NEHEMIA 13 - KITABI HABARI MOPIOHE

Isirai̒lu helo pohalahu batanga lonto tau deli

¹ Tou̒ butoe̒e Musa hepilo bacaalio mao̒ totalu lo ulipu, ilodunggaalio kataraangani botie: ‘Taulo Amon wau Moab sama-samaata diila mowali mopaanggala wolo umati lo Allahu Taa̒ala;

² sababu tou̒ bangusa lo Isirai̒lu todelomo nonao̒olio yilumualai lonto Masiri, dulo bangusa boito diila helongohi ua̒alo wau taluhu ode bangusa boito. Tumbao̒ timongolio maloseuwa olei Bileam helo laa̒anati bangusa lo Isirai̒lu, bo Allahu Taa̒alanto malo lomelo laa̒anati boito lowali balakati.’

³ Tou̒ bangusa lo Isirai̒lu loo̒dungohe uito, timongolio helo pobua̒ mao̒ ngoa̒amila tau deli lonto ulipu lo Isirai̒lu.

Totoonulalo polobohu u pilohutu lei Nehemia

⁴ Tou̒ dipolulio mai uito ti Iimamu Elyasib, tatiluugasia mao̒ helo ngimato huhuu-waliyaalo potomeu̒ to Bele lo Eeya, o wumbuta mopiohu wolei Tobia.

⁵ Tei Elyasib longohi mao̒ odelei Tobia huwali udaa̒ tuwau u otutuulio mao̒ pilohetu tolomodu u polahuwalo dewo lopale, alama, pakaa-kasiyaalo u pomake to Bele lo Eeya, dewo ode mongo iimamu, dewo lopale ngotayade mopulu, angguru, wau winulo jaitun, u matayadulo ode tau-tauwalo Lewi, tahi pooitohea muusiki wau tamoodahawa hulubangi Bele lo Eeya.

⁶ Tou̒ sua̒li boito lotoduo mai, wau̒ diaalu to Yerusalemu, sababu totaunu otolo pulaa duluo pamalenta lei Artahsasta, olongia lo Babel, wau̒ lonao̒ ode Babel mola lopodulohe toli olongia. Bolo dengolo wakutu mola lapatio mao̒ wau̒ yiluasialio

⁷ u luli lohualingai ode Yerusalemu. Leidungga mai odia, wau̒ iloohea lotota mao̒ deu̒ tei Elyasib malongohi mao̒ odelei Tobia huwali tuwau to Bele lo Eeya.

⁸ Wau̒ loingo daa̒ wau helo pomahulao̒ ode bulemengio ngoa̒amila barangi lei Tobia.

⁹ Lapatao̒ wau̒ lopoa̒hu mao̒ alihu mohutu upacara poberesiyalo ode huhuu-waliyaalo boito. Lapatao̒ uito wau̒ helo powalingao̒ teto totoonulalo dewo lopale wau alama boli pakaa-kasiyaalo Bele lo Eeya.

¹⁰ Wewolio mao̒ leeto, ilodunggau̒ tahi pooitohea muusiki wau tau-tauwalo malo lolaa mao̒ Yerusalemu wau luli lohualinga ode hahaa-labolulio ngota-ngota, sababu ulipu diila helo potuuheta mao̒ u palaluo limongolio.

¹¹ Yi hediliniu̒ to tahimuloa lo ulipu sababu malo poluli mao̒ Bele lo Eeya. Palo-palongo lapatao̒ luli tiliangau̒ mai tau-tauwalo Lewi wau tahi pooitohea muusiki boito luli pilei̒ tuugasiu̒.

¹² Tulusi ngoilanggubu ulipu lo Isirai̒lu luli lolumulao̒ helongohi pale ngotayade mopulu, angguru, wau winulo jaitun, wau dilelolio ode huhuu-waliyaalo potomeu̒.

¹³ Wau̒ helongohi mao̒ tuugasi totau-tauwalo u wumbutio mola botie u longimato huhuu-waliyaalo potomeu̒ boito: ti Iimamu Selemya, Jadok ngotaalio ahali lo Butoo̒ wolei Pedaya ngotaalio taulo Lewi. Tei Hanan walae̒e Jakur wau wombu lei Matanya yilohiyau̒ mao̒ tuugasi helomantu olimongolio. Otaawau̒ deu̒ tau-tauwalo boito mowali palacayaalo wau mamonguurusi molayadeo̒ babaa-haniyaalo boito ode mongo sahaabati tangokalaja wolio wolo juujulu.

¹⁴ Yaa Eeyaau̒, ambunguolo eelailo mai ngoa̒amila u mapilohutu lo watotia ode Bele lo Eeya wau obubayaalio.

¹⁵ To maasa boito wau̒ loo̒onto deu̒ to dulahu Saabati dengolo lota to Yehuda hipomitode angguru. Woluo taa wewo poli tahe mopodetohe pale, angguru, hungo lo angguru, hungo lo ara wau babaa-rangiyaalo toitaato kolodailio wau dilelolio ode Yerusalemu.

¹⁶ Dengolo lota lonto Tirus tahi biluloa̒wa to Yerusalemu helodelo tola wau barangi daahangi hidala-dalaala ode Yerusalemu to dulahu Saabati, mota pilotali to taulo Yahudi.

