NEHEMIA 5 - KITABI HABARI MOPIOHE

Tei Nehemia helo tulungi taa mosikini

¹ Dengolo wakutu mola lapatio mao̒ dadaata taulo Yahudi, mopio mongo lolai̒ meaalo mongobua, helo hinggile pasali lotau-tauwala ngobangusaalio.

² Woluo taloloi̒ya, “Walau̒ ngohuntua. Ami palalu pale u potumulo.”

³ Woluo poli taloloi̒ya, “Wau̒ bolo pakusa helo pohuloo̒ halabolu, ileengi lo angguru wau bele lami u lotali pale alihu ami diila mate lo polaango.”

⁴ Wau donggo woluo poli taloloi̒ya, “Ami malo bulotaa doi u pilotoloto beya utilantu mao̒ li olongia ode halabolu wau ileengi lo angguru lami.

⁵ Wolo ami olo diila taulo Yahudi? Wolo walao̒ lami diila motutuuwauwa wolo mongo walao̒ lo Yahudi uwewo? Eleponu odito ami bolo pakusa helo poluli mao̒ mongo walao̒ lami lowali wato. Tumbao̒ woluo walao̒ lami tadulahu mapilotali lami lowali wato. Ami diilalo o lotoolo sababu halabolu wau ileengi lo angguru lami mapilopo huloo̒ lami.”

⁶ Loo̒dungohe yinggile limongolio boito, wau̒ maloingo daa̒

⁷ wau helolantu u mopohutu mao̒. Lapatao̒ he diliniu̒ tahimuloa lo ulipu wau tau̒wa ulipu. Yiloi̒yau̒ mao̒, “Timongoli hipodeehea mongo wutatumu lohihilao!” Lapatao̒ wau̒ helohutu mao̒ dudunggaya wolo ulipu u loloolohe dalalo pasali losua̒li boito,

⁸ wau loloi̒ya mao̒, “Wolo tio̒opatea ito malo tolotao̒ mongo wutatonto taulo Yahudi tabolo pakusa helo potali lo batangaalio to bangusa deli. Bo botia timongoli botie tumbao̒ helo makusa olimongolio lopotali lo batangaalio ode limongoli, lebe-lebe pomao̒ timongoli olo taulo Yahudi!” Mongo tau̒wa boito diila loo̒ tameto penu boli ngotahe mao̒.

⁹ Lapatao̒ luli yiloi̒aau̒ mao̒, “Huhutuumu boito diila mopiohu! Paatutilio timongoli tumutumulo wolo raasa moohe to Allahu Taa̒ala. Lou̒ odito musunto tadiila o Eeya boito diila yilohia limongoli wakutu u mohina olanto.

¹⁰ Wau̒ lohihilao, mongo wutatuu̒ wau mongo sahaabatiu̒ malo pobulotao̒ doi wau pale ode ulipu. Ami diilalo lei̒ powalingai u bilolotalio boito.

¹¹ Paatutilio timongoli olo molulutao̒ totoonulalo biloli ulipu to olemu boito, mopio udebo odelo doi meaalo pale boli angguru meaalo winulo jaitun. Hua̒a powalingalo mao̒ halabolu, ileengi lo angguru, ileengi lo jaitun wau bele limongolio!”

¹² Mongo tau̒wa boito lolametao̒, “Potua boito madudua̒ mao̒ lami. Ami mamopo walingao̒ ngoa̒amila wau diila tamo hinggile baayarilio wolo-wolo monto olimongolio.” Lapatao̒ tiliyanguu̒ mai mongo iimamu wau ilahulau̒ mao̒ mongo tau̒wa engonti helotadia totalu lomongo iimamu boito, deu̒ wolo u mailoi̒yau̒ limongolio boito, tio̒otutua mapohutuo limongolio.

¹³ Lapatao̒ bilua̒duu̒ mao̒ bintolo wohutaau̒ tulusi pilongee̒eu̒ mao̒ sambela loloi̒ya, “Odi-odieelo mola patutilio Allahu Taa̒ala mopongee̒ mai timii̒du taa u diila moe̒ela dantilio. Tau boito mamowali sikisa, bele wau totoonulalo harataalio mahamaa lo Allahu Taa̒ala!” Ngoilanggubu majilisi helo lametao̒, “Amin!” tulusi lomuji mola to Eeya. Yi mongo tau̒wa boito malo poo̒polu mao̒ danti limongolio.

Tei Nehemia mura lohilao

¹⁴ Wau̒ malowali gubolonulu lo Yehuda mopulaa dulo taunu mola hiheolio, deu̒yito-yito tumulalo mai totaunu odulo pulu demola taunu otolo pulaa duluo pamalenta li Olongia Artahsasta. Ngotilonggadu wakutu boito wau̒ wau mongo wutatuu̒ diila pee̒enta mao̒ helohama tulaheu̒ odelo gubolonulu.

¹⁵ Mongo gubolonulu tou̒ dipo-dipolulio mai wau̒, malowali banta lo ulipu sababu timongolio helohile wopato pulu doi talaa̒ ngohui duo̒lo ua̒alo wau angguru. Tumbao̒, mongo pogawee limongolio olo helodeehe ulipu. Bo wau̒ diila mohuto mohutu mao̒ odito sababu wau̒ moohe to Allahu Taa̒ala.

¹⁶ Ngoa̒amila lotooluu̒ heilohiu̒ mao̒ to pomongulalo dingingo meeseli wau wau̒ diila loo̒tapu huta penu boli ngopita mao̒ odelo wuupa buleu̒, eleponu ngoa̒amila tamomantua olau̒ lodudua̒ helo kalaja to pomongulalo boito.

¹⁷ Ngohetuto limo lopulu lota taulo Yahudi wau tahimuloa lo ulipu limongolio biasa heintaau̒ mao̒ molamelo tobeleu̒, diipo leituoto tataa-muwaalo lonto babaa-ngusawalo to tiheede lami.

¹⁸ Timii̒du dulahu hepowemau̒ mao̒ to oonggosiu̒ lohihilao sapi tuwau, wolomo himba hiliingohe wau ngohuntua maluo̒. Wewolio mao̒ leeto, timii̒du mopulu hui mola hepowimumutou̒ mao̒ polowema lo angguruu̒. Eleponu odito wau̒ diila lohuto helo hinggile tulaaheu̒ odelo gubolonulu, sababu otaawau̒ banta lo ulipu malo tuuheta buhetio.

¹⁹ Watotia momolohone yaa Allahu Taa̒ala, ambunguolo eelailo mai totoonulalo u mapilohutu lo watotia ode bangusa botie wau ambunguolo balakatiyalo mai watotia.