NEHEMIA 4 - KITABI HABARI MOPIOHE

Tei Nehemia helohutu tomusu taulo Yahudi

¹ Tou̒ tei Sanbalat loo̒dungohe deu̒ ami taulo Yahudi donggo hemo poo̒piohe dingingo meeseli lokota, yi tio maloingi daa̒ wau helo sosero olami.

² To talu lomongo sahaabatilio wau suludadu lo Samaria, tio loloi̒ya, “Wolo u donggo hekalajaa taulo Yahudi topotala udiila mowali pongola-pongola boito? Wolo timongolio ohilaa muli momongu kota botie? To lantobi mongolio kalaja boito mowali lapato todelomo ngohui mola, bo wolo hemopodewo bake? Wolo huntua lopuputo u malopobu boito mowali powalio limongolio mali boboo-tuwaalo dingingo meeseli?”

³ Lapatao̒ tei Tobia tatihu-tihula totililio loloi̒ya mao̒ olo, “Bilohi mota dingingo meeseli ubilongu limongolio! Apula lo oa̒ayua olo mowali mopoloohubeo̒!”

⁴ Yi malodua̒ mola wau̒ odie, “Yaa Allahu Taa̒ala, ambunguolo dungohilo mai woloolo mola mongowatotia hilinaalio! Podunggaalo mai polohina boito ode yitaato lunggongi mongolio lohihilao. Ambunguolo hulilo mao̒ totoonulalo miliki limongolio lambotolio wau timongolio lohihilao bintao̒lio odelo tawalo ode lipu deli.

⁵ Ambunguolo diila mao̒ ambungua mai ololeeti mongolio wau ambunguolo diila mao̒ lipata dusa limongolio, sababu timongolio malohina olo mongowatotia tadonggo hemomongu botie.”

⁶ Tou̒ boito ami donggo hemo poo̒piohe tulusi dingingo meeseli boito, wau diila lohiheo lapatio mao̒ ngoilanggubu dingingo meeseli boito yilapato piloo̒piohu tunggula ngotayade duluo langgatio, sababu ulipu helo kalaja wolo polupolu lo sumaangati.

⁷ Tou̒ tei Sanbalat wolei Tobia wau tau-tauwalo Amon wau Asdod wau tau-tauwalo Arabi loo̒dungohe deu̒ kalaja hemo poo̒piohe dingingo meeseli lo Yerusalemu boito lebe helolaia̒ mola wau deu̒ huhuu-wangowalo to dingingo meeseli mapilambola, yi timongolio maloingo daa̒.

⁸ Timongolio loheluma ohilaa moluhu Yerusalemu u mopotoodeo̒ tolonggalo.

⁹ Sababu uito ami lodua̒ mola ode Allahu Taa̒ala lami wau helodaha mao̒ kota boito hui wau dulahu,

¹⁰ Bo taulo Yehuda helo polahu mola lahu lo yinggile odie: “Lotoolunto lopulito u momintaa̒ detohu, hiambola puputo donggo ngohuntua hihuntu-huntuwalo mao̒. Rasaalio diila mambo ito mokalaja odie momongu mola dingingo meeseli lokota botie.”

¹¹ Tou̒ boito musu lami donggo hemoranjana lou̒ tumahuo̒olo mola u moluhu olami, lapatao̒ momate olami mate-mateelo mao̒ tilinggula kalaja lami meio̒tongo.

¹² Bo taulo Yahudi tahi biluloa̒wa totili limongolio, wuwuulia helonao̒ mai lopoo̒taa ranjana lomusu boito.

¹³ Sababu uito wau̒ helo laya-layadeo̒ wamilo, totobuo̒ wau pana ode ulipu, lapatao̒ pilopo tambatiu̒ mao̒ timongolio lodudua̒ kaumulio ngota-ngota to dibalaka lo dingingo meeseli, to tataa-mbatiyaalo udiipo yilapato piioo̒piohu.

¹⁴ Tou̒ iloontongau̒ mao̒ deu̒ ulipu mailoohe, yi wau̒ loloi̒ya mao̒ olimongolio wau ode tahimuloa lo ulipu wau mongo tau̒wa, “Diilo mao̒ oohe tomusu! Eelailo mola to Eeya tamolotolo wau polupolutuo̒, wau pohipateelo ode mongo wutatumu, tau̒ kekeei̒, dilebua wau belemu!”

¹⁵ Mumuu-suwaalo lami loo̒dungohe deu̒ lanjana limongolio mailotaawa lami. Yi malongalati timongolio deu̒ Allahu Taa̒ala malo podiaaa̒ ranjana limongolio boito. Lapatao̒ ami luli lokalaja helo poo̒piohe dingingo meeseli boito.

¹⁶ Bo tumulalo mai todulahe boito bo ngotayadu lo tahidudua̒ olau̒ tahe lokalaja, hiambola ngotayade poli helo tidaha-daha wolo hipakea boo̒ lo popaatea wau otinggolo totobuo̒, porisai wau pana. Mongo tau̒wa lo ulipu helomantu mao̒ wolo lealeaatu lohilao to ulipu

¹⁷ tadonggo hemopoo̒piohe dingingo meeseli boito. Tahi pomotaala babaa-haniyaalo hudungu helohutu kalaja boito wolo uluu̒ ngotuali, hiambola uluu̒ uwewo helodihu tingolo.

¹⁸ Mongo pani lobotu helo kalaja wolo wamilo hia̒wade to wohuta. Tamohipawa toroompeti tuotio topotala, tulusi woluo totiliu̒.

¹⁹ Lapatao̒ wau̒ loloi̒ya mao̒ ode ulipu, tahimuloa lo ulipu wau mongo tau̒wa, “Kalaja botie malooo̒ma demola u molamingo, tilinggula ito bolo hipule-pulepeyalo mao̒ to ngohilayaa̒ dingingo meeseli botie, ngotaalio molamingo wolo uwewo.

²⁰ Oditolio, wonu timongoli moo̒dungohe toroompeti, hua̒a potia̒mbulo mai topalito lami tewe. Allahu Taa̒alanto mamopaatea duo̒lo olanto.”

²¹ Odi-odieelo mola ami helo kalaja tumulalo mai tou̒ subu tunggula popoo-liyamaalo oontongo mola to hulungo. Ngotayadu lo ulipu helo poo̒pioheo̒ dingingo meeseli, hiambola u wewo helo tidaha-daha wolo totobuo̒ to uluu̒.

²² Ngotilonggadu maasa boito ngoa̒amila tao̒tuugasi wolo tamoomantua olimongolio, pilei̒ huiyaau̒ mao̒ to Yerusalemu. Lou̒ odito tou̒ hui ami moo̒ daha mao̒ kota wau dulahio mola momongu dingingo meeselilio.

²³ Wau̒ lohihilao, mongo sahaabatiu̒, tahidudua̒ olau̒ wau tamokawalia olau̒ laito hipakea kaingi lokalaja, mopio hui meaambo dulahu. Ami mololaalaaita todelomo owowoluwoa dapa-dapato wolo tingolo to uluu̒.