¹⁷ Hediliniu̒ mongo tau̒wa lo Yehuda wau yiloi̒yau̒ mao̒, “Diila mongalati timongolio deu̒ timongoli malohutu u moleeto sababu helo pokootoro dalahu Saabati?

¹⁸ Tumbao̒ sababu dusa odi-odieelo yi Allahu Taa̒ala malo hukumani mai oli nenemoyaanto wau helo ngaantulu kota botie. Wolo botia timongoli ohilaa moduhenga omuluka lo Allahu Taa̒ala ode Isirai̒lu wolo mopokootoro dulahu Saabati?”

¹⁹ Sababu uito hepiloa̒huu̒ mao̒ alihu timii̒du bohulo dulahu Saabati, deu̒yito-yito jumaa̒ti lou̒ hui, huhuu-hebuwaalo hulubangi lokota hua̒a heu̒taalo tou̒ malolaango, wau diila mowali huo̒olo tou̒ dulahu Saabati diipo mopaluto, Sahutu lou̒ hui. Pilopo-tambatiu̒ mao̒ dengolo lota tahidudua̒ olau̒ to huhuu-hebuwaalo hulubangi boito u helo ngimato alihu todulahu Sabaati diaaluo barangi daahangi delolio tumuota mota ode delomo kota.

²⁰ Bo tingga maito dengolo lota daahangi wau tahe-mopotaalia babaa-rangiyaalo helo tihui to bulemengo dingingo meeseli to jumaa̒ti lou̒ hui.

²¹ Wau̒ loloi̒ya mao̒ olimongolio, “Diila ohuna timongoli mohima demola dimodupo teto. Poo̒dahai, wonu pohutuo limongoli uito pee̒entapo, wau̒ mamohama mao̒ lou̒ pakusa olimongoli!” Tumulalo mai uito timongolio diilalo helonao̒ mai todulahu Saabati.

²² Lapatao̒ tau-tauwalo Lewi hepilei̒ hutuu̒ mao̒ upacara poberesiyalo batanga wau lodaha huhuu-hebuwaalo hulubangi u longimato mao̒ alihu tau-tauwalo mohurumati dulahu Saabati. Wau̒ lodua̒ mola, “Yaa Allahu Taa̒ala, ambunguolo eelailo mai watotia sababu sua̒li boito olo, wau ponua mai watotia tutuuu̒de wolo ponu lo Eeya u udaa̒.”

²³ To maasa boito iloontongau̒ olo deu̒ dadaata taulo Yahudi malonika wolo mongobua lonto bangusa lo Asdod, Amon wau Moab.

²⁴ Ngotayadu lomongo walai̒ mongolio diila mongalati bahasa lo Yahudi, bo bahasa lo Asdod meaalo bahasa deli wewolio.

²⁵ Hediliniu̒ wau yilaa̒anatiu̒ timongolio. Woluo tahe pilateu̒ wau pilau̒uu̒ huwoi̒o. Lapatao̒ pilei̒ tadiyau̒ mao̒ timongolio domi tanggulo Allahu Taa̒ala deu̒ timongolio wau mongo walai̒ mongolio diila tamonika uu̒ulauwa poli.

²⁶ Yiloi̒yau̒ mao̒, “Diila madusa botie olo u hepilohutu li Olongia Salomo? Diaaluo olongia todunia botie talebe udaa̒ wolio. Allahu Taa̒ala helomonu mai olio wau lopowali olio olongia to ngoilanggubu Isirai̒lu. Eleponu odito tio mapiliyo lo mongobua bangusaa deli helohutu dusa.

²⁷ Otutu moleeto huhuutumu! Timongoli buheli loluwali Allahu Taa̒ala lou̒ helo diilea wolo mongobua lonto bangusaa deli!”

²⁸ Tei Yoyada yito walai̒ Iimamu Daa̒ Elyasib, bo ngotaalio lo walae̒e Yoyada lowali moluhengee Sanbalat lonto kota Bet-Horon. Masababu uito tei Yoyada hepilo loontuluu̒ lonto Yerusalemu.

²⁹ Wau̒ lodua̒ mola, “Yaa Allahu Taa̒alau̒ lo watotia, ambunguolo eelailo mai woloolo mola tau-tauwala boito helo pokootoro huhuloa̒ li iimamu wau daantia lo Eeya wolo mongo iimamu wau tau-tauwalo Lewi!”

³⁰ Odi-odieelo mola hepiloo̒ beresiu̒ mao̒ bangusa lo Isirai̒lu lonto tilolahepaalo u deli. Hetilantuu̒ mao̒ wuu̒du ode mongo iimamu wau tau-tauwalo Lewi, tilinggula timongolio ngota-ngota otuugasilio lohihilao.

³¹ Ilaatuluu̒ mao̒ olo alihu towakutu u tantutantu, ayu podiio̒ ode dewo bake mowali podapatolo wau ulipu moo̒delo dewo tilapulo huta u bohulio. Pulitio wau̒ lodua̒ mola, “Allahu Taa̒alau̒, ambunguolo eelai mai ngoa̒amila botie wau balakatialo mai watotia.”