato pulu lotaunu mola hiheolio. Tiilolio ilunte Jibya lonto kota Bersyeba.

² Tuheeta diidiki li Iimamu Yoyada, tei Yoas ngotupa lo tutumulio helohutu u loo̒sanangi hilaa lo Eeya.

³ Bo atio̒olo, tambati hepo lubuwalo dewa diila pilopo binasaalio, tilinggula ulipu donggo hemo podewo bake wau hemolapo alama mota teto.

⁴ Tou̒ dulahee tuwau tei Yoas lotiangai mongo iimamu wau helo poa̒hu olimongolio lolahu mao̒ doi ulotapu lonto dedee-wowaalo to Bele lo Eeya, mopio doi pomaayali u mopowoluo mai bake, meaalo doi uilohi wolo iloheela hilao.

⁵ Timii̒du iimamu musi tihu-tihula todoi upilodewo lotau-tauwalo tahe bayaalio. Doi boito mapomake u mopoo̒piohe totoonulalo u hiruusawa to Bele lo Eeya.

⁶ Demola taunu odulo pulaa totolu pamalenta lei Yoas, mongo iimamu debo diipo helo poo̒piohe u hiruusawa to Bele lo Eeya.

⁷ Sababu uito tei Yoas lotiangai oli Iimamu Yoyada wolo mongo iimamu wewolio, wau loloi̒ya mao̒, “Yilongola timongoli diipo lopoo̒piohe Bele lo Eeya? Tumulalo mai todulahee botie timongoli diila luliyau̒ molahu doi u tilolimo limongoli. Ngoa̒amilalo musi wuduo mai limongoli u mopoo̒piohe Bele lo Eeya.”

⁸ Mongo iimamu boito akolo u diila mohimoa̒a doi lonto ulipu, wau diila olo timihulao̒ tou̒ mopoo̒piohe Bele lo Eeya.

⁹ Yi tei Yoyada lohama bulua mooyoto tuwau wau lohutu huwango totau̒bio, lapatao̒ dilutulio totili lomesba to ambahu olowala lohuhebu potuwotalo Bele lo Eeya. Ngoa̒amila doi u pilopodewo to Bele lo Eeya pilopo tuwotio ode delomo bulua mooyota boito lomongo iimamu tao̒ tuugasi tohuhebu potuwotalo.

¹⁰ Timii̒du wonu doi todelomo bulua mooyota boito madilaata mai, yi dulutuli li olongia woli Iimamu Daa̒ tonggonao̒ mai moyia̒apa doi boito, tulusi momolu mao̒.

¹¹ Lapatao̒ jumulaalio tiluladu, doi boito wuduwolo ode tahi pongimatoa kalaja lo tahemo poo̒piohe Bele lo Eeya. Wumbutio mola tahi pongimata boito momaayali mao̒ papaa-niyaalo ayu, pani lohudungu

¹² pani lobotu wau tamoo-mahatia botu. Tahi pongimatoa boito olo tamotali mai ayu wau botu, boli mongaatulu ngoa̒amila doi u lumualo tou̒ mopoo̒piohe boito.

¹³ Bo doi boito penu boli ngoi̒di mao̒ diila pomake u mohutu mamaa-nggowalo talaa̒, moku, torompeti, pakaa-kasiyaalo lotohe meaalo pakaakasi wewolio monto hulawa meaa̒alo talaa̒.

¹⁴ Ngoa̒amilalo pomaayali ode papaa-niyaalo wau potali babaa-haniyaalo hudungu u palaluwolo.

¹⁵ Tahi pongimatoa kalaja boito juujuru daa̒, oditolio diila palalu pohileaala lapuurani lodoi monto olimongolio.

¹⁶ Doi monto bake poluloo̒ uiluhi wau monto bake pongaa-mbungualo dusa diila potuwotolo ode delomo bulua mooyoto boito. Doi boito wohi mao̒ ode mongo iimamu.

¹⁷ To maasa boito tei Hajael olongia lo Siria heloluhu wau loo̒ huloa̒a kota Gat. Lapatao̒ tio oniyati moluhu Yerusalemu olo.

¹⁸ Yi tei Yoas lolao mota ode olio doi potoloto. Doi boito helo tapulio lonto ngoa̒amila dewo u muloololio mai mailudu ode Eeya lei Yoas lohihilao wau lei Yosapat, lei Yoram wolei Ahasia, deu̒yito-yito mongo olongia tahe lomalenta tou̒ dipo-dipolulio mai tio. Wau olo monto ngoa̒amila hulawa todelomo bulua Bele lo Eeya wau bele biluloa̒ saaha li olongia. Yi tei Hajael diila lomata loluhu Yerusalemu.

^19-21 Lapatao̒ mongo pogawee bele biluloa̒ saaha li olongia lo Yehuda helo woomboa moluwali oli Olongia Yoas. Duulota lonto olimongolio; deu̒yito-yito tei Yojakar walae̒e Simeat, wau tei Yojabad walae̒e Somer, helomate yila-yilateelo mao̒ olei Yoas tobele ngowale ubilongu toitaato huta tilambula to ambahu tiimuru lo Yerusalemu, todalalo motuhuta mola ode Sila. Tei Yoas yilobungio tokuubulu lomongo olongia to Kota lei Dauda. Tei Amasia walai̒o lowali olongia lobuulota wolio. Hikaayati wewolio tomimbihu li Olongia Yoas tiluladu todelomo buku Sojara Mongo Olongia lo Yehuda.