OLUO MONGO OLONGIA 1 - KITABI HABARI MOPIOHE

Tei Elia wau ti Olongia Ahasia

¹ Lapatao̒ tei Ahab olongia lo Isirai̒lu yilate mao̒, lipu lo Moab helo mintaa̒ tingolo ode Isirai̒lu.

² Tou̒ dulahee tuwau ti Olongia Ahasia lonto Isirai̒lu lodehu mola lonto sulambe to belebelea yitaato bele biluloa̒ saaha li olongialio to Samaria, tilunggula tio pilalia daa̒. Yi tio malolao tau mola lohintu to Baal-Jebub, dewa kota Ekron to Pilistin, wolo tio mamoluli meaalo diila.

³ Bo malai̒kati lo Eeya lopoa̒hu olei Elia, nabi lonto Tisbe, mola lodunggaya wolo mongo utolia li Olongia Ahasia boito u loloi̒ya mao̒, “Wolo to Isirai̒lu diaaluo Allahu Taa̒ala tilinggula timongoli ohilaa monao̒ mohile potuhato to Baal-Jebub, dewa lokota Ekron boito?

⁴ Polelea mao̒ odeli olongia deu̒ Eeya lotahuda mai odie, ‘Yio̒ diila tamoluli, yio̒ mamaate!’ ” Lapatao̒ tei Elia loponao̒ palenta lo Eeya boito,

⁵ malo hualingo mongo utolia boito odeli olongia, lapatao̒ ti olongia lohintu mao̒, “Yilongola timongoli luli lohualingai?”

⁶ Timongolio lolametao̒, “Talolai̒ ngota lonao̒ mai lodunggaya wolamiaatia, wau lopoa̒hu mai olamiaatia u molele mao̒ oli Baginda deu̒ Eeya lotahuda mai odie odeli Baginda, ‘Wolo to Isirai̒lu diaaluo Allahu Taa̒ala, tilinggula ti Baginda lopoa̒hu u mohile potuhata to Baal-Jebub, dewa kota Ekron? ti Baginda diila tamoluli, ti Baginda mamaate!’ ”

⁷ “Woloolo mola laku lotau boito?” yilintu mao̒ li olongia.

⁸ “Jumba wau bintolo wohutalio lonto walito,” tametao̒ limongolio. “Ooo̒, uito tei Elia!” uali olongia mao̒.

⁹ Lapatao̒ tio lopoa̒hu polowila ngota wolo limo lopulu lota tahidudua̒ olio mota loheu̒pa olei Elia. Polowila boito lonao̒ mota lapatao̒ loo̒dungga olei Elia donggo hulohuloa̒a tohuludu tuwau, “Wuu, wato lo Allahu Taa̒ala,” ualo polowila boito, “ti olongia lomalentai yio̒ musi motuhuta mola!”

¹⁰ “Wonu watia botie memangi wato lo Allahu Taa̒ala,” tametao̒ lei Elia, “mamusi tulu motuhutai monto hulungo wau momobu tunggula maahu olemu wau ngoa̒amila tahidudua̒ olemu!” Tou̒ boitolo lotuhutai tulu wau lomobu lopomaahu polowila boito wolo olimo lopulu lota tahidudua̒ olio.

¹¹ Lapatao̒ ti olongia lolao ngotaalio lo polowila wewo wolo limo lopulu lota tahidudua̒ olio olo. Timongolio lonao̒ wau loloi̒ya mao̒ odelei Elia, “Wuu, wato lo Allahu Taa̒ala, ti olongia lomalentai yio̒ musi molaahe mola masaatia botie olo!”

¹² “Wonu wau̒ memangi wato lo Allahu Taa̒ala,” tametao̒ lei Elia, “mamusi tulu motuhutai monto hulungo wau momobu mopomaahu olemu wau ngoa̒amila tahidudua̒ olemu!” Tou̒ boitolo tulu lotuhutai lonto Allahu Taa̒ala wau lomobu lopomaahu polowila boito wolo olimo lopulu lota tahidudua̒ olio.

¹³ Pee̒entapo ti olongia lolao ngotaalio lo polowila wolo limo lopulu lota tahidudua̒ olio. Polowila boito lobotula mola ode huludu wau tou̒ leidungga mola totalu lei Elia tio lotibonggohuu̒ wau loloi̒ya mao̒, “Ambungua mai amiaatia, oo wato lo Allahu Taa̒ala! Tolia̒ngilo mai watia wau tahidudua̒ wolaatia botie. Diila patea amiaatia mate-mateelo mao̒!

¹⁴ Polowila duulota uwewo wolo tahidudua̒ woli mongolio yilate yilaahu lotulu lonto hulungo, bo watia momolohone, tolia̒nga mai watia!”

¹⁵ Tou̒ boitolo malo tahuda mai malai̒kati lo Eeya odelei Elia, “Diila mao̒ oohe! Dudui̒lo tio motuhuta mola monto huludu botie.” Sababu uito ponao̒lo Elia wolo polowila boito odeli olongia.

¹⁶ Lapatao̒ ualio mao̒ lei Elia odeli olongia, “Eeya lotahuda mai, ‘Yio̒ lopoa̒hu tau helohile potuhata to Baal-Jebub dewa lokota Ekron debo odelo to Isirai̒lu diaaluo Allahu Taa̒ala tamowali pohintuwalo. Sababu uito yio̒ diila tamoluli, yio̒ mamaate!’ ”

¹⁷ Yi mailateelo mola tei Ahasia debo odelo u tilahuda mai lo Eeya lotimbulude olei Elia. Sababu tei Ahasia diila owalao̒, yi tei Yoram wutatio lowali olongia lobuulota wolio. Uito lotoduo mai totaunu oluolio pamalenta lei Yehoram walae̒e Yosapat, olongia lo Yehuda.

¹⁸ Hikaayati wewolio tomimbihu wolo u hepilohutu li Olongia Ahasia tiluladio mao̒ todelomo buku Sojara Mongo Olongia lo Isirai̒lu.