NEHEMIA 10 - KITABI HABARI MOPIOHE

¹ Tabohulo helo podutu mao̒ pali lo uluu̒lio yito ti Gubolonulu Nehemia walae̒e Hakhalya. Lapatao̒ lodudua̒ tei Jedekia. Lapatao̒ uito tau-tauwalo wumbutio mola botie helo podutu mao̒ pali lo uluu̒lio olo:

^2-8 Mongo iimamu Seraya, Ajarya, Yeremia, Pasyhur, Amarya, Malkia, Hatus, Sebanya, Malukh, Harim, Meremot, Obaja, Daniali, Geneton, Barukh, Mesulam, Abia, Miyamin, Maajya, Bilgai wolei Semaya.

^9-13 Tau-tauwalo Lewi Yesua walae̒e Ajanya, Binui wali mai lokaumu Henadad, Kadmiel, Sebanya, Hodia, Kelita, Pelaya, Hanan, Mikha, Rehob, Hasabya, Jakur, Serebya, Sebanya, Hodia, Bani wolei Beninu.

^14-27 Mongo tau̒wa lo bangusa Paros, Pahat-Moab Elam, Jatu, Bani. Buni, Ajgad, Bebai, Adonia, Bigwai, Adin, Ater, Hiskia, Ajur, Hodia, Hasum, Bejai, Harip, Anatot, Nebai, Magpias, Mesulam, Hejir, Mesejabeel, Jadok, Yadua, Pelaca, Hanan, Anaya, Hosea, Hananya, Hasub, Halohes, Pilha, Sobek, Rehum, Hasabna, Maaseya, Ahia, Hanan, Anan, Malukh, Harim wolei Baana.

Piaagamu lo daantia

²⁸ Ami, ulipu lo Isirai̒lu, mongo iimamu tau-tauwalo Lewi, tahi podahawa hulubangi Bele lo Eeya, tahi pooitohea muusiki wau tahi pokalajawa to Bele lo Eeya, wau olo dilebua mongo walao̒ lami tamoontapo u mongalati wau ngoa̒amila taa u modungohe to butoo̒ lo Allahu Taa̒ala wau malo pohalahu batanga lonto tau deli tahi biluloa̒wa tolipu lami.

²⁹ Ami ngoa̒amila mamopotuwau lo batanga wolo mongo tau̒wa lami wau motadia mai u tumumulo modudua̒ butoo̒ Allahu Taa̒ala u mailohi-Lio mai lotimbulude olei Musa. Pohileaala dua̒ Allahu Taa̒ala molaa̒nati olami wonu ami diila moe̒ela daantia botie. Ami motadia mai maa modungohe totoonulalo palenta, butoo̒ wau wuu̒du lo Eeya, Allahu Taa̒ala lami.

³⁰ Ami motadia mai u diila monika uu̒ulauwa wolo babaa-ngusawalo deli tahi biluloa̒wa tolipu lami.

³¹ Wonu bolo woluo bangusa deli taa ohilaa mopotali lopale meaambo penu boli wolo ode olami to dulahu Saabati meaalo to dulahu mantali wewolio, ami diila tamotali mao̒. To timii̒du taunu u opitulio, ami diila tamokalaja halabolu wau diila tamolagi biloli.

³² Timii̒du taunu ami ngota-ngota mamopo dembulo mao̒ limo loharamu talaa̒ duo̒lo oonggosi Bele lo Eeya.

³³ Ami mamopo dapato totoonulalo kapaluwani poi̒baadatialo to Bele lo Eeya, deu̒yito-yito: roti pohinta, dewo lopale timii̒du dulahu, binatangi ode bake yilalango timii̒du dulahu, dewo mantali uwewo, babaa-keyaalo pongambungualo dusa lo Isirai̒lu, wau totoonulalo wolo u palaluolio ode Bele lo Eeya.

³⁴ Ami, ulipu, mongo iimamu wau tau-tauwalo Lewi, mamolapi undi timii̒du taunu u molantu kaumu toonu tamusi mopodapato ayu podiio̒ ode babaa-keyaalo podewo ode Allahu Taa̒ala lami, modudua̒ wuu̒du lo butoo̒.

³⁵ Timii̒du taunu ami mamodelo mota ode Bele lo Eeya tilapulo pale u bohulio huhuu-ngowaalo ubohu-bohulio molutu mai to bubuu-ngowaalo ayu lami.

³⁶ Ami mamodelo mota walao̒ mongo lolai̒ lami tahi hulanga daa̒ ode mongo iimamu to Bele lo Eeya u mohudu mola ode Allahu Taa̒ala, lotuuu̒de wolo wuu̒du lo Butoo̒. Ami mamohudu mao̒ olo walao̒ sapi, walao̒ himba meaalo walao̒ batade lami u bohulo pilotutu mai.

³⁷ Ami mamodelo mota ode mongo iimamu to Bele lo Eeya ukiloco monto pale ubohulo tipuo mai timii̒du taunu, wau olo dedee-wowaalo wewo debo odelo angguru, winulo jaitun wau ngoa̒amila huhuu-ngowaalo u hidala-dalaala. Dewo ngotayade mopulu monto tilapulo halabolu lami madeloo mota lami ode tau-tauwalo Lewi tahemohimoa̒a dedee-wowaalo ngotayade mopulu to kokoo-tawaalo pomengiyaalo.

³⁸ Bo ngotaalio li iimamu wali mai lei Haruna musi pee̒-pee̒enta wolo tau-tauwalo Lewi boito wonu bolo timongolio mohimoa̒ dedee-wowaalo boito. Wau ngotayade mopulu monto ngoa̒amila dewo boito musi deloo mota lotau-tauwalo Lewi boito ode huhuu-waliyaalo potomeu̒ to Bele lo Eeya.

³⁹ Ulipu lo Isirai̒lu wau tau-tauwalo Lewi musi modelo mota dembulo tatapu debo odelo pale, angguru wau winulo jaitun ode huhuu-waliyaalo potomeu̒ tambati hepolahuwalo pakaa-kasiyaalo Bele lo Eeya. Mota teto olo tambati potibiluloa̒ lomongo iimamu tadonggo hio̒ tuugasia, tahi podahawa hulubangi Bele lo Eeya wau tahi poolahua mola. Ami diila tamomalonga molaalao̒ Bele lo Eeya lami.