OLUO MONGO OLONGIA 11 - KITABI HABARI MOPIOHE

Ti Olongia taabua Atalya lonto Yehuda

¹ Tou̒ ti Atalya lototaa mao̒ deu̒ ti Olongia Ahajia, walai̒o, mailate, tio helo malentao̒ alihu ngoa̒amila ngaalaa̒ lei Ahasia pateelo mate-mateelo mao̒.

² Tei Yoas walae̒e Ahasia ngopee̒ ilopatealio yila-yilateelo mao̒ olo wolo walao̒ mongo lolai̒ li olongia wewolio, bo tio loo̒lahi piloa̒ahu li Yoseba pou̒laalio. Tei Yoas wau tamolaalawa olio lodelo olio wau loluuo̒ to huwali tuwau hepo tuluhelo to Bele lo Eeya.

³ Wolomo taunu mola hiheolio ti Yoseba helolaala walao̒ boito todelomo Bele lo Eeya tou̒ ti Atalya pale-palenta odelo olongia taabua.

⁴ To taunu opitulio, mongo polowila tamoo-kawalia batanga hihilao li olongia taabua wau tahi pokawalia bele biluloa̒ saaha li olongia tiliango li Iimamu Yoyada mai lodunggaya wolio to Bele lo Eeya. Mola teto tio lopoa̒hu olimongolio helo tadia u moponao̒ lanjanaalio. Tio lopo biloheo̒ olei Yoas, walao̒ talolai̒ li Olongia Ahasia, ode limongolio,

⁵ wau longohi mao̒ palenta odie, “Wonu bolo timongoli otuugasi todulahu Saabati, ngotayade totolu limongoli musi modaha tobele biluloa̒ saaha li olongia,

⁶ ngotayade totoolu poli tohuhebu Hulubangi lo Sur, wau lebelio tohuhebu bulubangi towulea lo tahi pokawalia uwewo.

^7-8 Tadulo dusingi tailapata lotuugasi todulahu Saabati, mamusi modaha mao̒ to Bele lo Eeya wolo wamilo pahupahuto u moduo̒la oli Olongia Yoas. Timongoli musi mokawali mao̒ olio penu boli deu̒toonu wambao̒ ponao̒walio, wau timii̒du taa u mohimontala mohimbideo̒ olimongoli, musi patee limongoli mate-mateelo mao̒.”

⁹ Mongo polowila boito lodungoheo̒ palenta lei Yoyada wau lodelo mao̒ ode olio tau limongolio tamusi motuugasi wau tailapato lotuugasi todulahu Saabati boito.

¹⁰ Tei Yoyada longohi mao̒ ode mongo polowila boito totoo-buo̒owalo wau porisai li Olongia Dauda u tahutahu to Bele lo Eeya.

¹¹ Lapatao̒ tahi pokawalia, ngota-ngota wolo wamila u pahupahuto, helohama tambati limongolio topalito wimbihu talu Bele lo Eeya u loduo̒lao̒ oli olongia.

¹² Lapatao̒ uito tei Yoyada lodelo olei Yoas ode bulemengio, tulusi lopopasi makuta to lunggongio, wau lohudu mao̒ olio buku Butoo̒ lo Allahu Taa̒ala. Tei Yoas piludui̒o lowali olongia wau sua̒li boito pilopo malalumu mola ode ulipu. Ngoa̒amila helo laa̒apa uluu̒ wau hiwaatia̒ meengahu, “Pomali tutuo̒lo mola olongia!”

¹³ Ti Olongia taabua Atalya loo̒dungohe tingalaa̒ hiwengahe lo tahi pokawalia wau ulipu. Lolamemeto tio lonao̒ mota ode Bele lo Eeya, tou̒toonu taa dadaata hia̒mbua.

¹⁴ Tio loo̒onto oli olongia bohu boito tihutihula tohuhebu potuwotalo ode Bele lo Eeya tou̒toonu tio piludui̒o, hepilalita lomongo polowila wau tamoo-hipawa torompeti. Ngoilanggubu ulipu hitingalaa̒ meengahu sambela hemo potingohe mola torompeti. Wolo lawa-lawalo ti Atalya longaidinga pakeyangilio, wau longuatio̒, “Hiyanati! Hiyanati!”

¹⁵ Tei Yoyada diila lopoluasi oli Atalya pateelo mate-mateelo mao̒ topalito Bele lo Eeya, oditolio tio loloi̒ya mao̒ ode mongo polowila, “Delowalo mota tio ode bulemengio moli baliisani lo tamoo kawalia wau pateaalo mate-mateelo mao̒ boli tatoonu wambai̒o tamo tolopani mopoa̒ahu oliio.”

¹⁶ Yi timongolio loheu̒pa olio, tulusi lodelo mola olio ode bele biluloa̒ saaha li olongia. Mola teto tio pilatelio yila-yilateelo mao̒ totalu lohuhebu Hulubangi Wadala.

Tei Yoyada helo powoluo mai polobohua

¹⁷ Ti Iimamu Yoyada lopoa̒hu oli Olongia Yoas wau ulipu lohutu daantia wolo Eeya deu̒ timongolio mamowali umati lo Eeya. Tio olo lopoa̒hu oli olongia lohutu daantia wolo ulipu.

¹⁸ Lapatao̒ uito ulipu heloluhu wau lopo lohubeo̒ kuili lo Baal. Mesba wau bubuu-iyaalo he ilaantululio wau tei Matan, iimamu lo Baal pilatelio yila-yilateelo mao̒ totalu lo memees-bawaalo boito. Tei Yoyada longohi mao̒ tuugasi to tamoo-kawalia u modaha Bele lo Eeya,

¹⁹ lapatao̒ tio wolo mongo polowila, tahi pokawali batanga hihilao li olongia wau tahipo-kawalia bele biluloa̒ saaha li olongia wau ngoilanggubu ulipu helodelo oli Olongia Yoas lonto Bele lo Eeya ode bele biluloa̒ saaha li olongia. Tei Yoas tilumuwotao̒ loli Hulubangi Tamoo-kawalia, lapatao̒ lotihuloa̒o̒ toitaato kadera bele biluloa̒ saaha li olongia.

²⁰ Ngoilanggubu ulipu hiweengahe, kota olo aamani wau ti Atalya mapilatelio yila-yilateelo mao̒.

²¹ Tei Yoas o umulu pitu lopulu lotaunu tou̒ tio lowali olongia lo Yehuda.