NEHEMIA 9 - KITABI HABARI MOPIOHE

Ulipu helongaku dusalio

^1-2 To boitolo, ulipu lo Isirai̒lu lotia̒mbu mao̒. Tmongolio helopuasa u lopobiloheo̒ ololee̒e to duduu-sawaalo limongolio. Timongolio helo pohalahe batanga lonto ngoa̒amila tau deli. Odelo tuoto ilodungga lou̒ suukali, timongolio helomake kaingi kado wau helo mua̒yadeo̒ huta to lunggongi mongolio. Lapatao̒ timongolio tilimihula mola wau helongaku totoonulalo dusa limongolio wau dusa loluuhuru limongolio.

³ Ngotilonggadu tanu tolo jamu mola, buku Butoo̒ lo Eeya, Allahu Taa̒ala limongolio, hepilo bacalio mao̒ ode limongolio wau ngotilonggadu tolo jamu wumbutio mola timongolio helongaku duduu-sawaalo limongolio. Lapatao̒ uito timongolio losujudu wau helolubo Eeya, Allahu Taa̒ala limongolio.

⁴ Teto woluo mimbari ode tau-tauwalo Lewi wau toitaatio tihutihulo tei Yesua, Bani, Kadmiel, Sebanya, Buni, Serebya, Bani wolei Kenani. Wolo suala daa̒ timongolio helodua̒ mola ode Allahu Taa̒ala limongolio.

⁵ Ibaadati to dulahe boito hetilumula tau-tauwalo Lewi wumbutio mola botie: tei Yesua, Kadmiel, Bani, Hasabneya, Serebya, Hodia, Sebanya wolei Petahya. Timongolio loloi̒ya, “Tihuloolo wau pujialo mola Eeya Allahu Taa̒alanto! Wohia mola poloi̒laalo momuji ode Eeya ohiheo-hiheolo mao̒! Ilopujialo mola tanggulo Eeya tapolupolu lo molamahu, tanggulo upolu-polutuo̒, mongilabotao̒ totoonulalo poloi̒laalo momuji!”

Dua̒ helongaku dusa

⁶ Lapatao̒ ulipu lo Isirai̒lu helodua̒ mola odie, “Eeyaalo Eeya, Eeyaalo Taa Tuwa-tuwaulo: Pilopowali lo Eeya poliyama wau ngoilanggubu baangio daa̒, wau olo deheto wau huta boli totoonulalo tuangio, lapatao̒ longohi tutumulo wau tilaala mai lo Eeya. Ode Eeya totoonulalo kawasa to hulungo molubo wau mosujudu; timongolio taa̒aluku to Eeya wau hipohudua mola batanga.

⁷ Eeyaalo Allahu Taa̒ala, Eeya Taa Tuwa-tuwaulo. Tilulaoto Eeya tei Abraham to huungo bangusaalio. Ur to Babel matilolaalio, sababu Eeya lohihilao talo titau̒wa mao̒. Lapatao̒ yilohi mai lo Eeya olio tanggula bohu: Abraham, uitolo tanggulio tumulalo mai tou̒ boito.

⁸ Ilodungga lo Eeya tio tatapu wau molotolo lo hilao to Eeya wau modungohu. Lapatao̒ pilohutu mai lo Eeya wolio daantia u mototoheto. Huta lo Kanaa̒n, Het wau Amori, huta lo Perisi, Yebus wau Girgasi, ngoa̒amila boito mawohi mai lo Eeya olio; odelo tambati potibiluloa̒ lo ngoilanggubu waliilio mai. Lapatao̒ piloo̒polu mai lo Eeya, danti boito to olio, sababu Eeya aadili wau tatapu wau molotolo hilao.

⁹ Bililohe mai lo Eeya sikisa loluuhuru lo mongowatotia tou̒ yilalu mola; Dilungohe lo Eeya hiyongio to Masiri wau to Lau Teberau.

¹⁰ Toli olongia lo Masiri hepilohutu mai lo Eeya susuu-aliyaalo upolu-polutuo̒, wau olo to pogawee wau ulipu lo lipulio, sababu otaawa lo Eeya woloolo mola umati lo Eeya hepiloo̒ ngongotio. Lapatao̒ lomasahuru lomola tanggulo Eeya tunggula to dulahe botie.

¹¹ U lohutu mao̒ dalaalo ode umati lo Eeya, deheto bilutao̒ lo Eeya; pilopo balango Eeya timongolio loli wamoo̒ deheto u diila lobata. Tahi pohenela olimongolio helo ahumo todelomo taluhu u modelomo, debo odelo botu helo ahumo to deheto u moo̒tihela hapato.

¹² Wolo heengo ngopita hetilau̒wa lo Eeya timongolio tou̒ dulahu. Wau tou̒ hui dalalio hetilinela mai lo Eeya wolo wolihi patoo̒ tulu.

