OLUO MONGO OLONGIA 10 - KITABI HABARI MOPIOHE

Wali mola lei Ahab hepilatelio yila-yilateelo mao̒

¹ Ti Olongia Ahab owalao̒ wau wombu pitu lopulu lota tokota Samaria. Sababu uito tei Yehu lolao mola tuladu ode Samaria, ode mongo wali, walao̒ wau wombu lei Ahab wau ode tahi kawasawa wau tahimuloa lo ulipu tokota boito. Tingohu tuladee boito odie,

² “Walao̒ wau wombu lei Ahab woluo todelomo imato limongoli, wau timongoli okaleta lo popaatea, wadala, tingolo wau kota obiintengi. Sababu uito, polamemetao̒ timongoli tou̒ mololimo tuladee botie,

³ tulaotilo tahipiohe daa̒ towolota lowalao̒ wau wombu lei Ahab boito wau pudua̒a mao̒ tio mowali olongia, lapatao̒ pohipatelo moduulua olio.”

⁴ Tahi kawasawa lo Samaria mailoohe. Timongolio helo loi̒ya, “Penu boli ti Olongia Yoram woli Olongia Ahasia olo diila mowali moluwali olei Yehu, tidiyolo mao̒ ito!”

⁵ Sababu uito tau̒wa lobele biluloa̒ saaha li olongia wau uhuuhu wolo tahimuloa lo ulipu wau mongo wali, walao̒ wau wombu lei Ahab boito helolao habari botie odelei Yehu, “Amiaatia taa̒aluku toli Tuani wau dapa-dapato mopohutu mao̒ penu boli wolo wambai̒o u pomalentao̒ li Tuani ode lamiaatia. Amiaatia diila tamomudua̒ penu boli olo tatoonu tamowali olongia. Pohutuwalo wolo u mopiohe modudua̒ bibilohu li Tuani.”

⁶ Lapatao̒ tei Yehu luli lolao mola tuladee ode limongolio, u tingohio odie, “Wonu timongoli motiwambao̒ to olau̒, wau dapa-dapato moduduo̒ palentau̒, pateaalo mate-mateelo mao̒ walao̒ wau wombu lei Ahab boito, wau loombu mola tou̒ debo odelo utie delowalo mai lunggongi mongolio ode olau̒ to Yijreel.” Opitu lopulu lota walao̒ wau wombu li Olongia Ahab boito hibiluloa̒wa to tahimuloa lo ulipu tokota Samaria, wau hetilaala limongolio.

⁷ Lapatao̒ lololimo mao̒ tuladu lei Yehu, tahimuloa lo ulipu tokota Samaria boito helomate yila-yilateelo mao̒ opitu lopulu lota walao̒ wau wombu lei Ahab boito lapatao̒ lunggongi mongolio boito pilopo tuwotio ode delomo kalanji wau yilaolio odelei Yehu to Yijreel.

⁸ Tou̒ sua̒li boito piloo̒taa odelei Yehu, yi tei Yehu helo malentao̒ alihu luluu-nggongowala boito huludulu mowali dulo huntua to hulubangi lokota, wau poluli mao̒ teto, demola dimodupo.

⁹ Didimodupo mola tei Yehu mailumuala ode huhebu hulubangi, tulusi loloi̒ya mao̒ totau-tauwalo tahi ambua teto, “Watiaalo talo woomboa malo luwali oli Olongia Yoram wau lomate olio yila-yilateelo mao̒; timongoli diila ototala todelomo sua̒li boito. Bo ngoa̒amila tau botie diila watia tahe lomate yila-tilateelo mao̒.

¹⁰ Utieelo bukutiilio deu̒ totoonulalo u tilahuda mai lo Eeya pasali lowalao̒ wau wombu lei Ahab mamo toduo mai. Eeya malo ponao̒ wolo u tilahuda-Lio mai lotimbulude olei Elia wato-Lio.”

