NEHEMIA 6 - KITABI HABARI MOPIOHE

Woomboa to olei Nehemia

¹ Tei Sanbalat, Tobia, Gesyem wau mumuu-suwaalo lami uwewo loo̒dungohe deu̒ ami mailapato helo poo̒pioheo̒ dingingo meeseli, wau deu̒ ngoa̒amila huangio mapilambola, eleponu tou̒ boito ami diipo helo pohuli mao̒ duduu-ngowaalo huhebu wau huhuu-hebuwaalo hulubangi lo kota.

² Yi tei Sanbalat wolei Gesyem malo loduo olau̒ alihu monao̒ mai mohutu mao̒ dudunggaya woli mongolio totala tuwau lo kambungu to Lumbaya Ono. Bo ilotaawau̒ deu̒ timongolio ohilaa mopotopotaala olau̒.

³ Sababu uito maa yilaou̒ mota totameto odie ode limongolio, “Wau̒ diila mowali monao̒ mai sababu donggo hemohutu kalaja upohuna daa̒. Kalaja boito mamei otongo wonu tolaau̒ mao̒ u modunggaya wolimongoli.”

⁴ Tunggula poo̒opato timongolio helo loduo olau̒ wolo tingohio u tutuuwauwa, odito olo wau̒ helo lameta mota wolo totameta u tutuuwauwa.

⁵ To olimolio ngotaalio lotau lei Sanbalat lonao̒ mai wau longohi mao̒ tuladee huo̒huo̒

⁶ u tingohio odie mola: “Tei Gesyem helo poo̒otutu mao̒ pipii-tanawaalo to wolota lo babaa-ngusawalo to palitio leewe, u hemoloi̒ya deu̒ Wutato wau ngoa̒amila taulo Yahudi hemolanjana momintaa̒ tingolo, wau uito sababuulio Wutato helo poo̒piohe dingingo meeseli lokota. Tio loloi̒ya olo deu̒ Wutata mamomuduo̒ batanga lohihilao mowali olongia lo Yehuda,

⁷ wau malolunu mao̒ dengolo lota nabi u momudua̒a to Wutata to Yerusalemu. Pitana boito tantu matunggula odeli olongia. Sababu uito, ponao̒lo mai modulohupa mao̒ sua̒li boito.”

⁸ Bo wau̒ malolao mota totameta botie, “Ngoa̒amila uiloi̒ya mai lo Wutata boito toongi wambai̒o wau aakali lo Wutata lohihilao.”

⁹ Timongolio lohimontala helo poo̒ohe olami alihu ami mongotongo kalaja boito. Wau̒ lodua̒ mola, “Yaa Allahu Taa̒ala, poo̒lotola mai watotia!”

¹⁰ Membideo̒ lo wakutu boitolo, wau̒ lonao̒ mota ode bele lei Semaya walae̒e Delaya, wau wombu lei Mehetabeel, sababu tio ilotaibuta lonao̒ mai ode olau̒. Ualio mao̒ ode olau̒, “Dulo ito duulota mota motituuo̒ to Bele lo Eeya. Wau untiyanto ngoa̒amila huhebulio, sababu woluo tao̒hilaa momate olemu, mate-mateelo mao̒. Otanu to hui botie yio̒ maa pateelio mate-mateelo mao̒.”

¹¹ Bo wau̒ lolametao̒, “Wau̒ botie diila taa u hilaa mopolahi batanga. Odelo taa awamu wau̒ diila mowali tumuota mota ode Bele lo Eeya, de wau̒ maamate. Diila, wau̒ diila mohuto!”

¹² Lapatao̒ he tilimbangiu̒ mola sua̒li boito, malongalati wau̒ deu̒ heingo lei Semaya boito diila lonto Allahu Taa̒ala, bo lonto olei Tobia wolei Sanbalat. Timongolio malo sooroi̒ olei Semaya u lopotunggulai nubuuati boito ode olau̒.

¹³ Makusudu limongolio yito alihu wau̒ moohe wau modudua̒a potua limongolio, tilinggula mohutu mao̒ dusa. Lou̒ odito timongolio ohiyangio mopoo̒ leetao̒ tangguluu̒ tilinggula wau̒ mamowali pololoo-iyaawa lotau.

¹⁴ Wau̒ lodua̒ mola, “Yaa Allahu Taa̒ala, ambunguolo eelailo mai wolo u pilohutu lei Tobia wolei Sanbalat boito. Ambunguolo hukumaniyalo mai timongolio! Odito olo ti nabiah tai̒lunte Noaja wau mongo nabi wewo tao̒hilaa hemopo oohe olo watotia.”

Pomongulalo dingingo meeseli yilapato

¹⁵ Dingingo meeseli boito hepiloo̒ piohio loo̒pulita wakutu limo lopulaa duuhui mola, wau yilapato todulahe odulo pulaa limo hulalo Elul.

¹⁶ Tou̒ mumuu-suwaalo lami to wolota lo babaa-ngusawalo totili mao̒ leeto loo̒dungohe sua̒li boito, timongolio mailoohe oolia lobaya, sababu ngoa̒amila tau motota deu̒ kalaja boito hepilohutulio wolo polotulungi lo Allahu Taa̒ala.

¹⁷ Sambela uito mongo tau̒wa lo Yahudi debo donggo olo hemo tutuuladee wolei Tobia.

¹⁸ Dadaata taulo Yahudi helo sahaabatia wolei Tobia, sababu tio moluhengo lei Sekhenya walae̒e Arah. Boli olo tei Yohanan, walae̒e Tobia lonika wolo walao̒ bua lei Mesulam walae̒e Berekhya.

¹⁹ Eleponu tei Tobia mololaalaaita hemoluladei tuladee ode olau̒ u hemopo oohe-oohe olau̒, bo mongo tau̒wa lo Yahudi boito hemoo̒ tanggulai totaluu̒ totoonulalo opopiohio lei Tobia. Wewolio mao̒ leeto ngoa̒amila uiloi̒yaau̒, hepilo dulohu limongolio olio.