OBAJA 1 - KITABI HABARI MOPIOHE

Eeya mamo hukuumani mai Edom

¹ Uti-utieelo laamalani lei Obaja; tio lopo tunggulai tahuli lo Eeya Taa Laba-labaalo molanggato tomimbihu bangusa lo Edom: Eeya malolao mai utolia-Lio ode babaa-ngusawalo, wau ito maloo̒ dungohe tahuli u dilelolio boito odelo odie mola, “Poti-dapatolo u mopaatea! Duloolo ito momonggato moluhu Edom.”

² Wau ode Edom, Eeya lotahuda, “Yio̒ pohutuwo-U̒ molulupuhu, tiinggula hinaa lo ngoa̒amila bangusa.

³ Yio̒ ilowimbuloa lo hilaamu u sombongi. Tiilo lokotamu yito hui̒dee botu u motoheeto; tambati poti-biluloa̒mu to bolitutuo̒ hui̒dee u molanggato. Sababu uito timongoli helo mikiilangi mola, ‘Tatoonu tamaambo mopodehu ola-U̒?’

⁴ Eleponu pohutuwomu belemu ngoilanggato beelea lobulungi rajawali, wau ngoilanggato lo bibii-natangiyalo to hulungo, yio̒ tantu mapo dehuwo-U̒ mola.

⁵ Tamootao̒wa meaala tamoo-lambatawa tamonao̒ mai tou̒ hui, bo mohama u otohilaalio. Taa u molipu angguru to ilengi laito mopo labitao̒ dengolo hungolio. Bo yio̒ lopualio mopulito lo mumuu-suumu.

⁶ Wuu wali mai lei Esau, yio̒ mapala-kisaalio wau halataamu u tutuuo̒ olo lambatolio.

⁷ Yio̒ yimbulowa lomongo panggalumu, wau polahiolio lonto lipumu. Yio̒ olaahe lomongo sahabatimu, hentobu lotaa hemolamela wolemu. Timongolio mamohintu-hintu pasali lo batangamu, ‘Tou̒toonu botia ngoa̒amila pongototamu?’

⁸ To dulahu Wau̒ mohukuumani mao̒ Edom, tau-taulio tahi tinepawa mapobinasa-U̒. Wau totoonulalo hikimati limongolio mamooli, diaaluo bakasiilio.

⁹ Tahi pohipatea monto Teman mamoohe, wau ngoa̒amila pajule lo Edom maamate.”

Sababu musababuulio Edom hukuu-maniyolo

¹⁰ “Yio̒ malohutu diila omanusia tomongo wutatumu wali mai, lei Yako. Sababu uito yio̒ mapo binasaalo, wau henteo̒ lotau ngotupa lojamani.

¹¹ Yio̒ tihutihulo tou̒ molaminga mota, todulahu musu helo ngantulu huhebu lo Yerusalemu wau lopo olaaheo̒ kota boito. Yio̒ lotipoo̒oyo tou̒ timongolio lomintaa̒ ngoa̒amila okokaya lo Yerusalemu wau lolaya-layadeo̒ towolota limongolio. Tutuuwauwa leetumu wolo musu boito.

¹² Diila patutilio yio̒ sanangi topaladu marapo taulo Yehuda wau motiwengahe todulahu lo wutatumu boito binasa. Diila patutilio yio̒ molatabu tou̒ tio suusa.

¹³ Diila tuu̒udio yio̒ tumuwota ode kota lo umati-U̒, wau mohantia̒ taa u donggo hidutolaa, tidiyolo mao̒ molambata halataalio todulahee marapolio!

¹⁴ Diila wajibulio yio̒ timihula to tilitangoa lodalalo, u molanggu tau-tauwalo tadonggo hemo polahi batanga monto musu, meaala mohudu olimongolio ode laawani todulahee timongolio ilodungga lou̒ suusa.”

Allahu Taa̒ala mamomutoo̒ babaa-ngusawalo

¹⁵ “Otutu, malembidei dulahio, Wau̒, Eeya, momutoo̒ babaa-ngusawalo. Wolo u pilohutu lo Edom matontulia mai olio. Tio mamoo̒laasa olo wolo umaa pilohutulio.

¹⁶ Toitaato lo hui̒du-U̒ umantali umati-U̒ malongilu minumani u lopobayahei hukuumanilio. Bo minumani duo̒lo babaa-ngusawalo todunia botie lebe mopaa̒ato poli. Hukuumani boito diila mowali polahi limongolio. Timongolio musi mongilu mao̒ tunggula mopulito, lapatao̒ timongolio mamooli lou̒ diila obakasi.”

Isirai̒lu loo̒haama

¹⁷ “Bo to Hui̒dee Sion, mawoluo mai tamoa̒ahu, wau hui̒dee boito mowali tambati u tolomodu ode Olau̒. Yi wali mai lei Yako mamuli motolo moliki huta pusaka limongolio.

¹⁸ Umati-U̒ Isirai̒lu madebo odelo tulu u momobu tunggula maahu wali mai lei Esau, debo odelo tulu lomobu tunggula yilaahu laato to halabolu. Diaaluo penu boli ngotaa mao̒ monto wali mai lei Esau mamo lopato. Wau̒, Eeya malo tahuda!

¹⁹ Tau-tauwalo Yehuda Huliaalio mamo tibiluloa̒ to Edom. Tau-tauwalo monto hihui̒-hui̒dea ambahu otolopa mamopo olaaheo̒ lipu lo Pilistin. Suku lo Benyamin mamo tibiluloa̒ to Gilead, wau Isirai̒lu umati-U̒ mamo ngaawasa ngoilanggubu Epraim wau Samaria.

²⁰ Taulo Isirai̒lu Tilayo mamuli mohualingai monto polayahu wau motibiluloa̒ to Penesia demola Jarpat. Tau-tauwalo Yerusalemu tapilo layahu to Sardis, mamuli mohualingai wau motolo miliki kokoo-tawaalo towimbihu huliaalio lo Yehuda.

²¹ Ulipu lo Yerusalemu talaito otilapulo mamoluhu Edom wau mopo taa̒aluku mao̒. Yi Wau̒ Eeya mamo malenta odelo olongia.”