¹³ Lonto hulungo Eeya lotuhutai ode yitaato Hui̒dee Sinai, lapatao̒ Eeya helotahuda ode umati lo Eeya lohihilao. Heilohi mai lo Eeya butoo̒, wuu̒du wau palenta, u aadili, otutu wau ohuna.

¹⁴ Dulahu Saabati u mantali musi polameya mao̒ limongolio, wau lotimbulude olei Musa butoo̒ Eeya yilohi mai lo Eeya.

¹⁵ Tou̒ timongolio hepolaanga wau ilokulangia lo ua̒alo, roti lonto hulungo pilotuhutai lo Eeya. Wau lonto botu u loobuo̒, mototoheto wau moluwalo taluhee poluli totoa̒ngo pilopo tolohei lo Eeya wolo tolo-tolobulio. Ilahula lo Eeya timongolio lotihuloa̒a tohuta u pilodanti mai lo Eeya olio wolo tadia.

¹⁶ Bo loluuhuru lo mongowatotia soombongi wau baaa̒ngiolo; totoonulalo palenta lo Eeya diila dilungohe limongolio.

¹⁷ Timongolio diila lodungohe, wau totoonulalo opopiohu lo Eeya hepilalongi mongolio, wau ngoa̒amila huhutu u moo̒linggolabe lonto Eeya heilooli lonto pikiilangi limongolio. Wolo mangimangi timongolio helo lulaotao̒ tau̒wa ngota, u lodelo olimongolio ode Masiri, luli lowali wato. Bo Eeya Allahu Taa̒ala tamotohilaa momaa̒apu mai, diila opulita lo sabali, mura lohilao wau polupolu lo ponu. Ponu lo Eeya otutu polu-polutuo̒; Eeya diila lololaa olimongolio.

¹⁸ Timongolio helohutu balahala debo odelo sapi. Lapatao̒ timongolio helo loi̒ya, ‘Uti-utieelo Allahu Taa̒alamu, talodelo olimongoli lonto Masiri, lonto polowato.’ Yaa Allahu Taa̒ala, Eeya lohihilao tahilina limongolio!

¹⁹ Bo to delita boito timongolio diila tilolaa lo Eeya, sababu Eeya polupolu lo ponu. Wolihi patoo̒ heengo wau tulu diila luli pilahuto Eeya, potuhata to dalaali mongolio tou̒ dulahu wau tou̒ hui.

²⁰ Wolo kawasa lo Eeya u mopiohu hepilate lo Eeya timongolio. Timongolio lolamelo manna wau longilu taluhu lotuuu̒delo mao̒.

²¹ Ngotilonggadu wopato pulu lotaunu mola to auhu padengo, pilopo tuu̒udu mai lo Eeya totoonulalo u palaluo limongolio. Pakeyangi limongolio diila pee̒enta mao̒ helorusa, oa̒ati mongolio diila helo ngongoto wau loomatango,

²² Hepiloo̒ haama mai lo Eeya timongolio to dadaata bele biluloa̒ saaha li olongia wau bangusa to sipatana limongolio. Hesybon lipu li Olongia Sihon, hiluloa̒a limongolio; Basan lipu li Olongia Og, hepiloti tambatia limongolio.

²³ Pilopowali lo Eeya wali mai limongolio ngodaata lo popoo-liyamaalo to dulente. Yilohi mai lo Eeya huta u piloti biluloa̒ limongolio, huta u mapilodanti mai lo Eeya odeli nenemoyaalio.

²⁴ Wali mai limongolio helo poo̒laaheo̒ huta lo Kanaa̒n; ulipu mola teto hepilopo taa̒luku lo Eeya. Umati lo Eeya yilohia lo Eeya kawasa helohutu toonula otohilaalio to babaa-ngusawalo Kanaa̒n wau mongo olongialio.

²⁵ Umati lo Eeya helohama bibii-natangiyaalo potiduo̒laalo, huta u molomiodu wau bele polupolu lo okokaya. Aa̒aliyaalo wau butu lotaluhu hehilama limongolio, ileengi lo angguru, bungo lo ayu jaitun wau huhuu-ngowaalo wewolio. Timongolio hiliingohe sababu helo lamelo lodudua̒ tohila-hilaalio. Totoonulalo wowohi mai lo Eeya u mopiohu hei̒lolamita limongolio.

²⁶ Bo umati lo Eeya helomintaa̒ tingolo wau diila lodungohe to Eeya, helo malonga butoo̒ wau wuu̒du lo Eeya, helomate mongo nabi yila-yilateelo mao̒ tahemo poe̒elao̒ olimongolio, wau talo poa̒hu olimongolio monguli ode Eeya Allahu Taa̒alaalio. Yaa Eeya, tingga maito olo Eeya hehinaa limongolio,

²⁷ yi yiludu mao̒ lo Eeya timongolio ode musulio tawolo diila omanusia helo ngaawasa wau lodeehe olio. Bo todelomo osuusa u helo dutonga, timongolio helo ngiibode ode Eeya lei̒ tulungi mai. Lonto sologa Eeya helo dungohe; wolo polupolu loponu Eeya lolametai. Yilao mai lo Eeya tau̒wa wau tamoohipatea tamolotolo buheli talo pobebasi olimongolio lonto laawani.