¹¹ Lapatao̒ tei Yehu helomate yila-yilateelo mao̒ ngoa̒amila mongo ilaato lei Ahab uwewo tahi biluloa̒wa to Yijreel, wau ngoa̒amila pogawee, mongo tamani tamodudulo, wau mongo iimamulio; diaaluo penu boli ngotaa mao̒ tailulia hitumula.

Mongo ilaato li Olongia Ahasia hepilatelio yila-yilateelo mao̒

¹² Tei Yehu lololaa mao̒ Yijreel lapatao̒ lonao̒ ode Samaria. To huungo dalalo, totambati u ilunte “Kambungu lo Diiti”,

¹³ tio lodunggaya wolo dengolo lota mongo ilaato lei Ahasia olongia lo Yehuda. Tio lohintu mao̒, “Tatoonu timongoli?” “Amiaatia mongo ilaato lei Ahasia,” tametao̒ limongolio. “Amiaatia mao̒de Yijreel mola momilohe ngoa̒amila ilaato li olongia walao̒ wau wombu li Olongia taabua Isebel.”

¹⁴ “Wau̒pa mao̒ timongolio hitumula!” palenta mao̒ lei Yehu ode tahidudua̒ olio. Yi tau-tauwala boito maa yilau̒pio, tulusi pilatelio yila-yilateelo mao̒ totili lo ali tuwau u mohengu, ngoa̒amilalo wopato pulaa duulota. Diaaluo penu boli ngotaa mao̒ tailulia hitumula.

Ngoa̒amila mongo ilaato lei Ahab hepilatelio yila-yilateelo mao̒

¹⁵ Tei Yehu lopo tolonga mola lononao̒olio. To huungo dalalo, tio yilimaa lei Yonadab walae̒e Rekhab. Tei Yehu losalamu olio wau loloi̒ya mao̒, “Diila mangohilao ito? Mohuto yio̒ mopanggala wolau̒?” “Ooo̒,” tametao̒ lei Yonadab. “Wonu odito, dulo ito modaatia,” ualei Yehu. Timongolio malodaatia, wau tei Yehu lotulungi olei Yonadab lotitae̒ mola ode delomo kaletaalio,

¹⁶ sambela loloi̒ya mao̒, “Dulo dudui̒ mai wau sakusia mao̒ lohihilao woloolo mola oloohuu̒ to Eeya.” Lapatao̒ timongolio pee̒-pee̒enta malotitae̒ mola tokaleta ode Samaria.

¹⁷ Leidungga mola odito tei Yehu helomate yila-yilateelo mao̒ ngoa̒amila mongo ilaato lei Ahab, diaaluo penu ngotaa mao̒ tailolabita. Sua̒li boito lotoduo tutuuu̒de lou̒ wolo utilahuda mai lo Eeya odelei Elia.

Tahi polubowa Baal hepilatelio yila-yilatelo mao̒

¹⁸ Tei Yehu helo poa̒hu ulipu lo Samaria lotia̒mbu mai tulusi tio loloi̒ya mao̒, “Ti Olongia Ahab diila boti moo̒olohu motiwato to Baal; wau̒ talebe moo̒olohu wolio.

¹⁹ Sababu uito ambua mai ngoa̒amila nabi Baal wau tahi polubowa olio wau mongo iimamulio; diaaluo ngopohialio penu boli ngotaa mao̒. Wau̒ mamo podewo bake u hulinta ode Baal. Tatoonu tadiaaluo mahukuu-maniyolo mate.” Bo uito bo tala tuwau lo aakali lei Yehu u momate mate-mateelo mao̒ ngoa̒amila tahi polubowa Baal.

²⁰ Tei Yehu malo malentao̒ odie: “Tantuwalo mao̒ tolomodu tou̒ dulahee tuwau u molubo Baal!” Yi tau malolantu mao̒ dulahee boito

²¹ wau tei Yehu lopo malalumu mola ode ngoilanggubu Isirai̒lu. Todulahee boito malonao̒ mai ngoa̒amila tahi polubowa Baal, diaaluo penu boli ngotaa mao̒ taleitolaa. Timongolio tilumuwotao̒ ode kuili Baal wau lopoo̒polu hudungu boito monto talu demota balaka.

