NEHEMIA 8 - KITABI HABARI MOPIOHE

Tei Esra helo pobaca mao̒ Butoo̒ ode ulipu

¹ To hulalo opitulio taulo Isirai̒lu malo titatapu tokotaalio ngota-ngota. To bohulo dulahu hulalo boito timongolio helo tia̒mbu to Yerusalemu, topaango totalu Huhebu Hulubangi Taluhu. Timongolio helohile alihu Buku lo Butoo̒ hamaa mao̒ li Iimamu Esra, ngotaalio lo ahali todelomo Butoo̒ uilohi mai lo Eeya ode bangusa lo Isirai̒lu lotimbulude olei Musa.

² Lapatao̒ tei Esra lodelo mota buku boito ode talu lo majilisi u tilitangoa lou̒ mongo lolai̒, mongo bua tau̒ kekeei̒ tamotuheta moontapo u mongalati.

³ Lapatao̒, lonto dimodupo demola ngoputu lo dulahu, tei Esra helo pobaca mao̒ Butoo̒ boito ode limongolio. Timongolio ngoa̒amila lodungoheo̒ wolo helo poo̒tuotao̒ tutu.

⁴ Tei Esra tilimihula mola tomimbari lo ayu u mapilohutu ode kaparluwani lo dudunggaya boito. To ambahu olowalalio hitihula tau-tauwalo botie: tei Matica, Sema, Anaya, Uria, Hilkia wolei Maaseya; hiambola to ambahu oloihilio hitihula: tei Pedaya, Misael, Malkia, Hasum, Hasbadana, Jakaria wolei Mesulam.

⁵ Tomele tambati lei Esra tihutihula boito lebe molanggatao̒ wolo tau-tauwalo boito, tilinggula timongolio ngoa̒amila loo̒onto olio. Lolamemetao̒ tio lomuo̒ mola buku boito, timongolio ngoa̒amila tilimihulo.

⁶ Tei Esra loloi̒ya mao̒, “Pujialo mola Eeya, Allahu Taa̒ala taa udaa̒!” Ngoilanggubu ulipu helo mintaa̒a mola uluu̒lio lola-langgotolo mao̒ wau lolameto, “Amin, amin!” Tulusi timongolio losujudu lomola helolubo Allahu Taa̒ala.

⁷ Lapatao̒ uito timongolio maa lobongu wau tilimihula mola to tambatilio ngota-ngota, sambela ngojumulaa taulo Lewi helo tombangao̒ Butoo̒ boito ode limongolio. Tau-tauwalo Lewi boito yito: tei Yesua, Bani, Serebya, Yamin, Akuba, Sabetai, Hodia, Maaseya, Kelita, Ajarya, Yojabad, Hanan wolei Pelaya.

⁸ Timongolio helo tohuwale mao̒ Butoo̒ Allahu Taa̒ala boito ngotayade domi ngotayade wau helo tombangao̒ tilinggula ulipu loo̒ paahamu u pilobaca boito.

⁹ Loo̒dungohe Butoo̒ u pilobacalio mao̒ boito, ulipu malo linggolabe daa̒, tulusi hilumoyongo. Yi ti gubolonulu Nehemia woli Iimamu Esra taa̒ahali lo Butoo̒ boito, wau tau-tauwalo Lewi tahe lotombangao̒ Butoo̒ boito, loloi̒ya mao̒ ode ngoilanggubu ulipu odie, “To dulahe botie dulahe u tolomodu ode Eeya Allahu Taa̒ala limongoli, oditolio diila mao̒ potisuukali meaambo humoyongo.

¹⁰ Botia pohualingolo; polamelolo wau pongilulo wolo weengahu. Wohia mota ngotayadu lo ua̒alo wau angguru limongoli ode limongolio tahi mosikinia. To dulahe botie dulahe tolomodu ode Eeyaanto, oditolio diila mao̒ potisuukali. Oweengahu uilohi mai lo Eeya ode limongoli mamopo lotolao̒ olimongoli.”

¹¹ Wau olo tau-tauwalo Lewi helo poduo̒tao̒ ulipu wau loloi̒ya mao̒ wuwuulia, “Diila mao̒ potisuukali to dulahe u tolomodu botie.”

¹² Yi malo hualingo ngoilanggubu ulipu mota lolamelo wau longilu wau he lolaya-layaadeo̒ ua̒alo wau u yilumolo ode tau-tauwalo wewo. Timongolio lotiwengahe sababu malongalati boli lo bacaaa̒ni u ilodungohe limongolio boito.

Potihunggu lo Wombohe Duungo

¹³ Loombulio mola malo tia̒mbu ngoa̒amila tau̒wa lokaumu, mongo iimamu wau tau-tauwalo Lewi, tulusi lonao̒ odelei Esra mota helo poo̒olato pongaajali Butoo̒ Eeya.

¹⁴ Timongolio loo̒dungga deu̒ todelomo Butoo̒ uilohi mai lo Eeya lotimbulude olei Musa, Eeya helei̒ biluloa̒ umati lo Isirai̒lu todelomo wowoo-mboheyaalo bo u ngopee̒ mola ngotilonggadu potihunggu lo Wombohe Duungo.

¹⁵ Sababu uito to ngoilanggubu Yerusalemu to kokoo-tawaalo wau akaa-mbunguwalo, timongolio helo pomalalumu mola palenta botie, “Ponao̒lo mola ode hihui̒-hui̒dea wau hamaawa mai tataa-ngowaalo bungo lo ayu woohu, jaitun, bungo lo ayu winulo, palma wau bubuu-ngowalo ayu wewo u pohutuwalo wombohe lotuuu̒de wolo wuu̒du todelomo Buku lo Butoo̒.”

¹⁶ Lapatao̒ malonao̒ timongolio ngoa̒amila helohutu wowoo-mboheyaalo to wawaa-topowaalo u payapayadu toitaato bele limongolio, topaango lo belelio, topaango ambahu talu Bele lo Eeya, to tanalapa totili lo Huhebu Hulubangi Epraim.

¹⁷ Ngoilanggubu ulipu tamalo hualingo lonto pilolayahu boito helohutu mao̒ wowoo-mboheyaalo boito, lapatao̒ lotibiluloa̒ teto. Uti-utieelo bohulo sua̒li boito hepilo hutulio tumulalo mai to jamani lei Yosua walae̒e Nun, yi ngoa̒amilalo hiweengahe wau sanangi tutu.

¹⁸ Pitu hui mola hiheolio timongolio helo potihunggu. Timitimii̒du dulahu ngota-ngotayadu Buku Butoo̒ Allahu Taa̒ala hepilobaca mao̒ lei Esra. To dulahu u owalulio pilohutulio upacala mongoa̒lo huhuloa̒a, lotuuu̒de wolo wuu̒du lo Butoo̒.