²⁸ Bo tou̒ lipulio luli ilaamani, timongolio luli hua̒a ilodusa. Yi heiludu lo Eeya olo timongolio tomusu tahe lodeehe olimongolio. Bo, tou̒ timongolio iliinsapu helolee̒e tio̒otutua, timongolio helo ngiibode ode Eeya lei̒ poa̒ahu mai. Yi lonto sologa Eeya lodungohei, wau he tilulungia lo Eeya wuwuulia, sababu Eeya molaasa momonu to limongolio wau malo molaasa momonu.

²⁹ He dilini lo Eeya timongolio alihu pongaajali lo Eeya dungoheelo, bo timongolio he lopotouli butoo̒ Eeya wolo hilaa mangimangi. Lebe-lebe pomao̒, wonu butoo̒ Eeya poponao̒olo, tantuulo mao̒ maa mowali pongakualo tutumulo. Timongolio baaa̒ngiolo wau diila mowali bolio̒lo huhamaalio, diila mohuto modungohu, diila mohuto motaaa̒ti.

³⁰ Taunu domi taunu Eeya sabali hemopo eelai; lotimbulude tomongo nabi, Rohu lo Eeya helo tahuda ode limongolio. Bo umati lo Eeya boito helo mambola bulonga, lapatao̒ heiludu lo Eeya ode babaa-ngusawalo totoonulalo lipu.

³¹ Bo sababu ponu lo Eeya udaa̒ polu-polutuo̒, diila tilolaa lo Eeya meaambo ilaantulu lo Eeya timongolio. Memangi, Eeyaalo Allahu Taa̒ala tadiila obandingi; udaa̒ ponu lo Eeya, poluolu lo odehu hilao!

³² Yaa Allahu Taa̒ala, Allahu Taa̒ala lo mongowatotia tamolotolo! Allahu Taa̒ala taa udaa̒ wau laba-labaalo! Wolo tatapu wau molotolo hilao dilihuma lo Eeya dadaanti; totoonulalo danti lo Eeya piloo̒polu mai lo Eeya wau piloponao̒ lo Eeya. Tumulalo mai mongo olongia lo Asyur helodeehe olo mongowatotia demai botia, sikisaa u helo toduo mai to mongowatotia. Mongo olongia lo mongowatotia, iimamu, nabi wau tahimuloa lo ulipu, olo loluuhuru wau ulipu, masilikisa ngoa̒amila. Ambunguolo diila mao̒ lipata totoonulalo sikisa boito! Ambunguolo diila mao̒ poo̒olia monto pikiilangi lo Eeya!

³³ Huhutu lo Eeya aadili, hilukumani mai lo Eeya mongowatotia tao̒dusa; Eeya debo molotolo hilao penu boli mongowatotia polupolu lo aibu.

³⁴ Loluuhuru lo mongowatotia, olongia, iimamu wau tahimuloa lo ulipu, helo lambanga butoo̒ Eeya wau diila lomandungi. Totoonulalo palenta wau didini uilohi mai lo Eeya, diila piladulilio, diila olo dilungohelio.

³⁵ Yilohi mai lo Eeya tomongo olongia tahe momalenta umati lo Eeya, tou̒ timongolio hibiluloa̒wa tohuta u luasi wau molomiodu wowohi mai lo Eeya. Bo timongolio diila lololaa mao̒ tutumulo u moleeto, diila lohuto lotiwato to Eeya wau loi̒baadati.

³⁶ Yi botia mongowatotia botie lowali wato tohuta uilohi mai lo Eeya odelo pusaka. Huta botie molomiodu, polupolu lo tilapulo huta, u patutilio olamita lo mongowatotia.

³⁷ Totoonulalo kelakela tilapulo huta botie musi wuduolo ode mongo olongia lolipu. Tahi kawaasawa boito hepiluduo̒ lo Eeya ode umati lo Eeya, odelo hukumani todusa lo mongowatotia to Eeya. Timongolio helo malenta tohila-hilaalio tobatanga lo mongowatotia wau bibiahu miliki lo mongowatotia. Sababu uito mongowatotia botia hesilikisa, malo ileepita wau limilimi!”

Ulipu helo podutu pali lo uluu̒ to daantia

³⁸ Dadaasari to tilolahepaalo uilowali mai boito, ami ulipu lo Isirai̒lu helohutu daantia udiila mowali etuwolo wau leituladu, wolo yilohia capu lomongo tau̒wa lami, tau-tauwalo Lewi wau ngotaalio li iimamu lami.