²² Tei Yehu helo malentao̒ alihu tamoo-ngurusia papaa-keyangiyalo ibaadati tokuili boito mongohi mao̒ pakeyangi boito ode tahinao̒wa mai moi̒baadati to Baal. Lapatao̒ palenta boito pilohutulio,

²³ tei Yehu tilumuwotao̒ ode kuili Baal boito wolei Yonadab walae̒e Rekhab, wau loloi̒ya mao̒ totau-tauwalo mola teto, “Palakisailo wolo ulintapo, wolo ngoa̒amila tawoluo botie bo hipolubowa Baal. Diila bolo woluo tewe taa u hemolubo Eeya.”

²⁴ Lapatao̒ tei Yehu wolei Yonadab helo podewo bake ode Baal. To bulemengo hudungu, tei Yehu malo potambati walu lopulu tamoo-kawalia wau polowila. Tio olo malo malentao̒ odie ode limongolio, “Timongoli musi momate-mateelo mao̒ ngoa̒amila tau boito. Tatoonu tamo poluli mao̒ ngota monto olimongolio moo̒lahi, mapateelo mate-mateelo mao̒!”

²⁵ Lolamemeto lapatio mao̒ tei Yehu lopodewo bake, tio yilumualo wau loloi̒ya ode tahipo kawalia wau mongo polowila boito, “Tuwotolo wau pateyalo mate-mateelo mao̒ timongolio ngoa̒amila. Diila polulia penu boli ngotaa mao̒ tamoo̒lahi!” Yi tilumuwotao̒ timongolio wolo wamilo pahupahuto, wau helomate yila-yilateelo mao̒ olimongolio ngoa̒amila mota teto, tulusi lodedea̒ milate limongolio boito ode bulemengio. Lapatao̒ timongolio tilumuwotao̒ ode wimbihu delomo kuili,

²⁶ wau lopolualai bui̒ lo Baal tulusi pilobulio.

²⁷ Bui̒ boito bilinasaalio wolo hudungulio lapatao̒ tambati boito pilopo waliilio tambati hepo ngiliyalo tunggula todulahee botie.

²⁸ Odi-odieelo mola tei Yehu helo poo̒belesi polubowalo Baal to Isirai̒lu.

^29-31 Sababu uito Eeya lotahuda mai odie odelei Yehu, “Totoonulalo upilo malentaa-U̒ mai olemu u pohutuwola ode wali lei Ahab mapilo hutumu. Sababu uito wau̒ modanti mai deu̒ walao̒ wau wombumu demola wali u opatio mamowali olongia to Isirai̒lu.” Bo tei Yehu diila wolo lealeaatu lohilao helo dungohe butoo̒ Eeya, Allahu Taa̒ala lo Isirai̒lu. Tio bo loo̒dudua̒ huhutu lei Yerobeam u heloo̒ sababu taulo Isirai̒lu ilodusa wolo helolubo sapi hulawa u bilongulio to Betel wau to Dan.

Tei Yehu yilate

³² Tou̒ boito Eeya lolumula helo poo̒owepito madala lo Isirai̒lu. Tei Hajael olongia lo Siria helohama ngoilanggubu madala lo Isirai̒lu

³³ to ambahu tiimuru lo Dutulaa Yordan demola huliaalio ngoilamingo kota lo Aroe̒ri membideo̒ lo Dutulaa Arnon, leituwoto madala Gilead wau Basan, tambati biluloa̒ losuku Gad, Ruben wau Manasye tiimuru.

³⁴ Hikaayati wewolio tomimbihu olei Yehu, leituwoto ngoa̒amila huhutu umopiohu u ohuna ode taawewo wau opahaa-lawanilio, tiluladu todelomo buku Sojara Mongo olongia lo Isirai̒lu.

^35-36 Tei Yehu helo malenta odelo olongia lo Isirai̒lu dulo pulaa walu lotaunu mola hiheolio. Tio yilate wau yilobungo to Samaria. Lapatao̒ tei Yoahas walai̒o lowali olongia lobuulota wolio.