NEHEMIA 11 - KITABI HABARI MOPIOHE

Ulipu lo Yerusalemu

¹ Mongo tau̒wa malo titatapu to Yerusalemu wau ulipu helomahuto u lolulaotao̒ ngaalaa̒ lonto timii̒du mopulu ngaalaa̒ tamusi motibiluloa̒ tokota mantali Yerusalemu. Tadiila ilotulaota mowali motibiluloa̒ to kokoo-tawaalo uwewo.

² To wolota limongolio woluo ta iloheela lohilao motitatapu to Yerusalemu wau timongolio hepiluji lo ulipu.

³ To kokoo-tawaalo wewo, ulipu lo Isirai̒lu, mongo iimamu, tau-tauwalo Lewi. Tahi pokalajawa Bele lo Eeya, wau wali mai lo tahi pomayaa lei Salomo lotibiluloa̒ to huta miliki limongolio wau to kokoo-tawaalo limongolio lohihilao.

^4-6 Dengolo lota lonto suku Yehuda wau Benyamin helo tibiluloa̒ to Yerusalemu. Uti-utieelo daputali lo tataa-nggulaalo limongolio: Mongo pongawaa̒ suku Yehuda: Ataya walae̒e Ujia wau wombu lei Jakaria. Dengolo lota to wolota linenemoyalio yito: tei Amarya, Sepaca wolei Mahalaleel, Peres, Yehuda. Jumulaalio wopato hetuto wolomo pulaa walu lota tahi lootola buheli. Tei Maaseya walae̒e Barukh wau wombu lei Kolhoje. Dengolo lota to wolota linenemoyalio yito: tei Hajaya, Adaya, Yoyarib, Jakaria, Syela, Yehuda.

^7-8 Mongo pongawaa̒ suku Benyamin: tei Salu walae̒e Messulam wau wombu lei Yoe̒d. Dengolo lota to wolota linenemoyalio yito: tei Pedaya, Kolaya, Maaseya, Itiel wolei Yesaya. Tei Gabai wolei Salai. Timongolio mongo ilaato noputua lo wibuo̒ wolei Salu. Ngoa̒amila ngojumulaa tio lohetuto dulo pulaa walu lota hetilau̒wa lei

⁹ Yoel walae̒e Jikhri wau wakiliilio, tei Yehuda walae̒e Hasenua.

^10-11 Mongo iimamu: Tei Yedaya walae̒e Yoyarib wolei Yakhin. Tei Seraya walae̒e Hilkia wau wombu lei Mesulam. Dengolo lota to wolota linenemoyalio yito: tei Jadok, Merayot, Ahitub tadihudihu Iimamu Daa̒.

¹² Ngoa̒amilalo woluo walu lohetuto dulo pulaa duulota iimamu tahi otuugasia to Bele lo Eeya. Tei Adaya walae̒e Yeroham wau wombu lei Pelalya. Dengolo lota to wolota linenemoyalio yito: tei Amji, Jakaria, Pasyhur wolei Malkia.

¹³ Mongo tau̒wa lou̒ ngaalaa̒ todelomo kaumu boitongojumulaa dulo hetuto wopato pulaa duulota. Tei Amasai walae̒e Asareel wau wombu lei Ahjai. Ti nenemoyalio to wolotalio mao̒ wewo yito: tei Mesilemot wolei Imer.

¹⁴ Lonto kaumu botie woluo ngohetuto dulo pulaa walu lota pahalaawani tamolotolo buheli. Tau̒wa limongolio yito tei Jabdiel, walae̒e Gedolim.

^15-18 Tau-tauwalo Lewi: Tei Semaya walae̒e Hasub wau wombu lei Ajrikam. Ti nene moyalio to wolotalio mao̒ wewo yito tei Hasabya wolei Buni. Tei Sabetai wolei Yojabad, tau-tauwalo Lewi polohuna daa̒ u mongimato mao̒ kalaja to bulemengo Bele lo Eeya. Tei Matanya walae̒e Mikha wau wombu lei Jabdi, lonto wali mai lei Asap. Tio tau̒wa lo tamoolahua mola duo̒lo dua̒ syukuru. Tei Bakbukya wakili lei Matanya. Tei Abda walae̒e Samua wau wombu lei Galal, lonto wali mai lei Yedutun. Ngoa̒amilalo ngojumulaa dulo hetuto walu lopulaa pato lota.

¹⁹ Tahi podahawa huhebu hulubangi: Tei Akuba, Talmon wau mongo sahaabati limongolio. Ngoa̒amilalo ngojumulaa ngohetuto pitu lopulaa duulota.

²⁰ Ulipu lo Isirai̒lu, mongo iimamu wau tau-tauwalo Lewi talebelio, helo tibiluloa̒ to huta limongolio to tilolahepaalo kota to Yehuda.

²¹ Tahi pokalajawa to Bele lo Eeya hibiluloa̒awa to wimbihu kota lo Yerusalemu u ilunte Opel. Timongolio lokalaja hetilau̒wa lei Jiha wolei Gispa.

²² Tamoo-ngimatoa tau-tauwalo Lewi tahi biluloa̒wa to Yerusalemu yito tei Uji walae̒e Bani wau wombu lei Hasabya. Ti nenemoyalio to wolotalio mao̒ wewo yito tei Matanya wolei Mikha. Tio leituoto to kaumu Asap, tao̒ tuugasi mongurusi muusiki to poi̒baadatialo to Bele lo Eeya.

²³ Tayadu lo timii̒du kaumu u monguurusi mao̒ muusiki to Bele lo Eeya timii̒du dulahu tilantulio mao̒ lodudua̒ wuu̒du li olongia.

²⁴ Tei Petahya walae̒e Mesejabeel lonto kaumu Jera wau suku lo Yehuda, lowali wakili bangusa lo Isirai̒lu tobele biluloa̒ li olongia lo Persia.

Ulipu lo kokoo-tawaalo wewo

^25-30 Dadaata to wolota lo ulipu helo tibiluloa̒ to kokoo-tawaalo u wiwiimbide wolo hahaa-laboluwalo limongolio. Dengolo lota lonto suku Yehuda helo tibiluloa̒ tomadala wolota lo Bersyeba ambahu hulialio wau Lumbaya Hinom ambahu tilayo. Timongolio helo tibiluloa̒ to kokoo-tawaalo wumbutio mola wau kakaa-mbunguwalo to palitio: Kiryat-Arba, Dibon, Yekabjeel Yesua, Molada, Bet-Pelet Hajar-Sual, Bersyeba Jiklag, Mekhona En-Rimon, Jora, Yarmut, Janoah, Adulam, Ajeka, Lakhis.

³¹ Dengolo lota talonto suku Benyamin helo tibiluloa̒ to Geba, Mikhmas, Ai, Betel wau kakaa-mbunguwalo totiliilio,

³² to Anatot, Nob, Ananya,

³³ Hajor, Rama, Gitaim,

³⁴ Hadid, Jeboim, Nebalat,

³⁵ Lod, Ono wau to Lumbaya Mongo pani.

³⁶ Dengolo polemboa̒ taulo Lewi tadipo-dipoolulio mai hibiluloa̒wa tomadala lo Yehuda hepilei̒ tibiluloa̒alio wolo tau-tauwalo Benyamin.